علم النفس ((للعلاج الطبيعى)) Psychology

[DPT-Blue Phoenix]

السلام عليكم و رحمة الله و بركاته
بسم الله الرحمن الرحيم

‫#‏علم_النفس‬

بالنسبة لمادة علم النفس هى مادة منتهية هتاخدوها فى الترم الأول و هى ‫#‏بالعربى‬ .. عليها 100 درجة و هتدرسوا فى السنين الى بعد كدا علم نفس لكن بالانجليزى بعد كدا اسمه علم النفس للمعاقين Psychology

‫#‏ازاى_تتذاكر‬؟!

اول شبتر عندكم هيتكلم عن نشأة علم النفس و علماء ساهموا فى العلم دا و كدا و دول اصلا مش بتحفظوا فضلت اضيع وقت فيهم على قلة فايدة ... كتر خيرك لو قرأتهم ... و هيتكلم عن المفاهيم الاساسية !؟ .... افهم المادة كويس و حاول تستفيد منها فى حياتك العملية ... ((افهم + احفظ شوية نقاط و بالنسبة للمادة دى انا معاكم فى اى حاجة طول السنة فى للناس الى جامعة القاهرة ان شاء الله))
ايه هو علم النفس - اهداف العلم - انواعه او فروعه و كل دا انتم واخدينه بس تفصيلا شوية بعد كدا هيبقى الادراك و شوية حاجات كدا و برده هتاخدوا بور بوينت عن كيفية مذاكرة الدروس ... و شوية عن الانفعالات و لو كان فى وقت ممكن تاخدوا شوية فى الشخصية او الذاكرة تقريبا يا الذكاء مش فاكر ...
على العموم ... طبعا علم النفس هو علم دراسة السلوك ردا على مختلف المنبهات بهدف :-
1- الفهم (الملاحظة)
2- التفسير
3- التنبؤ بالسلوك
و التنبؤ دا قائم على خطوات محددة و موضوعية يعنى ايه موضوعية يعنى مش ذاتية يعنى مش بتحكم بناءا على عواطفك انت ... و رغم دا وقع عدد من علماء النفس فى الغلطة دى ... و انا كنت نزلت مواضبع كتير عن علم النفس ... و منها المفاهيم الرئيسية فى المادة و الى قرأ فيها او هيقرأ و عايز حاجة يقول مادة لذيذة بس افهموها و اعرفوا قيمتها كويس ...


"مفاهيم اساسية و مدخل الى علم النفس "

-من اهم العلوم فى حياتنا هو علم النفس يمكن الى بيميز الفرع دا هو انه بيتعامل مع النفس بمعنى الروح الجزء الى احنا مش شايفينه بس احنا حاسين بيه فى كل نفس و كل فعل بنعمله فى حياتنا عشان كدا هو علم نسبى 100% لأن بيتعامل مع انسان بيتعامل مع الروح الى هى متغيرة و ببتأثر بعوامل خارجية و داخلية و عشان ان شاء الله نقدر نستفيد من العلم دا لازم نفهم المفاهيم الاساسية و الفرق بين الاحساسات او المشاعر المختلفة و بعدين نبدأ نصلح من نفسنا و نكون افضل باذن الله ؟!

-علم النفس : علم دراسة السلوك بمعنى اى حاجة الانسان بيعملها فى حياته هى السلوك كل فعل و كل رد فعل دا سلوك بتدرس دا ليه ؟! عشان نفهم ايه سبب السلوك دا و نفسره و نتنبأ بالسلوك دا فى المستقبل و بالتالى لو سلوك كويس هنقدر ننميه و لو سلوك وحش هنقدر نتلغب عليه بان الله..

-من المفاهيم الاساسية المنبه- السلوك-الحاجة-الدافع-الحافز-الدافعية-الانفعال-الباعث ؟! ايه الفرق بين كل دول و ازاى اعرف ان الى انا حاسه دا اى واحد فيهم تعالوا نشوف ؟!

1-المنبه: بيشير لكل شىء بيتطلب مننا استجابة او رد فعل سواء الشىء دا كان داخلى مثلا العطش ؟! او شىء خارجى زى جرس الباب يعنى شىء من البيئة المحيطة بينا..

2-السلوك: بيشير لأى استجابة او رد فعل اتجاه منبه و السلوك هو استجابة كلية بمعنى مثلا جرس الباب رن انا انتبهت بعد كدا قررت بعد كدا قمت شفت مين الى بيرن كل دا سلوك استجابة كلية يعنى مش شىء واحدة لأ دا كله على بعضه كدا ..

3-الحاجة:يعنى ايه انا محتاج شىء يعنى ايه انا عطشان ؟! يعنى انا بفتقد شىء عشان كدا محتاجه يبقى الحاجة هى افتقاد شىء بيؤدى لنوع من التوتر او القلق طيب ليييييييه ؟! عشان ابدأ انا كفرد بمحاولة القضاء على القلق دا من خلال سد الافتقاد او النقص دا..

