|
||||||
| أرشيف المنتدى هنا نقل الموضوعات المكررة والروابط التى لا تعمل |
|
|
أدوات الموضوع | ابحث في الموضوع | انواع عرض الموضوع |
|
|
|
#1
29-08-2014, 02:49 PM
|
||||
|
||||
اقتباس:
ومرورك هنا أسعدني بجد =)
جزانا الله وإياكِ وتسعدني متابعتك ~
__________________
|
|
#2
29-08-2014, 02:55 PM
|
||||
|
||||
|
الحلقه الثالثة :
 قررت سلمي أن ترسل رسالة لـ حفصه لتشكرها علي الجروب وتسألها بعض الأسئلة ،، فكان محتوي الرسالة : السلام وعليكم ورحمة الله وبركاته اولا كنت عاوزة أشكرك علي الجروب بتاع هنعيشها صح اللي انتي دخلتيهوني ده ومعلش كنت عاوزة أسالك علي حاجه ،، هم الناس اللي في الجروب دول حقيقيين زينا ؟!! مش عارفه حاسه اني مستغرباهم شويه ! يعني بلاقي بوستاتهم إسلوبها حلو جدااا وبتشدك وفي نفس الوقت بحس انهم معقدين الدنيا سعات أحس انهم صح وسعات أحس انهم مكبرين المواضيع زياده عن اللزوم ، هو بصي انا بيني وبينك كده بنت عاديه يعني زي كل البنات ،، مش عارفه اذا كانت حياتي كده صح ولا غلط لأن كل اللي حواليا زيي كده ،، لكن دايما بحس ان ليا دور في الحياة ،، بس مش عارفه هو إيه !! يعني بحس اني مش بعمل كل اللي عليا فـ الدنيا ،، رغم اني بحاول قدر الإمكان اجتهد فـ كليتي اللي هي بالنسبالي الهدف الأساسي ف حياتي ،، عاوزاكي تقوليلي : هل انا ليا دور ف الحياة غير دراستي حاليا ؟ مع العلم اني في 2 كلية تربيه انجلش ومش مخطوبه ولا أي حاجه ،، يعني متفرغه للدراسه بس ،، فـ هل ده كافي ؟ ولا في حاجات تانيه لازم تتعمل ؟ معلش انا أسفه جداااااا لو طولت عليكي ،، بس انا من ساعة ما دخلت الجروب وانا حسيت انكم ناس مختلفين عننا ،، وحسيت بـ راحه لما قعدت أقرأ في الجروب شويه ،، بس لو كلامكم وبوستاتكم دي صح ، معني كده ان حيااااتي كلها غلط بقي ومعني كده برضو إني مش عندي أي هدف ف الحياه غير دراستي وإن ده غلط ؟!! بصي مش عارفه بقي انا محتاره وكان لازم اكلمك ،، انا عارفه اننا متكلمناش قبل كده ،، بس يـــــاريت بلاش تهملي الرساله أخر سؤال بقي : هو إنتوا معقدين ولا عندكم إسنان زينا ؟ ههههههه اوعي تعملي بلوك ،، انا قولت أهو يلا هستني الرد ،، مع السلامه ... وأغلقت سلمي الحاسب وذهبت للنوم ______________________ وفي اليوم التالي : يجلس إسلام مع صديقه محمد في كافيتريا الجامعه كالعاده ، قال إسلام بحرج : - محمد انا هقولك علي حاجه بس خليك هادي ،، مــــاشي ؟ نظر محمد إلي إسلام نظره عميقه وقال بترقب : - طالما قولت خليك هادي يبقي إنت عامل مصيبه ؟!! قول لما نشوف أخرتها معاك بهت وجه إسلام وقال بهدوء : - انا كلمت ساره إمبارح محمد متعجبا : - طيب وإيه الجديد ؟ نظر إليه بحزن وقال : - انا طلبت منها صورتها وهي وافقت وشوفتها ، وبصراحه طلعت أحلي بكتتتير مما كنت أتخيل ولاقيتني غصب عني بقولها كلام مكانش ينفع يتقال إحمر وجه محمد ونظر إلي إسلام بغضب شديد ولم يتحدث ،، إسلام محاولا تهدئه الموقف : - يا محمد ماهو مكنش ينفع أبقي بكلمها بقالي 6 شهور ولحد دلوقتي معرفش شكلها !! نظر إليه محمد بغضب شديد وقال في لوم : - يــــــــــــاسلام !!! وكمان بتكلمها من 6 شهور !! الله الله !! وإيه كمان ؟!!!! نظر إسلام إلي الارض وقال بصوت منخفض : - بص هو انا من ساعة ما بدأت أكلمها وانا عاوز أقولك لأني مش متعود أخبي عليك حاجه ،، بس كنت عارف انك هتدايق لو عرفت ... قاطعه محمد : - اه ولما لقيت انك بدأت تتجرجر في الحرام قلت تقولي علشان أشوفلك حل !! والله فيك الخير حاول إسلام تهدئه الموقف قدر المستطاع فقال بهدوء : - يا محمد خلاص بقي إهدي طيب ،، انا مش وحش كده وانت عارف بس بقولك غصب عني ،، وانا مش عاوز اللي حصل ده يتكرر تاني علشان كده بقولك تشوفلي حل محمد بنظره غاضبه : - ترضي علي اختك كده ؟!! قال إسلام بضجر : - يا محمد خلاص بقي هو كل شويه تقولي اختك اختك !! أعاد كلامه قائلا : - بسأل سؤال ،، ترضي حد يعمل مع اختك كده ؟!! - بصراحه لأ ،، بس الموضوع مختلف ،، انا فعلا هتجوز ساره محمد : - وهتتجوزها إمتي بقي ؟ نظر إلي محمد بسعاده وقال : - بعد ما اتخرج وأشتغل إن شاء الله أسند ظهره إلي مقعده وقال : - اااه يعني علي الأقل بعد سنه ونص !! ده لو أصلا لقيت شغل علطول بعد ما اتخرجت إسلام بعدم فهم : - طيب اعمل إيه طيب ؟ لم يهتم محمد لكلامه وأكمل قائلا : - وطبعا هتفضل تتكلم معاها لحد ما تيجي تتقدم لها ؟ - أكيييد طبعا ضحك ضحكة ساخره وقال : - عاوز تكلمها سنتين بحالهم مش غير ما يحصل تجاوزات ؟! تبقي بتضحك علي نفسك يا إسلام ، لما شوف من 6 شهور وعملت إيه ، أمال هيحصل إيه بقي بعد السنتين دول ؟!! نظر لمحمد بضيق وهو يقول : - يا محمد هو انا بكلمك علشان تشوفلي حل ولا علشان تعقدهالي زياده تنهد محمد بعمق وقال : - منا مش عارف أقولك إيه والله ،، انا اه بعمل ذنوب كتير بس يمكن ييجي عليا يوم وأقرب من ربنا وأتوب وربنا يغفر لي ،، إنما حاجه زي كده مستحيل أعملها لأني عندي اخوات بنات ياعم واخاف عليهم ، عموما هو انا عندي حل وحيد وعارف انه مش هيعجبك ،، انت لـازم تحاول تنسحب من الموضوع ده بهدوء وتبعد عنها خااااالص وتأكد إن لو ليك نصيب فيها هتتجوزها حتي لو حصل إيه ، ولو مش ليك نصيب برضو مش هتتجوزها حتي لو قعدت تكلمها لحد ما تتخرج زي ما بتقول .. رفع إسلام حاجبه وقال بتعجب : - اااايه يابني اللي انتي بتقوله ده ؟!! مش هينفع طبعا ، عاوزها تقول عليا بكذب عليها ده كله ؟!! خلاص بقي انا هحاول اخد بالي من كلامي معاها وخلاص .. محمد بتفهم : - طيب خلاص ،، بس حاول برضو تقلل كلامك معاها شويه ،، ولو لقيت نفسك في أي وقت هتقول أي حاجه حرام تاني يبقي اقفل الكمبيوتر بسرعه وكأن النت فصل ،، امممم رغم ان كلامكم كله تقريبا حرام إسلام بضجر : - يا راااااااجل !! كلامنا كله حرام !! حتي لو كلام عادي ؟!! هنفتي بقي محمد بإنسحاب : - يا عم معرفش ،، انا بقول تقريبا ،، بس برضو إبقي إسأل شيخ وإتأكد اللــــــــــــه أكبر اللــــــــــه أكبر .. اللــــــه أكبر اللـــــــــه أكبر أحس محمد بالإرتياح عندما سمع صوت الأذان ، فقال في هدوء منهيا هذا الحوار : - بقولك إيه ما تقوم بينا نصلي الظهر وندعي ربنا يعدي الموضوع ده علي خير إسلام بإبتسامه : - ماشي بس يلا بسرعه نجيب أي حاجه ناكلها لاني ماكلتش أي حاجه من الصبح وبعدها نروح نصلي محمد : - مــاشي ... وبعد الفطار نظر إسلام في ساعته فوجدها أصبحت 12:30 فذهبوا سريعا الي المحاضره ، وبالطبع لم يصلوا الظهر ! ______________________ وعلي الجانب الآخر بكلية التربيه تجلس سلمي وصديقاتيها هند وفاطمه ، نظرت لهن سلمي للحظات وقالت بترقب : - يا عيال انا هسألكم سؤال وردوا بـ جديه مره واحده في حياتكم بقي ماااااشي ؟ أجابوها بالموافقه فأكملت قائله : - إيه رأيكم في الحياه اللي إحنا عايشينها دي ؟ - ممله ! - جداااااااااا سلمي بتساؤل : - يعني انتوا مش مبسوطين من حياتكم دي ؟ رغم انكم بتعملوا كل اللي انتوا عاوزينه ؟! هند : - علي يدك أهو ،، بنقعد في الجامعه لحد العصر ونروح ننام شويه ونقوم نقعد ع الفيس وننام تاني علشان الجامعه ،، إيه الجديد يعني ؟!! فاطمه : - يا بنتي الملل ده بقي صديقنا الصدوق ،، عااادي يعني ده حال كل الناس شعرت سلمي بالسعاده مما سمعته وقالت بحماس : - طيب ما تيجوا نكسر الروتين ده ونغير حياتنا شويه ، يعني نخلي عندنا أهداف جديده ننظم يومنا شويه نعمل اااااي حاجه بقي . هند : - إيدينا علي كتفك ،، عندك أفكار ؟ سلمي بإبتسامه : - حـــاليا لأ ،، بس إستنوا عليا يوم ولا اتنين كده وهقولكم علي اللي فـ دماغي ،، بس أهم حاجه ان فكرة التغيير دي انتوا موافقين عليها صح ؟ - يااااااااااريت - موافقين جداااا طبعا سلمي وقدر شعرت بالإنتصار وقالت بحماس شديد : - قشششطه جدا ، أيون كده هم دول الصحاب اللي بجد، بحبكم يا عيال وربنا __________________ .. كانت سلمي تجلس في الميكروباص أثناء عودتها إلي المنزل وأخدت تحدث نفسها : - إيه يا ست سلمي مالك إتحمستي كده ليه ؟ معقوله كام بوست يأثروا فيكي اوي كده ؟ لأ بس بصراحه كلامهم عقلاني جدااا وإحساس الراحه اللي هم بيقولوا عليه ده باين عليه حلو وانا عاوزه أجربه . ثم نظرت للجانب الآخر وأكملت قائله : - طيب وفيها إيه لما أبدأ أغير من نفسي وأكون أحسن من كده ؟ مش انا دايما بقول اني لازم أكون مميزه عن كل البنات واني مش عاوزة أكون عايشه زي ما كل الناس عايشه وخلاص !! أكييييييد انا مش مخلوقه علشان كده ومش هسمح لنفسي ان حياتي تكون روتينيه زي كل الناس . اممممم عموما لما أروح هشوف حفصه دي ردت عليا ولا لسه ،، ومن إسلوبها هعرف اذا كانوا هم فعلا اللي صح , ولا معقدين زي ما دايما بسمع عنهم ________ ... دخلت سلمي إلي المنزل وذهبت مسرعه لتفتح الحاسب الخاص بها ،، حتي من دون أن تلقي التحيه علي اختها او تمزح معها كالعاده فتحت سلمي الحساب الخاص بها علي موقع الفيس بوك وعندما وجدت رسالة إزدادت ضربات قلبها بشده وبالطبع كانت الرسالة من حفصه ،، فتحت الرسالة وبدأت تقرأ فيها وإبتسامتها تتسع أكثر وأكثر حتي كادت تصل إلي اذنيها .................................................. ...... تابعونا
