ايه بقى الوقت ايلي ربنا يستجيب فيه علطووووووووووووول

[Eco esraa feps]

يعني هو ربنا ديما بيستجيب في اي وقت بس في اوقات بقى مخصوص الاجابة بتكون فيها اقوى واسرع باذن الله
زي ايه؟

1/ وقت نزول المطر

2/ تلت الليل الاخير يعني ممكن نقول من الساعه 1 لحد الفجر لو صحيتي دعيتي دعوة ونمتي ربنا هيستجيب علطول

3/ ساعه من يوم الجمعه وقالوا عنها كتير يعني قالوا انها وقت الخطبة بتاعه الجمعه وقالوا انها ف تلت الليل الاخير بس اغلب وارجح الاقوال انها قبل الغروب بساعه والله اعلم احنا نركز في ال3 اوقات دول وخلاص نعمل ايلي علينا

4/ في السجود .. اقرب ما يكون العبد من ربه وهو ساجد فاكثروا الدعاء...

5/ بين الاذان والاقامه دعوة لا ترد

6/ عند ختم القرءان ليكي دعوة مجابة

7/ للصائم عند فطره دعوة لا ترد

8/دعوة المظلوم ليس بينها وبين الله حجاب

9/ دعوة المسافر

10/ دعوة الوالد لولده او عليه مجابة اوعي تدعي على ابنك واوعي تخلي مامتك او باباكي يدعو عليكي ف ساعه غضب ارضيهم علطول الله يكرمك دعوتهم مجابه

11/ الدعوة على اعداء الله مجابه

12/ دعوة الولد لوالده بعد موته مجابة

13/ الدعوة بظهر الغيب ودي جميله اوي //رسُول اللَّه صَلّى اللهُ عَلَيْهِ وسَلَّم كانَ يقُولُ : (دَعْوةُ المرءِ المُسْلِمِ لأَخيهِ بِظَهْرِ الغَيْبِ مُسْتَجَابةٌ عِنْد رأْسِهِ ملَكٌ مُوكَّلٌ كلَّمَا دعا لأَخِيهِ بخيرٍ قَال المَلَكُ المُوكَّلُ بِهِ : آمِينَ ، ولَكَ بمِثْلٍ) رواه مسلم

يعني لو نفسك في حاجه لنفسك طب ما تدعي لغيرك بيها اضمن ع الاقل تلاقي الملايكه تأمن عليكي فهماني

14/ عند كل توبة ليكي دعوة مستجابه كأنها هديه يعني وعند كل طاعه جديده ليكي دعوة مستجابه
يعني مثلا مكنتيش بتصلي الفجر وبقيتي تصلي ليكي دعوة هديه
مكنتيش بتقري قرءان وبقيتي تقري ليكي دعوة
مكنتيش بتذكري الله وبقيتي تذكري ليكي دعوة




طب ايه شروط اجابة الدعوة؟
ايه يا نسمة مانتي قولتي ربنا بيستجيب علطول اومال ايه شروط دي؟

لا دي شروط اساسيه معلش من غيرها مينفعش يستجيب
طب اقري الاول عشان تفهمي

هما 4 شروط
والحديث دا فيه جامع شرطين منهم :
عَنْ أَبِي هُرَيْرَةَ رَضِيَ الله عَنْهُ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: "ادْعُوا اللَّهَ وَأَنْتُمْ مُوقِنُونَ بِالْإِجَابَةِ وَاعْلَمُوا أَنَّ اللَّهَ لَا يَسْتَجِيبُ دُعَاءً مِنْ قَلْبٍ غَافِلٍ لَاهٍ".

