الثانوية العامة مش نهاية الكون

[daliakhaled95]

السلام عليكم و رحمة الله و بركاته

انا بكتب لكم هنا من الأكونت دا اللى يخص بنت اخويا عشان اولا اقول الف مبروك لكل الناجحين و ثانيا عشان بس اقولكم نصيحة مهمة جدا انا من كام سنة كدا تحديدا سنة 1997 كنت زيكم بالضبط و كنت جايبة مجموع عالى الحمد لله و دخلت كلية هندسة و كنت معتقدة خلاص الثانوية العامة هى نهاية كل حاجة و مفيش بقى مذاكرة و انا كدا اثبت نجاحى و كفاية انى هيتقالى يا بشمهندسة بس اكتشفت حاجة مهمة جدا و ارجو كل واحد منكم يفكر فيها كويس ..اول حاجة انت عايز تبقى ايه؟؟؟هل الكلية اللى انت هتدخلها دى مع ميولك و لا لأ؟؟؟و دا طبعا فى مرحلة الأختيار و اعرف كويس قوى ان دا مستقبلك انت مش داخل الكلية عشان تاخد لقب دا هيبقى مستقبل حياتك كله هيبقى المهنة اللى انت هتمارسها و لازم تنجح فيها ..انا فاكرة كويس ان كان لينا جار اجبر ولاده الأتنين عشان يدخلوا طب و كانت النتيجة مأساوية شخصيات مهززوزة بينجحوا بالعافية و بعد ما اتخرجوا متثقش ان حد فيهم يقيسلك الضغط حتى ؟؟؟!!و نفس الكلام انا شفته فى هندسة احنا كان معانا ناس بتعافر و تاخد السنة فى اتنين و تعبوا جدا جدا ...الخلاصة من الرغى دا اختار طريقك و استخير ربنا و توكل على الله و اللى داخل منكم طب او هندسة لازم يعرف انه مش داخل يدلع الكليات دى عايزة شغل و عايزة حد بيحبها عشان ميزهقش و يتعب و عايزة التزام و ربنا يوفقكم جميعا يارب