خصموا منى 8 جنيه ؟!!!!!!!!!!!!!!

[مس منه]

السلام عليكم ورحمه الله وبركاته .
يا جماعه انا قبضت مرتب شهر 6 النهارده ولقيت مخصوم منى 8 جنيه عن باقى زمايلى
ولما سالت الادارى قالى علشان انتى شايله عهده ؟!!
هو اللى معاه عهده يتخصم منه فلوس ؟!!! المفروض انها مسؤليه انت متحملها زياده عن باقى زمايلك . يبقى المقابل ان يتخصم منك انت وتبقى اقل منهم ؟!!!!
طب انا شايله العهده دى من 3 سنين اشمعنى الشهر ده اللى اتخصم منه بس ؟؟!!!وهل الخصم ده هيبقى كل شهر ولا ايه ؟؟؟
يا ريت يا جماعه حد يفهمنى ايه اللى بيحصل لو سمحتوا

[Azhar Aly]

ع حد علمى ان العهدة بيتم جردها مع تقفيل السنة المالية ف شهر يونيو ولو كان فيها اى عجز بيتحمل مسئول العهدة خصم مالى مساوى لقيمة العجز بالعهدة

[مس منه]

المشاركة الأصلية كتبت بواسطة azhar aly

ع حد علمى ان العهدة بيتم جردها مع تقفيل السنة المالية ف شهر يونيو ولو كان فيها اى عجز بيتحمل مسئول العهدة خصم مالى مساوى لقيمة العجز بالعهدة

ولا حصل جرد ولا فيه حاجه ناقصه خااااااااااااالص
ولا فيه اى اجراء تم قبل كده بخصوص العهده خالص لاحد سال عليها ولا حد جردها وهى اساساااا مش ناقصه زى ما استلمتها موجوده
مش عارفه ايه اللى حصل للخصم والله . ده غير ان بقالها 3 سنين معايا ومحصل برده لاجرد ولا خصم قبل كده
يا ريت حد معاه عهده يدخل يفيدنى

[مس منه]

اه صحيح كشف المرتبات شوفته لقيت كل اللى شايل عهده مخصوم منه بس مكنش حد موجود منهم علشان اساله عن سبب الخصم ده

[midohamza2]

حضرتك أى حد معاه عهدة فعلا بيتخصم منه فى نهاية كل سنة مالية علشان التلفيات ودا متبع فى كل مكان

[مس منه]

المشاركة الأصلية كتبت بواسطة midohamza2

حضرتك أى حد معاه عهدة فعلا بيتخصم منه فى نهاية كل سنة مالية علشان التلفيات ودا متبع فى كل مكان

متبع فكل مكان ؟!!! يعنى الخصم ده فكل المحافظات ؟
طب دى العهده جديده ومفيهاش اى تلفيات اصلا ولافيها حاجه ناقصه يبقى يخصموا على اساس ايه ؟
وهل الخصم ده هيبقى كل شهر ولا شهر 6 بس ؟؟
حاجه تحير والله دى العهده دى بقالها معايا 3 سنين ومحصلش اى خصم قبل كده خااااالص

[سعيدمصطفى30]

حضرتك خصم العهدة بيتم من غير جرد وليس له علاقة بتلفها او نقصها ودا شغل ادارى فى كل المحافظات تقريبا على اساس ان اللى شايل عهدة بيستفاد منها

[ammhhe]

ههههههههههههههههه
كل واحد بيالف شويه
العهده بتتجرد وبيتمم عليها كل سنه وبيتاكد ان كله تمام من خلال لجنه لهذا الامر كل عام
وبيمضوعلى محضر جرد ولو ناقصه بتبقى وجع دماغ وبهدله
بس كلللللللللللللللللللل ده على الورق وهما قاعدين وحتى لو العهده ناقصه وتالفه وخرده بتتكتب تمام التمام
دا اجراء ادارى مالى هام جدا فى الدوله بيس على الورق وانت لا تدرى بيه
اما الخصم ده مبلغ تافه سنويا حسب ما قدرت الدوله قيمه العهده عندك
لو غايه تدفه مثلا 10 جنيه فى السنه ولو بسيطه تدفع واحد جنيه ونصف جنيه ووو الخ وممكن فى وقت من الاوقاب بعد مده تطلب تكهين العهده حتى ولو جديده فى الكرتونه وترفع العهده وتسلم للاداره او للعامل فى مخزن الخرد او غيره
والمبالغ دى نتيجه استهلاك العهده اى استعمالها لانها مع الزمن قيمتها بتقل
دى قوانيييين قديمه جدا جدا
حتى امين المكتبه متمنين الكتب عنده من ايام ثوره عرابى حتى اليوم وبيدفع كل سنه
والمبلغ ده مره واحده فى السنه

[abu ragab]

احنا في المنيا معظم المرتبات ناقصه من 300 الي 1000 تقريبا بيقولوا المرتب بدون الاعباء الوظيفيه ومش عارفين الاسباب ايه زعلانه انت علي 8 جنيه واحنا اتخرب بيتنا الشهر ده................................ز

[Azhar Aly]

انا م المنيا وقبضت بعلاوة الاعباء الوظيفية عادى جدا كل اللى اتخصم منى حوالى 84 ج اللى هو كان بيخص 5 % باثر رجعى م شهر يناير اللى هى ع ما اتذكر بسبب رقيمة المعاش الى 36 شهر بدل 18 وم الشهر الجاى هيبقى المرتب زى ما هو م غير اى خصومات كبيرة كدا

[abu ragab]

المشاركة الأصلية كتبت بواسطة Azhar Aly

انا م المنيا وقبضت بعلاوة الاعباء الوظيفية عادى جدا كل اللى اتخصم منى حوالى 84 ج اللى هو كان بيخص 5 % باثر رجعى م شهر يناير اللى هى ع ما اتذكر بسبب رقيمة المعاش الى 36 شهر بدل 18 وم الشهر الجاى هيبقى المرتب زى ما هو م غير اى خصومات كبيرة كدا

شكرا لك بس الكلام ده حقيقي في ادارة مغاغه وبني مزار واسال اي حد عن هذا الامر

[Azhar Aly]

فعلا ف بنى مزار ومغاغة تم الخصم انما ف ادراتى متخصمش حاجة غير زى ما سبق وقلت لحضرتك .. ف كل الاحوال الخصومات الخاصة بعلاوة الاعباء هترجع تانى فلا داعى للقلق

[tareksmssms]

كل عام وكل اعضاء وزوار المتدى بخير
اما بالنسبة للخصم ( مس منه )
الخصم المفروض بيكون مرة واحده فى السنة من ارباب العهد والخصم ده بيكون كتأمين ضد السرقة اوالتلف لاقدر الله وده فى مصلحةصاحب العهده

وهذا على حد علمى

[abo yahya]

فى قنا مرتب شهر 6 مخصوم منه الحوافز وبدل الاعتماد والاداء وبد النقدى والاعباء يعن بيصفى على الاساسى
والعلاوات الخاصة

[مس منه]

شكرا ليكم جميعا على الافاده
وكل سنه وحضراتكم طيبين