اول شرط 1/ اليقين في الاجابة
يعني ادعي وانتي متأكده 100% ان ربنا سامعك وانه هيستجيب زي ماوعدك وافتكري ان الله كريم يستحي ان يردك خائبة وافتكري ان ربنا قال انا عند ظن عبدي بي خليكي حسنة الظن بالله انه رحيم بيكي واحن عليكي من امك

2/ الخشوع في الدعاء
مينفعش تقولي يارب عايزة كذا وكذا وانتي مش مركزة بتتفرجي ع حاجه او بتقولي امين ورا حد وانتي اصلا مش معاه مينفعش
الدعاء له احترام انتي بتكلمي ربنا عيب عليكي


بصي احد الصحابي بيقول ايه : انا اعلم متى يستجيب دعائي !! اذا خشع قلبي وخشعت جوارحي ودمعت عيني اقول سيستجيب الله لي
هي دي حالة الخشوع ايلي المفروض تكوني فيها وانتي بتدعي
ومش صعبة توصليلها ولا حاجه بالعكس
انتي مجرد ما تدعي من قلبك بجد هتعيطي وتحسي بخشوع فظيع وراحه نفسية غريبة


عدم الاستعجال في الاجابة
3/ الشرط التالت النبي صلى الله عليه وسلم قال: (يستجاب لأحدكم ما لم يدع بإثم أو قطيعة رحم وما لم يستعجل، قيل: وكيف الاستعجال؟ قال: يقول دعوت ودعوت فلم يستجب لي، فيتحسر عند ذلك ويترك الدعاء).



الناس ايلي تقعد تدعي ربنا كتييييييييييييييييييييييييييير وف الاخر ف لحظه يضيعوا كل دا ويقولوا ربنا مستجابش ليه ربنا اتاخر ليه انا اكيد وحش اكيد فيا حاجه غلط اكيد ربنا مش راضي فيسيب الدعاء وييئس
مع ان كان ربنا خلاص هيستجيب
ضيعت نفسك ليه
استعجلتي ليه وبتستعجلي علطول ليه مش يمكن ربنا عايز يسمع صوتك؟
( يا جبريل أدعاني عبدي، نعم يا رب، يا جبريل أخِّر مسألة عبدي فإني أحب أن أسمع صوته

يعني المفروض تفرحي لو ربنا اتاخر عليكي شويا مش تزعلي وتسيبي الدعاء!!!!


4/ رابع شرط اكل الحلال
لو مالك حرام مش هيستجيب ابدا
عشان كده بننصح بالصدقة علطول عشان حتى لو فيه شبهه حرام وانتي متعرفيش الصدقه تطهر مالك علطول ان شاء الله



اخر حاجه بقى
اداب الدعاء

1/ الوضوء ان امكن يعني مش فرض بس يستحب

2/ استقبال القبله ان امكن برده

3/ رفع اليدين عند الدعاء مينفعش ادعي وانا ايدي ف جيبي مثلا او حاطه رجل على رجل

4/ ابدئي بحمد الله وبعدها الصلاة على النبي عليه الصلاة والسلام
عَنْ عُمَرَ بْنِ الْخَطَّابِ رضي الله عنه قَالَ : ( إِنَّ الدُّعَاءَ مَوْقُوفٌ بَيْنَ السَّمَاءِ وَالأَرْضِ ، لا يَصْعَدُ مِنْهُ شَيْءٌ حَتَّى تُصَلِّيَ عَلَى نَبِيِّكَ صَلَّى اللَّهُ عَلَيْهِ وَسَلَّمَ )


5/ استغفري الله وبعدين ابدئي بقى ادعي ومش لازم صيغه محدده ولا لازم اللغه العربية الفصحى والكلام دا
ادعي بايلي ييجي ف بالك ويطلع من قلبك وخلاص وألحي في الدعاء يعني اتحايلي على ربنا خليكي زنانه كل شويا ربنا بيحب الملحين في الدعاء اووووووووووووووووي


بصي بقى الحديث القدسي دا
أَرْبَعٌ بَيْنِي وَبَيْنَ عَبْدِي ، وَاحِدَةٌ لِي ، وَوَاحِدَةٌ لَكَ ، وَوَاحِدَةٌ فِيمَا بَيْنِي وَبَيْنَكَ ، وَوَاحِدَةٌ فِيمَا بَيْنَكَ وَبَيْنَ عِبَادِي ، فَأَمَّا الَّتِي لِي ، فَتَعْبُدُنِي لا تُشْرِكُ بِي شَيْئًا ، وَأَمَّا الَّتِي لَكَ فَمَا عَمِلْتَ مِنْ خَيْرٍ جَزَيْتُكَ بِهِ ، وَأَمَّا الَّتِي بَيْنِي وَبَيْنَكَ ، فَمِنْكَ الدُّعَاءُ وَعَلَيَّ الإِجَابَةُ ، وَأَمَّا الَّتِي بَيْنَكَ وَبَيْنَ عِبَادِي ، فَارْضَ لَهُمْ مَا تَرْضَى لِنَفْسِكَ "



