دفعه ثانويه عامه 2015

[ابانوب ايليا]

المشاركة الأصلية كتبت بواسطة $طالبة علم$

اخيرا شاركت....شكرا للمشاركه....وحبة نصايح كده لو سمحت.....وطمنا جبت كام.......ومبروك مقدما..... ويسمع منك ربنا

العفو بالنسبة للمجموع فانا الحمد لله جبت 98.05% وربنا يكرمك طبعا بأعلى من كده.

بالنسبة للنصايح بقى ..هما شوية نصايح غالبا مفيش غيرهم.

1- اولا المذاكرة اولا بأول وان الواحد يعمل اللى عليه علشان يرضى ضميره وكل واحد بتكون ليه طريقته فى المذاكرة يعنى محدش يقول هو انا المفروض اذاكر ازاى؟

2- لازم يكون عندك ثقة كبيرة ان ربنا مش بيضيع تعب حد وان ربنا بيختار الصالح لكل واحد وده عن تجربة فعلا ...فممكن حد يغلط كتير ويجيب درجة حلوة فى الامتحان او يقفل..عادى.

اهم حاجتين بقى هما 3و4و5 اللى جايين ودول صراحة اهم من كل اللى قلته علشان دول فعلا اللى ضرونى

3- محدش يبص لغيره ذاكر ايه وخلص ايه؟ يعنى مثلا تكونى فى يوم مخلصة فصل قصة فى العربى وشوية انجليزى وفصل فيزياء بس....وتسألى واحدة صاحبتك تقولك انا خلصت انهاردة 4 نصوص ونص منهج الفيزياء ونص الكيمياء وباب احياء و6 وحدات انجليزى فتقولى لنفسك؟ كل ده؟؟؟؟؟؟؟ انا كده حفشل.. مش شرط ابدا مقدار اللى الواحد بيخلصه فى اليوم...اهم حاجة الواحد بيبذل مجهود وبيعمل اللى عليه وانا كانت مذاكرتى بطييييييييييييييئة جدااااااااااااااااااااااااااااااااااااااااااااا واللى ضرنى فعلا انى كنت اسأل زمايلى خلصت ايه انهاردة او حليت كام كتاب؟ ولما الاقيهم حالين ومذاكرين اكتر منى يصيبنى احباط شديد وبتوتر وده غلط

4- نيجى بقى للنقطة المهمة دى ...الامتحانات ...بالنسبة للامتحانات مش حتيجى معقدة..دى خلاص بقت قاعدة اساسية فى النظام االجديد ...الافكار اللى بتيجى فى الامتحان بتيحى فى صورة سؤال بسيط ..بيفتكر الواحد انه سهل ولكن لما يحله بيلاقى الاجابة مش جاية فى حين انه لو كان ركز شوية كان حيجيبها.. علشان كده لازم البعد عن التوتر فده حيقضى على التركيز اللى بيساعد الطالب اللى اقل من المتوسط انه يجيب الفكرة بتاعت السؤال لأنها بتكون بسيطة ودى برضه نقطة ضرتنى وبعدين ليه التوتر اصلا طالما الواحد عمل اللى عليه؟

5- فى الدفعة بتاعتى كان فيه مجموعة من الطلبة اقل وصف ليهم هو العباقرة..الطلبة دول كنت اول مااشوفهم اقول لنفسى ده ياريتنى مادخلت ثانوى عام...انا اروح فين جنب العلماء دول؟؟؟؟؟ التفكير ده مكنش مجرد غلط....ده جرييييييييييييييييمة بحد ذاتها لأن ده كان مخلينى افقد الأمل وده خطر جدا...بس الللى اكتشفته بعد النتيجة ان ثانوية عامة مختلفة تماما عن باقى السنين...وكانت فيه مفاجأت فى الدرجات لأنى لقيت ناس جايبة درجات عالية مكنتش اتوقع منها ده وناس من العمالقة اللى قلت عليهم مجاميعهم نازلة فالموضوع بيختلف تماما

اخر حاجة واسف للأطالة بقى ...ثانوية عامة اسهل بكتير من اولى وتانية ثانوى