قصه صلاتى مع الرئيس (بقلمى الخاص)

[تامر الطويل]

قصه صلاتى مع الرئيس
.............................



المكان مرسى مطروح
الزمان يوم الجمعه الموافق 19/10/2012الساعه 11.5 صباحا
الهدف الصلاه فى الجامع الجديد الذى سوف يفتتحه الرئيس محمد مرسى ويصلى فيه
...............................
البدايه
صحيت من النوم الصبح وانا متردد ياترى اروح اصلى فى الجامع اللى الرئيس هيصلى فيه ولا انفض واروح اصلى فى الجامع القريب من البيت احسن وبلاش تعب وزل ،
قولت فى نفسى اكيد علبال ما ادخل الجامع هكون اتفتشت قد 20 مرة من الحرس ، وبعد مشاورات مستمرة مع عقلى قررت قرار خطير جدا وهو انى انزل اصلى فى الجامع مع الرئيس
وقولت فى نفسى اهو برضوا ابقه شوفت رئيس بلدى لا يف لأول مرة من ساعه امى ما ولدتنى وفى نفس الوقت قولت اتفرج على الحرس وطريقه الحراسه ، اللى الرئيس قال انه مش بيحب الحراسه الكتيره حوليه ،
وفعلا لبست اللى على الحبل وحطيت جل فى شعرى وسرحت قد 13 مرة وحطيت برفان ولبست شبشب صيفى وده لهدف وهو انى لو اتزنقت وسط الناس ومعرفتش ألحق الشبشب ابقه مخسرتش
كتير ده مجرد شبشب صيفى ب 35 جنيه وكله فداك ياريس ، ركبت التاكسى وقولتله ودينى الجامع اللى جمب المكتبه الجديده اللى هيفتتحها الرئيس وعلى فكرة المكتبه سابقا كان اسمها مكتبه مبارك
واتغير اسمها بعد كده لمكتبه مصر ( عمار يامصر يامغيره الاسامى والاماكن هى هى زى اللى بالى بالك ربنا يبعدنا عنهم ) مكتبه ضخمه بالفعل واكيد هيدخلها قد 8 افراد فى السنه غير الرحلات بتاعه المدارس
اللى هتدخلها مش علشان القرائه لاء هتدخلها علشان تتفسح فيها وتتفرج على الديكور الجميل اما القرائه ووجع الدماغ ده فله ناسه من النخبه المثقفه اما الغلابه اللى معظمهم من المصرين كل همهم الاكل والشرب والعلاج والتعليم وجايز التعليم مابقاش همهم لان كل المتعلمين مش لقين شغل حاليا وقعدين على القهاوى فى انتظار فرصه او مسابقه للاغانى او مسابقه يكسب منها فلوس ويحقق بيها احلامه إللى عمرها ماهتتحقق طول ما بلاده وحكومته سيبه خيرها لغيرة ، فمعظم الناس دلوقتى صبت اهتمامها على عمل أطفلهم من الصغر وده لانهم من وجهه نظرهم بيقدموا لاولادهم اللى اهم من التعليم وهو الصنعه اللى هتوكلهم الشهد
المهم خلينا فى موضوعنا احنا وقفنا لحد فين ... اه لحد اما قولت لسواق التاكسى و دينى الجامع اللى جمب المكتبه الجديده اللى هيفتتحها الريس فبصلى السواق من تحت لفوق كده وقالى انت رايح تصلى فى الجامع بتاع مرسى ،فقولتله هو الجامع بقه بتاع مرسى ، الجامع لكل الناس وبعدين كتر خير الراجل انه افتكر مرسى مطروح واهلها بالزياره ، فبصلى الراجل نظرة انت اهطل وقالى يعنى عجبك اللى عمله المحافظ فى البلد علشان زياره مرسى ،فقولتله عمل ايه ، فقالى شال المطابات الصناعيه من الشوارع ونضف البلد ورصف طريق مرصوف بالفعل كل ده علشان الرئيس ، وانا بقالى شهور بجرى وراء مجلس المدينه والمحافظه علشان يرصفولنا الطريق فى (علم الروم ، مكان فى مطروح) قدام بيتى ويسلكونا بلاعه الصرف الصحى اللى بهدلتنا انا وعيالى ولا حد عبرنى وقال ايه بيقولولى ادفع نصف تمن الرصف واحنا النصف ونرصفلك الطريق وانا مالى بس هو انا كنت الحكومه ، بصتله بصه وحياه امك وقولتله فى سرى ، يعنى عندك بيت وكمان مش عجبك فى غيرك معندوش حتى البيت يسكن فيه ويتمنى يدخله الصرف الصحى حتى لو يضرب كل يوم ويغرق الشارع بس يشوفه دخل قبل ما يموت ، وفوقت من كلامى فى سرى على صوته بيقولى وصلنا ياباشا ، بصيت حوليا لقتنى لسه موصلتش للجامع اللى كنت عايز اروحه فبصتله وقولتله ، ايه يااسطى احنا لسه موصلناش فبصلى وقالى بقرف ، وانا اعملك ايه ياعنى الطريق مقفول علشان موكب الرئيس واديك شايف الامن المركزى واقف وقاطع الطريق ، فبصتله بصت واحد مصدوم وقولتله خلاص هنزل ومنك لله ياانا يالى قولتلى روح صلى فى الجامع اللى هيصلى فيه الرئيس وفعلا نزلت وميت اتفرج على عساكر الامن المركزى اللى موجودين بكثرة لم اشاهده فى حياتى ولما وصلت لأخر الشارع لقيت الامن المركزى واقف قاطع الطريق على ناس كتير زى عقلهم الجزمه صورلهم ان المشوار للصلاه سهل المهم وقفنا الامن المركزى وقالنا ظابط رتبه ياجماعه موكب الرئيس هيوصل دلوقتى ومينفعش حد يعدى خلاص وفعلا لحظات وعدى موكب الرئيس اللى كان عباره عن 6 عربيات شروكى سوداء وكام عربيه ملاكى تقريبا 8 مختلفه الالوان وعربيه رصاصى على ما اعتقد انها عربيه الرئيس محمد مرسى وعربيتين صاعقه وعربيه اسعاف وعربيه تانيه كبيره مش عارف بتاعه ايه والناس هتفت الرئيس اهوة محمد مرسى قائد النهضه اهوة وفاجاه هجمت جمع المواطنين واخدونى وسطهم على الحصار اللى كان عمله عساكر الامن المركزى واخترقوة وعدوا الحاجز ، وفاجاه لقيت نفسى قدام الجامع اللى بيصلى فيه الرئيس اوصفلكم المكان بقه الاول
وصف المكان
اول مادخلت لقيت ناس كتير قوى وقفه وبوابات ألكترونيه من بتاعه كشف المعادن واحده على باب المسجد الرئيس و واحده على الباب الثانى للمسجد ولقيت باب المسجد مقفول و واقف قدامه يجى 20 واحد لابس بدله ونضاره سوده شكلهم حرس الرئيس ولقيت ساحه قدام المسجد فيها ناس كتير قوى دخلت وسطهم بالعافيه وانا داخل لقيت شباب واقف وعمله كردون محوطين بيه الساحه انا افتكرتهم جاين يصلو فى الاول وبعدين إكتشفت إنهم عساكر ولبسين مدنى عددهم كتير قوى يجى 100ولقيت عربيتين مدرعه وفيهم عساكر صاعقه ولقيت قدام باب المسجد الرئيس عساكر صاعقه واقفين ومعاهم عصيان ولبسين خوزه حمراء محوطيت باب الجامع بكردون تانى بعد رجال الحرس ومن بره على الكورني لان الجامع قصاده الكورنيش فى كل خطوه تلاقى عسكرى امن مركزى ومعنى فى كل خطوة يعنى كل 2 متر وجنود من مركزى واقفين سادين الشارع الرئيس اللى يدخل على الجامع