يا بنات فوئوا بقى احنا كلنا مشاكل وهموم ووجع قلب يلا نتقرب من ربنا شويا
مش معقول يكون ربنا حنين كده وكريم كده واحنا مغمضين ومش واخدين بالنا من كل دا مش معقول نعمل في نفسنا كده
مش معقول يكون ربنا بيحبنا الحب دا واحنا حتى مش قادرين نصحى عشان نصلي الفجر وبنفضل النوم عليه
مش معقول يعاملنا كده واحنا نعامله كده
انا مش عارفه احنا ازاي كده بعد كل الكرم دا
تفتكروا احنا نستاهل؟؟

دانا اوقات اقعد والله مش بطيق نفسي واقول ايه دا ازاي ربنا مستحملني وبيعديلي كده اخطاء في حقه كتير وازاي ربنا مستحمل الناس دي كلها ايه دااااااااا سبحان الله هو ربنا رحيم وكريم للدرجه دي ! دانا لما قعدت افكر ف حالي لحظات واني اوقات بغلط في حق ربنا مستحملتش نفسي اقسم بالله وقرفت من نفسي وقولت ياااااااااه لو ربنا هو كمان ميستحملنيش والله دانا اضيع
احمدي ربنا انه مستحملك واحمدي ربنا انه بيسامحك رغم غلطاتك الكتير المتكرره
اتقربي منه دا حبيبك والله هتضيعي من غيره يابنتي ميستاهلش منك كده ابدا


بصي انتي دلوقتي مش صغيرة
وعرفتي شروط اجابه الدعوة وامتى ربنا بيستجيب واداب الدعاء واد ايه ربنا كريم وبيحب يسمع صوتك واد ايه ربنا بيحب انك تلحي وتدعي وانك لازم وانتي بتدعي تركزي وتخشعي ومتقوليش من جواكي ربنا ممكن ميستجيبش لالالالالالا ربنا هيستجيييييييييييييييييييييييب قولي كده


يلا انطلقي وقولي وعجلت اليك ربي لترضى وخلي ربنا يشوفك ويفرح بيكي وانتي بتدعي صح وانتي بتحبي الدعاء

قولي يارب انا دعيتك زي ما امرتني فاستجب لي يارب كما وعدتني ووعدك حق

قولي يارب مليش غيرك اروحله واقف على بابه حقك عليا بغلط كتير بس برده مش هيئس من رحمتك ابدا وهفضل ادعي لحد ما اموت ومتاكده انك هتستجيب حتى لو اخر يوم ف عمري





الواجب

1/كل بنوتة مننا
تقرا المحاضرة دي مطلوب منها تكتب هنا ف الجروب الامنيات ايلي بتطلبها من ربنا وتتمنى تحصل اوي


2/ بالاضافه لتقرير الصلاة والذكر هنضيف الدعااااااااااء وهنحط عليه 10 درجات
مفيش يوم يعدي غير لما تدعي مليش دعوة سواء لنفسك او لغيرك بظهر الغيب

خصصي كده ف يومك وقت للدعاء ممكن تعمليه في كل سجده ممكن بين الاذان والاقامه ممكن قبل الفجر ممكن وانتي بتصلي الفجر ممكن قبل ما تنامي تقعدي كده مع نفسك لوحدك وتدعي بايلي نفسك فيه


متنسوش يابنات يوم الخميس باذن الله بعد بكرا معادنا في مسابقة جزء عم الله يكرمكم متحبطونيش مش عايزة اتصدم ربنا يسعدكم يارب مش بحب الامر الواقع ايلي عندها عذر تقول متتكسفش مني عادي وانا هتصرف لكن ان يوم الخميس ييجي وملاقيش الا قليل دخلوا لا مش هسامحكم فيها ابدا معلش منقول بس حبيت اجيبهولكم تستفيدوا بيه)

[samar tawfik ali]

بارك الله فيكى
شكرااااااااااااااااااااااااااااااااااااااااااااااا ااا

[alea2009]

جزاكى الله خيرآ على هذا الموضوع الرائع.

