رسالة الى الرئيس القادم

[عبد الحميد بدوي]

رسالة الى الرئيس القادم

لا بهتف بأسم السيسى
ولا بسبح بحمد المرشد العام
لجماعةالاخوان
ولا عمرى كنت منافق
ولا عمرى كنت جبان
ولا اعرف اللف ولا الدوران
واللى فى قلبى على لسانى من زمان
واللى مش مصدقنى
يسأل عنى أيام مبارك وجمال
أنا اللى كتبت عن خالد سعيد
وعن السيد بلال
أنا كلمة حق فى زمن النفاق و الطغيان
الشعر مش افعال واوزان
الشعر ثورة الشعر طوفان
الشعر كلمة حق صوت ادان
وأنا كل همى أنى أشوف البلد
لها شكل ووضع وكيان
وتعتمد على نفسها ويبقى لها مكانة ومكان
مش تستلف غداها من الجيران
وتستنى المعونة من الامريكان
ولا يهمنى مين الرئيس اللى جاى مين ما كان
ولكن كل اللى يهمنى هايعمل أية للمواطن الغلبان
اللى بيغمس لقمته بالهم والغم والاحزان
كل اللى بطلبه من الرئيس اللى جاى
أنه يعرف معنى كلمة انسان
ويعرف أن بالحب والعطاء تبنى الاوطان
ويوحد الصف ويرحمنا من حالة التوهان
وياخد البلد لقدام وماينساش أن العدل أساس الملك
والموضوع مش انتقام
ومايكدبش على الشعب وما يكنش بياع كلام
الشعب تعب من الكلام
عايزين امارة عايزين مصر تبقى منارة
بالعلم والعمل والايمان
وكلمة السر هى الانسان
الشاعر
عبد الحميد بدوى

[أبو العلاء]

بوركت جهودك أخي الكريم

لكن الشعر يحلو بموسيقاه

تحاياي

[عبد الحميد بدوي]

اشكرك وتحياتى لك

[love ur life]

الشعر كلمة حق صوت ادان : )
ما أحﻻه من وصف ^^
سلمت يمنااك أستاذي : )