4-الدافع: حالة نفسية مترتبة على الحاجة بمعنى انا دلوقت عطشت فحسيت بالحاجة انا فعلا دلوقت محتاج ماء محتاج اشرب بدأ جسمى يحس بالتوتر و التوتر بمعنى اختلال التوازن الداخلى هينشأ عن الحاجة و حالة التوتر دى الدافع .. الى هو بمعنى حالة نفسية تدفع الكائن الحى للقيام بعمل معين عشان اسد بيه الحاجة او احقق هدف معين ليه ؟! عشان ارجع التوازن الداخلى لجسمى تانى ..

5-الحافز:الحافز هو الدافع الفسيولوجى بمعنى شىء من الجسم نفسه شىء اى كائن حى بيحاتجه زى العطش او الجوع عشان يفضل عايش او شىء للمحافظة على بقائه زى دافع ال*** او غيره انما دافع زى الثقة بالنفس مثلا دا دافع نفسى و اجتماعى لا يسمى بالحافز بمعنى ؟! اى دافع فسيولوجى هو حافز ..

6-الدافعية:هى هى نفسها الدافع بس الفرق انى ببدأ بخطوة اجابية و هى التنفيذ يعنى دخلت فى مرحلة التنفيذ ... مثال: انا دلوقت عطشان اتولدت الحاجة حاسس بنقص و بعديت اتوترت و اتولد الدافع الداخلى او الحافز ؟! طيب انا ممكن اكون فى صيام فرغم وجود الدافع هقول لأ انا مش هشرب فى دافع بس هنا مفيش دافعية انا مبدأتش التنفيذ ؟! انما بما لو انا مكنتش صايم و قمت اشرب عشان اعيد التوازن الداخلى خلاص بقت دافعية ...
يعنى الدافعية عبارة عن دافع و تنفيذ

7-الانفعال: برده شعور نفسى بس دا شىء بينشأ من حاجة خارجية بس ؟! الشىء الخارجى دا بيكون عمل ايه ياما اعاق السلوك او التفكير او اعاق هدف يعنى ايه الكلام دا ؟! و كمان ممكن الانفعال يحرك الدافع ؟!

مثال : انا دلوقت قاعد بشتغل الهدف او الباعث بتاعى انى اخلص شغلى ... فجأة زميل لى فى الشغل عطلنى عن اداء العمل بتاعى فانا اتعصبت و بدأت اغضب (انفعال) و الغضب دا ادى لانى عايز انتقم و اعمل مشكلة (دافع) .... يبقى فى فرق بين شعور الدافع و الانفعال الدافع شىء بينشأ اصله من جوايا شىء داخلى انما الانفعال دا شىء بينشأ من مصدر خارجى و ممكن يؤدى لدافع.

8-الباعث : بكل بساطة هو الهدف الى انا عايز اوصل ليه ؟! يعنى ايه برده ؟!

انا عطشت يبقى عندى حاجة حصل توتر و اتولد الدافع الداخلى او الحافز بدأت فى مرحلة الدافعية و التنفيذ عشان فقمت و رحت ناحية هدفى او الباعث بتاعى و هو كوباية الماء و شربت .... طيب لو انا رايح اشرب حد منعنى هيتولد انفعال لأن الشخص دا عمل اعاقة للسلوك بتاعى او للباعث الى انا عايز احققه ...

و طبعا اى حاجة صدرت منى هى تعتبر سلوك فكل الحاجات الى احنا قلنا علينا دى سلوكيات ....

-فى الحياة العملية مينفعش اقول انى بحس باحساس واحد بس طبعا انا يمكن فى لحظة واحدة احس بكذا حاجة مع بعض يعنى ابقى منفعل و عندى دافع و عندى هدف و بيصدر منى سلوكيات... بوجه عام بس الموضوع دا هقول فى معلومتين بالظبط :-

فى الغالب لما بيحصل نقص او افتقاد لشىء للانسان >>> بتتولد الحاجة >>> بيحصل اختلال لتوازن الجسم الداخلى يعنى اختلال فى فسيولوجى الجسم >>> دا بيؤدى لنوع من التوتر او القلق الخفيف >>> يظهر الدافع ...
و فى الحالة دى بتحصل حاجة من 2 :-

1- ياما انا بحقق الباعث او الهدف بتاعى الى علشانه اتولدت الحاجة و الدافع و هحس بالراحة و الرضا باذن الله .
2-مش هقدر اوصل للهدف او الباعث بتاعى و فى الحالة دى بيتولد نوع من الاحباط او اليأس عند الانسان تعالوا بقى نمسك اللحظة دى :-

-احنا مش هنقدر ننكر ان مثلا لو واحد فينا تعب جدااااااا و فى الاخر مقدرش يحقق هدفه اكيد هيجيله نوع من الاحباط بس فى ناس بتعيش و تخلى لحظة الاحباط دى لحظات و خلاص بتكون الحياة بالنسبالها انتهت و دا منتهى الغلط الانسان الناجح او الى بيوصل للمجد مش بيوصل من مرة واحدة لأ لازم يمر بالفشل لازم يكون فى مراحل صعبة فى حياته يتعلم منها و يستفيد و يبقى احسن و كل مرة بيقابله فيها الفشل يقوى نفسه و يصلح من نفسه و يحاول تانى بس يكون اتعلم من غلطته الى فاتت لو عمل كدا اكيد هيكون مصيره النجاح و الوصول لهدفه ...