[هالة محمد 2]

ربنا يتقبل من الجميع

ويحقق لكل شخص امنيته وحلمه

جزاكى الله خيرا

[شذى العطر]

جزاكي الله كل خير
بس اعتقد الموضوع ده ميخصش البنت المسلمة بس والشاب والكبير والكبيرة وكله عشان كده مفروض يكون في قسم حي على الفلاح

[singer111]

شكرا جزيلا

[عمران جابر مهني]

جزاكي الله خير الجزاء يا نسمة

[Ra2fat Jego]

جزاك الله خيرا على الموضوع القيم

[..: Pink rose :..]

جزاكي الله خيرااا

[توته حداد]

جزاكي الله كل الخير أختي الفاضلة

[تغريد الطيور]

بجد موضوع اكتر من رائع و جه ف وقته بجد ..

ربنا يكرمك يااااارب يا اسراء و يجازيكى كل خيييييييير

[NeVeR CoMe BacK]

جزاكى الله كل خير بس اسلوبك فى الكلام عن ربنا مش عاجبنى شوية (حقك عليا - مستحملنى ) بيتهيقلى يعنى مينفعش ولا ايه ؟ !
شكراااااا ويارب ربنا يستجيب كل دعواتنا امين يارب امييييين

[مروة محمد فراج]

موضوع جميل جداجداجداجداجداجداجدا
ربنا يجازيكى كل خير

[Hanan Hamdy]

جزاك الله خيرا أختى الكريمة
ولو حد مثلا بيقول إن ربنا مش هيستجيب له علشان ذنوبه
يفتكر إن ربنا استجاب لمن هو أبشع منه
فقد استجاب الله للشيطان حينما قال
" قَالَ رَبِّ فَأَنْظِرْنِي إِلَى يَوْمِ يُبْعَثُونَ"
فاستجاب الله
"قَالَ فَإِنَّكَ مِنَ الْمُنْظَرِينَ إِلَى يَوْمِ الْوَقْتِ الْمَعْلُومِ"

مما سبق نستنتج أنه مهما عصينا ربنا لا نقنط من رحمته كما قال الله تعالى
"وَلاَ تَيْأَسُواْ مِن رَّوْحِ اللّهِ إِنَّهُ لاَ يَيْأَسُ مِن رَّوْحِ اللّهِ إِلاَّ الْقَوْمُ الْكَافِرُونَ"


ولكن لا يفتح لنا هذا الكلام باب الجرأة على الله ولكن باب الرجاء فى الله

[Hanan Hamdy]

وإكمالا لمسيرتك أختى الفاضلة أحب أن أضيف وقتا آخر يستجاب فيه الدعاء
فنحن كثيرا ما نقلق فى الليل فنستيقظ ثم ننام
ولو علمنا فضل هذه اللحظة ما نمنا
أنا مش بقول مانمش
بس هو الدعاء مش هياخد من وقتك دقيقتين
قول الدعاء ده وبعدين اطلب اللى عايزه وبعدين ربنا إن شاء الله هيستجيب لك
ده مش كلامى ده كلام الرسول (صلى الله عليه وسلم)
حدثنا صدقة بن الفضل أخبرنا الوليد هو ابن مسلم حدثنا الأوزاعي قال حدثني عمير بن هانئ قال حدثني جنادة بن أبي أمية حدثني عبادة بن الصامت عن النبي صلى الله عليه وسلم قال من تعار من الليل فقال لا إله إلا الله وحده لا شريك له له الملك وله الحمد وهو على كل شيء قدير الحمد لله وسبحان الله ولا إله إلا الله والله أكبر ولا حول ولا قوة إلا بالله ثم قال اللهم اغفر لي أو دعا استجيب له فإن توضأ وصلى قبلت صلاته