ادخل ولازم تتكلم........!!!!!!

[bosy .. mostafa]

بسم الله الرحمن الرحيم

أسمحولي أتكلم و أقول اللي جوايا , لإني بجد تعبانه اوي , و محدش حاسس بيا
مبدئياً أنا حلم حياتي , و اللي بيراودني من و أنا طفله , هو إني أدخل كلية الطب , و أبقى دكتوره ناجحه , مش عشان الناس بيشوفوا اللي دخل طب ده حاجه مهمه , لأ , لإن عمتي و اللي ربتني في صغري و اللي كانت أكتر واحده بتحبني , ماتت بمرض خبيث كلنا عارفينه , و كان نفسي يومها أساعدها , بس أنا مش دكتوره ولا أفهم حاجه في الطب , فمن يوم ما ماتت و انا املي الوحيد إني ابقى دكتوره متخصصه في الأورام , عشان أساعد الناس , لإني مش قدرت أساعدها
فللأسف أجد الإمتحانات و المجموع و خلافه حائل بيني و بين الهدف ده , مع إني والله بشتغل عشان أحققه و عمري ما حسيت بالتعب و انا بشتغل عشان أحققه , و أنا بدعي ربنا و واثقه انه هيحققه , بس أنا خايفه اوي اني مش احققه , بس ربنا يقدم اللي فيه الخير

و اللي تاعبني أوي اليومين دول , هو إني بحب واحد و متعلقه بيه لدرجة الجنون , و حاسه إنه لو مش بقى ليا انا ممكن اموت أو أتجنن أو يحصل لي حاجه , لإني حاولت أبعد عنه مره , كنت هموت و شوفت الموت بعيني , و المشكله إن نسبة الأمل ضعيفه في الحب ده , و كل يوم قبل ما أنام بقعد أفكر فيه و كتير أوي بلاقي نفسي بعيط عشان هو مش معايا و بيتملكني هم عطيم , و بحاول دايماً إني اكتم مشاعري دي عنه , لإن هو لما صارحته بيها في مره - وندمت بعدها- رد عليا رد غريب جداً و قالي ان اخويا يبقى صاحبه الأنتيم و هو مش يقدر يخون صحبه , فمش راح يقدر يكمل الموضوع , مش فهمت قصده ايه , بس انهرت بعدها اوي اوي اوي , و حسيت إن روحي بتروح مني و اتنقلت المستشفى , و هو مش عرف حاجه عن كده , و اخويا قاله ان حالة الإنهيار ده بسبب الإمتحانات و اتحجج له بكلام غريب , و اصلاً اخويا مش كان يعرف إني رحت و صارحته , بس انا والله مش كان قصدي أبداً إني اتكلم معاه بعدها , كنت بس نفسي اعرف هو بيحبني ولا لأ , لإني مش كنت قادره أكتم مشاعري جوه قلبي أكتر من كده , لإني كنت هموت , بس انا والله بموت من غيره في اليوم أكتر من مليون مره , بحاول أكتم حزني بسبب الحب و التعلق ده عن الناس كلها , و بحاول أنساه بإني املا وقتي , بضاعف وقتي و مجهودي في شغلي في صناع الحياه , و بحضر دروس في المسجد , إني أنساه , مش قادره , أنا فعلاً بحبه ومش متخيله حياتي من غيره أبداً , و للأسف هو مش حاسس بيا , انا والله بحس بيه دايماً , و لو حسيت مره انه متضايق بيبقى متضايق فعلاً , لإنه لما بيتضايق بيكلم أخويا و يطلب منه انهم يخرجوا يتمشوا مع بعض , أنا مش عارفه هو اللي بقى يحب بجد , تبقى نهايته الموت و الجنون !!

انا آسفه إني طولت و نكدت عليكم
بس سامحوني مش قادره استحمل