-احنا هنا بنتكلم على الروح هنا الادوية ولا كيميائية ولا علاج طبيعى الادوية هنا انك تعمل الى عليك و تتوكل على ربنا و يكون عندك امل فى الحياة و امل فى ربنا و ايمان بان ربنا مش هيضيع تعبك .... متخدش دائما ان التعب فى تحقيق هدفك دا عبء عليك لأ فكر فيها انك بتتعب عشان تحقق هدفك بتتعب عشان يبقى ليك قيمة قدام نفسك اولا و ليك قيمة فى المجتمع و قدام الناس ثانيا ....

-انت شايف ان حلمك و هدفك يستحق السعى و واثق و عندك ايمان بان ربنا مبيضيعش تعب حد ؟! لو انت واثق من دا صدقنى هتبقى احسن من الاول احنا مش بنقول انك مش هتمر باحباط بس فى ناس الاحباط بيخليها تنتهى و ترجع لاقل من الصفر كمان ...

و فى ناس بتتغلب على لحظة الاحباط دى و بتفتكر ربنا الى قادر على كل شىء بتفتكر الامل .. عندها فعلا ايمان و يقين بربنا و هدفها و بتحاول دائما مش مهم كام مرة مش مهم اتبع قد ايه كله فى سبيل تحقيق حلمى ...

-و على فكرة اى حاجة او اى هدف عندنا بيصاحبه نوع من التوتر زى ما قلنا فوق اه دى فعلا طبيعة النفس انا لو ورايا امتحان هقلق و هدفى هيكون انى اخلص امتحان و هيتولد عندى كمان انفعال بس خلى بالك الانفعال و القلق لو قلوا هيقل اهتمامك و تركيزك و لو زادوا هيتعب جهازك الحركى و كمان هيقلل تركيزك جدا و دا الى هنبقى نقوله فى الموضوع الى جاى الموضوع الطبى ....... بس الفكرة ان الانفعال و القلق دا لزمته انه بخليك عندك حذر و يزود اهتمامك بمعنى انا عندى امتحان لازم ازاكر عشان انجح انما لو القلق دا زاد بيوصل لمرحلة صعبة الخوف ؟!؟!؟!

و ممكن كمان يوصل للرعب احنا ليه بنخاف خلينا نفكر مع نفسنا كدا ليه ؟! احنا خايفين من الفشل خايفين ان الناس تقولنا عننا فشلة و يتكلموا كتيييييير و اهلنا هيحسوا بايه ؟! صح ماشى بس انت نسيت حاجة نسيت ان ليك رب قال خدوا بالاسباب و اتوكلوا عليا و هو كفيل انه مش هيضيع تعبك يبقى ليه القلق انت عندك شك ان ربنا مش هيكافئك على تعبك ؟! اكيييييييييد لا
------يبقى علاج لحظة الخوف و الاحباط: هى انى افتكر ربى الى قالى خد بالاسباب و انا مش هضيع تعبك يبقى احنا لازم ناخد بالاسباب و يكون عندنا امل و ايمان بالله و دائما ناخد من اى لحظة صعبة دافع لينا و دائما نغير من نفسنا للاحسن و نحب الشىء الى بنعمله فى سبيل تحقيق هدفنا ... المهم نعمل الى علينا و بعدين نتوكل مش نتواكل عشان منرجعش تانى و نندم و اصعب لحظة فى حياة الانسان هى لحظة الندم .... يااااااااااا رب ساعدنا دائما اننا نكون افضل و قوى ايماننا و خد بايدنا للطريق المستقيم أمين يا رب

قوة العادة=الفعل X عدد مرات حدوثه او تكراره

-بمعنى انا لو عندى عادة معينة سواء كانت حلوة او وحشة الى بيتحكم فى قوتها هى عدد مرات تكرارها بمعنى انا عملت الفعل دا كام مرة ؟!
2-الحاجة التانية اذا كانت العادة دى مرتبطة بشهوة جسدية .... بيبقى التخلص منها صعب جدا برده لأن دايما الجسد او النفس هتطلب المزيد ......
--ايه اسباب عادة معينة او جوانبها يعنى :-
1-المعرفة ...... لو فى عادة سيئة او كويسة و انا مش عارف عنها اكيد مش هعملها
2-الرغبة.........هل انا عندى دافع داخلى و حاجة جسدية انى اعمل كدا ؟! و لا عادى هى حاجة انا اتعودت عليها و خلاص
3-المهارة......هو انا بعرف اعمل العادة دى بشكل كويس و لا مش عارف ؟!
-العادات ليها انواع كتير بس انا هنا هتكلم عن نوعين بس :-
1- عادة مفيدة
2-عادة ضارة

و السلام عليكم و رحمة الله و بركاته