__________________
|
|
#3
02-09-2014, 08:13 PM
|
||||
|
||||
|
الحلقه الرابعة:
فتحت سلمي الحساب الخاص بها علي موقع الفيس بوك وعندما وجدت رسالة إزدادت ضربات قلبها بشده ،، وبالطبع كانت الرسالة من حفصه ،، فتحت الرسالة وبدأت تقرأ فيها وإبتسامتها تتسع أكثر وأكثر حتي كادت تصل إلي اذنيها كان محتوي الرسالة كـ الآتي : _____________ حفصه : - ههههههههههههههههههههههههه فطستيني من الضحك وربنا ،، اه يا ستي عندنا سنان وبنعرف نضحك ونألش ونهزر ونعمل كل حاجه ،، إحنا جامدين اووووي يا بنتي ،، بس كل حاجه في مكانها المناسب بتكون أحلي ومش هعمل بلوك متخافيش أصلا فرحتيني برسالتك جدااااا ..علي فكره انتي مش عاوزه إجابه لسؤالك لأن انتي عارفه الإجابه كويس طبعا الدراسه هدف مهم جدااا ف الحياه ، بس ما ينفعش يكون هو هدفنا الوحيد ، ما ينفعش نكون عايشين بس علشان نذاكر وننجح وبعدين نتخرج ونشتغل وخلاص .. وإحنا والله مش مكبرين المواضيع ولا حاجه ، إحنا بس بنحاول نعيش حياتنا صح وبنحاول دايما نكون من الناس اللي ربنا راضي عنهم والرسول يوم القيامه هيكون فخور بيهم وعلي فكره مفيش أي تناقض بين الحاجتين ،، قد تكوني انتي قابلتي نماذج لملتزمين فاهمين الإلتزام غلط وعلطول مكشرين كده ومش تحبي تتكلمي معاهم ، علشان كده خوفتي منهم ، لكن إحنا في فريق هنعيشها صح هدفنا إننا نفهم الناس معني الإلتزام الصح وإن الملتزم ده ممكن يعمل كـــــــــــــــــل حاجه بيتمناها لكن بدون ما يغضب ربنا علشان كده يا ستي قررنا نساعد بعض ونكون ملتزمين بجد وبرضو هنعيش حياتنا زي ما إحنا عاوزينها - ولو مش مصدقه إنه ينفع الـ 2 مع بعض ، جربي وشوفي هينفع ولا لأ إيه رأيك ؟ ___________________ قرأت سلمي الرسالة مرارا وتكرارا وهي في غاية السعاده ،، لا تعرف لماذا ولكنها كانت سعيده فقط ثم أرسلت رسالة آخري لـ حفصه وكان محتواها : - اللــــــه كلامك مريح اووووووي ، شكلنا كده لسه بيننا كلام كتتتتير ،، هكلمك بكره إن شاء الله علشان مش هينفع أفتح النهارده تاني إستنيني هااه ... أرسلت سلمي الرسالة وأغلقت الحاسب ، ذهبت لتبدل ملابسها لتتناول الغداء مع اسرتها ______________ وفي المساء إتصل إسلام بصديقه محمد : - الــــو ، ازيك يا محمد - الحمد لله تمام - بقولك إيه : إنت معاك المذكره بتاع دكتور عبد الرحمن ؟ أصلي نسيت أصورها - اه معايا ،، خلاص بكره هجيبهالك إن شاء الله - ماااشي شكرااااا ، معلش لو قلقتك من النوم ولا حاجه إبتسم محمد قائلا : - - - ياعم ما انت علطول بتقلقني ،، يعني هي جات علي النهارده ، بس أصلا انا لسه منمتش ،، قاعد بتفرج علي برنامج وبعدين هنام إن شاء الله إسلام بمرح : - - - برنامج إيه ده ؟ يمكن آجي اتفرج معاك - برنامج ديني كده - ههههههههههههه ما شاء الله ما شاء الله ربنا يهديك يابني رفع محمد حاجبه وقال : - - - عيل رخم وربنا ،، ما تسيبني ف حالي ياعم يمكن ربنا يهديني وأتغير بقي إسلام : - - - خلاص يا شيخ محمد كمل ياخويا كمل ، بس انا مستغرب يعني إشمعني النهارده ؟ - عااااادي كنت بقلب ولقيته والكلام شدني ، المهم طير إنت بقي علشان الفاصل قرب يخلص وانا عاوز أتفرج .. إسلام مازحا: - - - ماشي يا بطه اتفرجي ضحك محمد ضحكة عاليه وأكمل قائلا : - - - والله مانا عارف إيه اللي مصبرني عليك ده كله ، لولا إني بحبك كان زماني خنقتك دلوقتي ، إمشي بقي ورايا برنامج ، ومـــــــــــاتكلمش سااااااااااره ماااااااااشي ؟ رووووح نام علطووووووول علشان محاضره الساعه 8 متروحش عليك . إسلام بإبتسامه متعجبه : - - - زي ما تكون بتقرأ أفكاري ،، خلاص مش هكلمها ،، كفايه اللي حصل إمبارح بقي ، يلا مع السلامه - سلــــــــام __________________________ وفي اليوم التالي في الجامعه : قابل إسلام محمد بـ وجه ضاحك كالعاده وقال مازحا : - - - بطتي الحلوه اللي كانت بتتفرج علي برنامج ديني جات يا ناااااس ضربه علي كتفه وتذكر البرنامج فقال بسعاده : - - - بس ياااااض ، والله برنامج تحــــــفه إسلام بتساؤل : - - - كان بيتكلم عن إيه بقي ؟ نظر إليه محمد متعجبا وقال : - - - إشمعني ؟ بتفكر تتغير ولا حاجه ؟ - يمكن ! كاد محمد أن يقفز من مكانه وقال بسعاده بالغه : - - - بجــــد والله ؟! تنهد إسلام بملل قائلا : - - - ياعم قووووول وخلصني .. محمد : - - - كان يا سيدي بيحكي مواقف حصلت في حياة الرسول عليه الصلاة والسلام والصحابه ، وأد إيه الرسول تعب اووووي عقبال ما نشر الدين الإسلامي ، وإن الشباب دلوقتي سايبين الدين ده وكـــــل تفاصيل الحياة اللي بيشملها ، وبيجروا ورا شوية موضات متخلفه وعاجبهم اووووي الحال اللي هم فيه ده ، ولو حد فكر يتمسك بالدين ده الكل بيضحك عليه ويفتكره قديم ورجعي ومعقد !! بس عارف ؟ كلامهم كان عاجبني اووووووي ، رغم اني حسيت ساعتها اني وحش اووي وإني مش هينفع أعيش كده كتتير - - وأكمل بحزن : - - - نفسي تساعدني يا إسلام ونشجع بعض ونبدأ بقي نفهم ديننا شويه نظر إليه إسلام بإبتسامه خفيفه وقال : - - - يابني ما إحنا حلوين اوي اهو والحمد لله يعني لا بنشرب سجاير ولا مخدرات ولا بنعاكس بنات ولا بنروح أماكن مش كويسه ولا حــــاجه ، إحنا احسن من ناس كتتتير الحمد لله .. محمد بعد إقتناع : - - - بس ده مش كفايه يا إسلام ،، معتقدش ااااابدا أن دي الحياة اللي المفروض نعيشها ، اه إحنا مش بشعين اوي كده زي ما انت بتقول ، بس برضو لسه مبقيناش حلوين بجد واللـــــــه نفسي تشجعني ، مره واااحده من نفسي يا عم ، منا دايما معاك علي الحلوه والمره اخذ إسلام يستمع إلي الكلام وهو مازال غير مقتنع وقال : - - - ماهي المشكله اني مش مقتنع أصلا !! بحب حياتي كده وراضي بيها ، وبعدين ياعم ربنا يطول عمرنا ونبقي أحسن مع الوقت تنهد محمد بفقدان أمل ولم يتحدث - - نظر إليه إسلام فوجده علي هذه الحاله فأحب أن يضيف جوا من المرح وقال : - - - طيب بقولك إيه ؟ ما تخلي احـــــم الواد فاروق يشجعك ثم قال مازحا : - مش عارف إزاي هطيقك لو بقيت زيه نظر محمد للجانب الآخر وقال بحزن : - - - ماهي المشكله ان فاروق مش قريب مني زيك ، اه هو جاري وصاحبي وبحبه برضو ، بس علاقتي بيك انت أقوي وبحب أقضي معاك انت وقت أكتر - حبيبي يابو صلاح رفع محمد حاجبه وقال بتحدي : - - - بص يا أنا يا إنت ، وأكييييد في يوم هقنعك ، وهتتغير يعني هتتغير، تقريبا البرنامج اللي بكلمك عنه دي جاي الأربعاء الجاي ، هبقي أكلمك بقي في ميعاده وأخليك تشوف حلقه منه وبعدين تقرر - - ثم أنهي الموضوع وقال مازحا : - مش هتعزمني علي حاجه بقي إسلام : - - - ماشي يلا ، والحساب عليك ____________________________ وفي مساء هذا اليوم : فتحت سلمي حساب الفيس بوك الخاص بها ونظرت نظره سريعه علي قائمة الأصدقاء المتصلين حاليا فوجدت حفصه من بينهم فـ سرت كثيرا ، وبعثت لها رسالة : سلمي : انتــــــي موجووووده ، الحمد لله حفصه بإبتسامه : - - - كنت مستنياكي أثلــــــا - بجد ؟ ليه ؟ - - مش عارفه !! كنتي جايه علي بالي طول اليوم وقلت أكيد هتكلميني النهارده زي ما قولتي - حبيبتي ربنا يخليــــكي ^^ قوليلي بقي هو انا حياتي كلها غلط فعلا ؟ - احــــــم أيون إتسعت عينا سلمي وقالت بتعجب : - - - معقووووووووله فقالت حفصه: - - - ههههههههههههههه لأ مش اوي كده ، إنتي بس عاوزه تظبطي شويه حاجات وهتبقي 100% سلمي : - - - طيب أبدأ منين ؟ وكمان سعات بحس اني خايفه وبرضو مسيطره عليا فكره إن الالتزام ده يعني تعقيد وبخاف منها اوووي بصراحه .. - طبيعي تحسي بكده لأن الموضوع جديد عليكي ، بس إنتي بلاش تضغطي علي نفسك ، يعني براحه خالص عليها ، إبدأي غيري حاجه حاجه ، لأنك لو حاولتي تعملي كل حاجه في نفس الوقت هتحسي بالتعقيد اللي بتقولي عليه وهيكون صعب عليكي .. سلمي بتساؤل : - - - طيب أبدأ منين برضو مش عارفه ؟ - بصي انا هقولك علي الطريقه اللي انا اتغيرت بيها بس متضحكيش هااااااااا - هههههههههههههههههه ماشي حفصه : - - - بصي انا البوستات بتاع الفريق هي كانت السبب في تغييري بصراحه ، كنت بقرأ البوست منهم وأقول لنفسي طيب وانا معملش الحاجه الفلانيه دي ليه ؟ لو حاجه سهله شويه بنفذها فوووورا ، ولو تقيله بفكر فيها فتره كده وبعدين أنفذها ، او اطنشها فـ الوقت ده وبعدين أنفذها لما أكون مستعده بصي جربي الطريقه دي ولو منفعتش معاكي نشوف غيرها ، اووووكشن ؟ - امممم ماشي هحاول - بس علي شرط ،، كــــل ما تفكري تغيري حاجه في نفسك حتي لو كانت بسيطه تيجي تقوليلي مــــاشي ، حابه أكون متابعه إلتزامك خطوه بـ خطوه ، وانا واثقه انك هتقدري ثقه حفصه جعلت سلمي في غاية السعاده وقالت بحماس : - - - حــــــــاتر ، هروح ع الجروب بقي ________________ وبعد نص ساعه : أرسلت سلمي رسالة لـ حفصه وكان محتواها : - حفصصصصصه انا أخدت قرار اني هبطل حاجه معينه - هههههههههههههههه أوام ؟! ما شاء الله ، قررتي إيه بقي ؟ ------------------------------------------------------------- ياتري إيه القرار ؟ وإيه حكاية إسلام ده بقي ؟
__________________
|
|
#4
02-09-2014, 10:25 PM
|
||||
|
||||
|
روعة روعة روعة
الاسلوب اكتر من رائع عرض الاحداث جميل جدا الفكرة نفسها تستحق الحديث عنها بشكل كبير جدا فعلا موضوع هايل
__________________
ورا كل عيون بتلمع كلام كتير مستخبى خوف ,, وحلم متشعلق فى الفضا |
|
#5
03-09-2014, 08:42 AM
|
||||
|
||||
|
اقتباس:
شكرًا لحضرتك على المرور
أنا قولت أسيب القصة تحكي عن نفسها .. وتسعدني متابعتكم .. جزاكم الله خيرًا
__________________
|
|
#6
03-09-2014, 08:50 AM
|
||||
|
||||
|
الحلقة الخامسة :
أرسلت سلمي رسالة لـ حفصه وكان محتواها : - حفصصصصصه انا أخدت قرار اني هبطل حاجه معينه - هههههههههههههههه أوام ؟! ما شاء الله ، قررتي إيه بقي ؟ سلمي بحماس : - أنا قررت اني مش هحط صورة بروفايل تاني عليها بنت بشعرها - هههههههههههههههههههههههههههههه سلمي بيأس : - - - بتضحكي ليه ؟ علشان حاجه عبيطه صح ؟ حفصه : - - - ههههههههههه لأ بالعكس والله ، انا مبسوووطه جدااا إنك بدأتي ، وبعدين مفيش حاجه إسمها حاجه صغيره وعبيطه ، أي حاجه غلط بنعملها حتي لو كانت صغيره فهي بتشيلنا ذنب وإحنا في غني عن الذنب ده صح ؟ وكل ما ذنوبك تقل كل ما هتقربي من ربنا أكتر علشان كده اوووووعي تستصغري أي حاجه ، وعلي فكره لازم تبدأي الأول بالحاجات البسيطه خالص دي و واحده واحده إبدأي كبريها شويه بس قوليلي بقي إشمعني صوره البروفايل يعني ؟ - يا ستي لقيت ان صورة البنت الممثله دي ممكن ولد يبص عليها وانا اخد ذنبها ، طب وعلي إيه هو انا ناقصه ؟!! ما الصور الحلوه كتير وبعدين الموضوع بسيط ومش صعب يعني وفي نفس الوقت بيخفف من ذنوبي شويه قراااااار رقم 1 تم بنجاح يا فنـــــــــــــدم حفصه : - - - هههههههههه حبيبتي يا سلمي ، ربنا يجعلك من أقرب الناس إليه ، يلا يا باشا مستنيه قرار رقم 2 بقي ، ولو انا مش موجوده إبعتيلي الرسالة ولما أفتح هكلمك اوكشن ؟ إبتسمت سلمي وقالت : - - - مـــــاشي _______________________________ وفي اليوم التالي في كافيتريا كلية الهندسه ، كان محمد يجلس علي أحد المقاعد ويرتشف العصير الخاص به في هدوء ، نظر إسلام إليه في صمت لمده طويله ولكن قرر أن يقطع هذا الصمت فهمس قائلا : - محمد .... انا كلمت ساره إمبارح إتنبه محمد ونظر إليه وهو رافع حاجبه وقال : - محمد عاوز يشد فـ شعره ،، عملت اااااايه تاني ؟!! طأطأ رأسه وقال بخجل : - بص هو انا كنت بكلمها عادي ومفيش حاجه ، وكنا بنضحك ونهزر ونتخيل مستقبلنا وعيالنا وكده يعني ،، بس لما قفلت معاها وبدأت أقرأ المحادثه تاني ضميري أنبني اوووي لأني برضو فـ نص الكلام قلت حاجات مكنش ينفع تتقال محمد بضيق : - - - حاجات إزاي يعني ؟ إسلام وهو مازال ينظر إلي الأرض : - - - قعدت أقولها انتي إزاي كــــــده ، واني هخليها أسعد إنسانه في الدنيا وبحبها بقي وحاجات كده نظر إليه محمد بضيق شديد قائلا : - - - يــــــــــــــارب صبرني ،، والله ما عارف أقولك إيه ،، حاسس اني عاوز أمد إيدي بس ، يـــــارب استرها علي اخواتي واخوات المسلمين جميعاااا إسلام محاولا تهدئة صديقه : - - - طيب بص طيب ،، مش هي هتبقي مراتي ؟ فيها إيه لو عرفتها اني بحبها بقي ؟ محمد بنفاذ صبر : - - - مرااااااتك منين فهمني ؟ هو انت تعرف علم الغيب ؟!!! مش يمكن ربنا كاتبلك واحده تانيه من نصيبك ؟ هيكون إيه موقفك ساعتها بقي هاااااااااه هز رأسه نفيا وقال بعدم إقتناع : - - - ياعم لأ إن شاء الله مش هتجوز غيرها - مــــــاشي ده كلامك حاليا ،، بس برضو لو ربنا مش رايد دي تكون مراتك يبقي مش هتتجوزها حتي لو عملت ايه ! وبعدين حتي لو هي هتكون مراتك زي ما بتقول : مش من حقك تقولها الكلام ده خاااااااااالص إلا بعد الجواز ،، أقولك إيه تاني بس !! إسلام بغضب : - - - يا محمد طب بهدوء طيب ، انا مش عارف الموضوع ده بالذات بيعصبك كده ليه ؟!! محمد محاولا التوضيح : - - - علشان انا عندي اخواااااات بناااااات يا إسلام وبخاف عليهم جداااااااا ومؤمن جدااا إن كما تدين تدان ،، كمان صعبان عليا الذنوب اللي عمالين تشيلوها دي ،، وانا عارف ان الإنسان ممكن يضعف علشان كده بقولك بطــــــــل تتكلم معاها خاااااالص أحسن ،، وياعم أبقي كلمها لما نتخرج علشان تاخد رقم والدها ،، إنما كده لأ بجد حرااام عليك تنهد قائلا : - - - مش عارف بقي ربنا يسترها علي هند وعلي بناتنا كلهم ربت علي كتفه وقال بهدوء : - - - يا إسلام انا والله بقول كده من خوفي عليك ، انت عارف انا بحبك ااااد إيه ؟ يمكن بحبك أكتر من نفسي اصلا ، ومش حابب أشوفك كده ، كفااااايه بقي يابني ، هنفوق إمتي بس ؟ إسلام بإبتسامه خفيفه : - - - ربنا يهدينا صوب محمد نظره تجاهه ورفع حاجبه وقال محذرا : - - - بص علشان تكون فااااااهم ، لو جيت قولتلي حصل حاجه تاني انا هضربك ، انا قولت أهو ،، وساعتها ممكن أغصب عليك وأخليك تفصل النت بقي ، أيوه ماهو مش انا اللي أسيب صاحبي يغرق وانا موجود إتسعت إبتسامه إسلام وهو ينظر إلي صديقه بسعاده قائلا : - - - ربنا يخليك ليا يا محمد ،، مش عارف من غيرك كنت هعمل إيه ؟ رفع محمد حاجبه وقال بغرور مصطنع : - - - والله يابني ولا انا متخيل العالم من غيري ، هيييييح بقي ، هي طيبه قلبي دي اللي مودياني فـ داهيه إسلام : - - - ماهي طيبه قلبك دي اللي بتخليني بحبك وربنا ، حبيبي يابو صلاح وربنا ، ربنا يجمعنا سوا فـ الجنه إنتبه محمد فجأة وقال : - - - ااااايه ده هو انا سمعت صح ؟ كرر كده اللي قولته تاني إسلام ببراءة مصطنعه: - حبيبي يابو صلاح أومأ برأسه يمينا ويسارا وقال : - - - ياعم لأ دي عارفها ، انا عاوز التانيه قال إسلام مازحا : - - - شكلك بدأت تأثر عليا ياض ، ربنا يستر عليا بقي محمد وقد ظهر علي وجهه الإنتصار: - - - هع هع وأخييييييرا بدأ تأثيري عليك يبان ، اااااااااحمدك يــــــارب ، ولسسسسه ،، هو انا ورايا حاجه ، انا هوريك إسلام فـ المستقبل هيكون عامل إزاي ؟ إسلام مازحا: - - - حد ينقذني من الواد ده يا جدعان ، اني أغرق اغرق اغرق نظر إليه محمد بطرف عينه وقال : - - - ثئييييييييييل ، قوم هاتلي كانز ياعم خليني اهدي أعصابي - عاوز كام واحده ؟ - واحده أكييييد !! إسلام بضحكة عاليه : - - - يبقي إسمها كاااااان يابو جهل ، كانز دي جمع يا بطه محمد بملل : - - - وربنا رخـــــــم ، هات اللي تجيبه وخلصني ، الدكتور مش بيدخل حد بعده يااااااض إسلام بإبتسامه: - - - مــــــــاشي أمري لله ____________________ هيا بنا لنلقي نظره علي كلية التربيه ، سلمي بحماس شديد : - - - يا عيااااااال ، انا قررت أعمل ثوره علي نفسي وأتغير هند بإستهزاء : - - - هيهيهيهيهيهي ومالو ياختي مش عيب فاطمه : - - - وهتعملي إيه بقي ؟ هتطيري ولا هتمشي ع المايه ؟ ظهرت ملامح الغضب علي وجهها وقالت : - - - انتوا بتهرجوا ؟!!! مكنتش متوقعه منكم رد الفعل ده خالص هند : - - - ههههههههه بنهزر يا بنتي ،، قوليلنا قررتي إيه ؟ سلمي بحماس : - - - قررت أحاول أظبط حياتي واعيد ترتيبها وأعيش صــــح بقي ، يعني من الآخر هحاول أكون ملتزمة فاطمه بعدم فهم : - - - ملتزمة ؟! أشمعني ؟ سلمي وقد ظهرت ملامح السعاده علي وجهها : - - - في واحده عرفتها حببتني في الإلتزام اووووووي وحسيت كده اني بطييير وانا بقرأ الرسايل بتاعتها ، كمان لما أخدت قرار التغيير حسيت اني فرحانه اوووووووي وان حياتي بقي ليها معني كده ، بصوا هو الإحساس اللي انا حاسه بيه دلوقتي ده مش هينفع يتوصف ، هو بس بيتحس هند : - - - أيـــه ياعم الكلام الكبير ده سلمي : - - - علي فكره إنتوا وعدتوني انكم هتتغيروا معايا ، صح ولا ااايه ؟ فاطمه بتعجب : - - - بس إحنا كنا متوقعين الموضوع غير كده خااااااالص - - ثم اردفت قائله : - - - بس مش مشكله فهمينا أكتر ^^ تنهدت سلمي وقالت بحماس : - - - بصوا انا هبقي أدخلكم الجروب وانتوا تشوفوا بنفسكم ، بس عموما انا اول قرار أخدته اني مش هحط صورة بنت بشعرها بروفايل ااااااااابداااااااا كادت هند أن تصطدم بالأرض من كثره الضحك وقالت بإستهزاء : - - - يا راجل هو ده الإلتزام بقي ؟!! ده إسمه تعقيد وهيافه حضرتك ، سايبين الحاجات المهمه فـ الحياه وماسكين في قشور ؟!! ظهرت ملامح خيبة الأمل علي وجه سلمي وقالت : - - - انا عارفه انها حاجه عبيطه وصغيره ، بس إيه المشكله لما أبدأ واحده واحده ، أي خطوه هاخدها هتنفعني حتي لو كانت صغيره ، هبـــــدأ بأي حاجه حتي لو كانت قشور ، المهم مفضلش واقفه مكاني كده ! مش إنتوا معايا ولا إيه ؟ كنا متفقين سوا علي فكره !! نظرت هند للجانب الآخر وقالت بعدم رضا : - - - لأ يا ستي شكرااا ، الواحد لما يحب يتغير بيتغير من جوه مش بيمسك في الهيافات دي !! سلمي : - - - وإنتي يا فاطمه ؟ فاطمه : - - - انا مع هند برضو ، انتي كده بتضحكي علي نفسك يا سلمي ! سلمي وقد زادها رفضهما إصرارا فقالت وهي ترفع حاجبها : - - - امممممم طيب تمام ، هنشوف سلمي دي هتكون عامله إزاي في يوم من الأيام ، وهل فعلا القشور دي هتكون بدايه كويسه لواحده زيي ولا المفروض أبدأ من الصعب الاول ، مع إني أصلا لو بدأت من الصعب هخاف ومش هكمل ، عموما مش مشكله وحتي لو انتوا مش هتساعدوني فأكييييييد ربنا هيساعدني ويقويني ، يلـــا انا ماشيه ، سلام - - يابنتي طب والمحاضره الأخيره ؟ سلمي : - - - مش مهم ، سلام ! _________________ وأثناء عودتها للمنزل أخدت تفكر في كل ماحدث وتتساءل ،، هل هي علي حق أم هما ؟ رغم ان كلامهما كان به بعض السخريه إلا انه زادها ثقه وتمسك بمبدأها ووجدت نفسها تقول بكل ثقه : أنــــا هثبتلكم أن كلامي صح ، وهبدأ في طريقي حتي لو الكل إتريق ، مش هيهمني حد طــــــالما عندي هدف ، وهوصــــــله بإذن الله هوصله والأيام بيننا بقي ، يـــــاربي قويني وزيدني قوه ----------------------------------------------- تابعونا
__________________
|
|
#7
03-09-2014, 08:55 AM
|
||||
|
||||
|
الحلقه السادسة : في كافيتريا كلية الهندسه ، محمد بحماس شديد : - أبوسلم ، النهارده الأربعــــاء ، مش بيفكرك اليوم ده بـ حاجه ؟ إسلام محاولا إستفزاز محمد : - - - اه ان بكره الخميس وبعده الجمعه هيهيهيهيهيهي رفع حاجبه قائلا : - - - لأ يا ظريف مش كده ، البرنامج الديني اللي كنت بقولك عليه هييجي النهارده - يييييييييي هو إنت لسه فاكر ؟ محمد بثقه : - - - هاهااااي طبعا يا حلو ، انا خلاص أخدت القرار ، وهتتغير يعني هتتغير إسلام : - - - ده انت مُصر بقي ؟!! - طبعااااااا إسلام بتعجب : - - - يابني انا مش قادر أفهمك ، عندك إصرار غريب بجد ،،بس أحب أقولك أني هتعبك جداااا ، براحتك بقي محمد بتحدي : - - - أيوووووون انا مُصر ، وهنشوف مين اللي هيستسلم للتاني فـ النهايه ، واوعدك ان أنا اللي هكسب ، لأن انا اللي صح - هاهاهاهاهاهاهاع, هنشووووووف محمد محاولا التأكيد عليه : - - - هتصل بيك بقي في الميعاد بتاعه ، وبعد ما نشوف الحلقه هنتناقش فيها ، اووووكشن ؟ - كمااااااااان !! لأ يا عم خلاص مش هرد عليك محمد : - - - عــــــارف ان مردتش هتلاقيني جايلك بكره وفاضحك فـ الكلية كلها ، هقولهم إنك سرقت مني المذكرات بتاع د عبد الرحمن إسلام بإستنكار : - - - خلاص خلاص هرد ،، برستيجي ميسمحليش أنهم يعرفوا حاجه زي كده - ههههههههههههههههه ماشي ______________________ وفي المساء : جلست سلمي علي موقع الفيس بوك لتتحدث مع حفصه وتقص عليها ماحدث اليوم ، سلمي : - - - حفصه إنتي موجوده ؟ وبعد ربع ساعه : - حفصه انتي فييييين ؟ عاوزاكي ضروري - معلش يا سلمي قومت أعمل حاجه وسيبت الموبايل مفتوح ، خييييير ؟ مالك زعلانه ليه ؟ سلمي بإحساس غريب : - - - عندي إحباط داخل جواه تحدي حفصه بعدم فهم : - - - بمعني ؟!! - فاكره لما قولتلك اني كلمت صحباتي علي فكرة التغيير دي وهما قالوا أنهم موافقين وكده ؟ كلمتهم النهارده والبدايه مش مشجعه بالمره ! حفصه بحزن : - - - ليييه حصل إيه ؟ - يا ستي قولتلهم .... ( وأخدت سلمي تقص عليها ماحدث ) حفصه بتفهم : - - - امممم خلاص مش مشكله ، انا معاكي أهو ومش هسيبك ابدا إن شاء الله ، إبدأي انتي لوحدك وحاولي معاهم واحده واحده سلمي بيأس : - - - مكنتش عاوزة كده ، كمان اتدايقت جدااااااا لما اتريقوا عليا وحسوا اني كده بهرج معاهم واني مش جاده فـ الموضوع ، رغم اني متأكده ان انا اللي صح ، ومتفائله خييير وإن أكيييد مع الوقت الحاجات البسيطه دي هتكبر ، صح ولا إيه ؟ حفصه بإبتسامه : - - - صح طبعـــــــا ، أي إنسان بيفكر إنه يتغير أو يلتزم بمعني أصح ، طبيعي جدااااا هيلاقي صعوبات كتير وناس بتستخف باللي هو بيعمله ، بس عارفه ؟ لما يبدأ التغيير ده يبان عليكي هتلاقي الناس بعد كده في عيلتك وكليتك بيتخذوكي قدوه ليهم ، ساعتها بس هتحسي ان انتي كنتي صح وإن الحاجات البسيطه دي كبرت وكبرت لحد ما بقت سلمي الملتزمة بجد وهم كلهم هتلاقيهم لسه وافقين مكانهم تنهدت بأريحيه وقالت : - - - كلامك بيريحني علي فكره ، كمان انا من النوع اللي دماغي نشفه اوووووي في الحق ، ولو أخدت قرار بنفذه حتي لو الكل وقف ضدي ، ربنا يستر بقي حفصه بإبتسامه : - - - ربنا يريح قلبك ، يلا بقي هتقوليلي علي القرار رقم 2 إمتي ؟ سلمي بحماس : - - - ااااول ما أخده هقولك حفصه : - - - ماثي ____________________________ وفي الساعه الثامنه مساءا بالتحديد ،، كان إسلام نائما عندما رن هاتفه المحمول هاااااوم ، إيه القلق ده بس ! مش قادر بقي مش مهم ! اووووف بقي ، يااااااااااااااااااهند هند ( من الخارج ) : - - - أيــــوه جايه أهو ،، ثواني - تعالي شوفي البتاع اللي عمال يرن ده علشان مش قادر أقوم - حــاضر حـــــاضر - يـــــابنتي بسررررررعه زهقت منه - أيوووه جيت أهو ،، ده محمد اللي بيرن - عاوز إيه يا محمد دلوقتي بس ؟!! - طيب خد رد وشوف عاوز إيه ! - مش قـــــادر بجد ،، عينيا بتقفل لوحدها - يابني لحسن يكون عاوزك فـ حاجه مهمه ! - إستني كده ،، هو النهارده الأربعاء صح ؟ - اها .. إشمعني ؟ - ااااااه يبقي بيتصل علشان يقولي علي البرنامج الديني ! - برنامج ديني ؟!! إشمعني ؟ - يا ستي مش مهم بقي ،، خلاص خلاص سيبي الموبايل وامشي - مــــاشي براحتك - ييييييي ده بيرن تاني ،، بقولك إيه إقفلي الموبايل واطلعي وخدي الباب فـ إيدك - يابني عيب كده ، لحسن يزعل ! - خلاص إعملي الموبايل صامت او خديه معاكي بره ، مش وقت برامج دلوقتي انا نايم علي نفسي أصلا - خلاص هخليه معايا بره يمكن حد من أهلنا يتصل ولا حاجه ، عاوز حاجه تاني - لأ شكرا ________________________ مازالت سلمي جالسه تتابع جروب هنعيشها صح وتبحث عن الخطوه القادمه في التغيير ،، كانت تشعر براحه شديده وهي واحده من أفراد هذا المجتمع ، مجتمع نقي ، راقي وبه روحانيات عــــاليه ، حقــــا كانت سعيده أنها أصبحت واحده من أبناء هذا الجروب ، كــانت مندهشه من هذه السرعه في إتخاذ هذا القرار بالتحديد ، هل من الممكن أن يكون الله قد بعث لها حفصه لتدلها علي هذا الجروب كـ رسالة من الله لها لتتقرب منه ؟ ام انها هي التي كانت بحاجه ماسه إلي التغيير ووجدت راحتها في هذا المجتمع الراقي ؟ لــا تعلم شئ سوي انها تريد أن ترتقي بنفسها فقط , وحتي لو واجهت الكثير من الصعاب ، فـ هي مؤمنه بالفكره ولن تتخلي عنها مهما حدث وكـــــانت تسأل الله دائما ان يدلها علي الطريق الصواب ، وإن يكون ما تفعله حاليا بداية جيده في طريق إرتقائها من إنسانه كـ كل البشر إلي انسانه قدوة ________________ وفي صباح اليوم التالي : إسلام ( لنفسه ) : - غريبه ؟! ده الواد محمد عمره ما فوت محاضره !! وكمان قافل موبايله !! ههههههههههههههههههه تلاقيه زعلان مني بسبب الموقف اللي عملته فيه إمبارح ، بس هو عارف اني لما بكون نايم ببقي ميت ، أكيييد هعرف اصالحه زي كل مره ، يــــارب يرد بس إقترب منه صديقه شادي قائلا : - - - واقف لوحدك ليه يا إسلام ؟ إسلام بإبتسامه خفيفه : - - - مستني محمد ، أصله لسه مجاش ، باين عليه كان سهران وراحت عليه نومه شادي : - - - ههههههههههههه يمكن ، طيب تعالي أقف معانا بدل ما انت لوحدك كده .. كان إسلام واقفا مع أصدقائه يتحدث ويمزح معهم ، عندما اتاه احد الأفراد وأمسك بـ كتفه من الخلف ، إستدار إسلام ليري من هذا وإذا به يري فاروق فقال متعجبا !! - فـــــاروق !! نظر إليه فاروق بغضب شديد وقال : - - - : تصدق بالله ؟ إنت أحقر أنسان شوفته فـ حياتي ----------------------------------------- إزاي فاروق يقول كده لإسلام ؟! وايه ممكن يكون حصل علشان يكلمه بالطريقه دي ؟ تـــــــابعونا =)
__________________
|
| العلامات المرجعية |
| الكلمات الدلالية (Tags) |
| أحمد, الحلال, سلمى, إسلام, هند |
«
الموضوع السابق
|
الموضوع التالي
»
العرض المتطور
|
|
جميع الأوقات بتوقيت GMT +2. الساعة الآن 04:17 PM.