هو ده الوصف للساحه وللحراسه من خارج الجامع

بعد ماوقفت اتفرج وافتكر كلمت الرئيس وإنه مابيحبش الحرس حوليه أضحك وابص للحراسه واضحك
وقعدت صليت ركعتين وبعد ماصليت لقيت ظابط رتبه بيزعق لشاب عرباوى من اهل مطروح كان واقف فوق مبنى قصاد الجامع وبيأمرة إنه ينزل والشاب راسه وميت جزمه إنه مش هينزل وبيقول للظابط الرتبه مش هنزل وكبيرك إعمله خلانى وخلى الناس كلها واقفه متنحه ومستغربه الموقف وفاجاه لقيت مظاهرة جايه من على الكورنيش وشايلين يفط مكتوب عليها اهل الضبعه فى خطر مميت / فين وعودك ليا ياريس / ارض جدودنا مش هنسبها / ويسقط يسقط المحافظ / ومن اليفط دى فهمت انهم من اهل الضبعه وجاين علشان موضوع المحطه النوويه فى الضبعه والمشكله بتاعه الاراض وبرضه انهم جاين علشان مش عايزين المحافظ بتاع مطروح ،،صرخ الظابط لما لقاهم هجمين على الساحه اللى قدام المسجد وقال عساكر وفاجاه

نط العساكر اللى محوطين الساحه الشباب اللى كانوا لبسين ملكى وقالوا تمام يافاندم فبصلهم الظابط بغضب وقالهم مكانك ياعسكر انت وهو محد يتحرك من مكانه وفعلا فى غمضه عين رجع الشباب مكانهم محوطين الساحه بالمصلين وهجم عساكر الامن المركزى وحوطوا المتظاهرين وعملوا حوليهم كردون حراسه و وقف المتظاهرين يهتفوا وانا بقيت اصور بالموبيل ( المهم )
قام الشيخ الصلاه وصلينا وبعد الصلاه قام سياده الرئيس محمد مرسى وقال كلمه فيها شكر وتحيه لأهالى مطروح الكرام وطلب منهم انهم يحضروا شكاويهم وقال إنهم هيخدها منهم بنفسه ، طبعا انا قولت فى بالى هو هيشتغلنا ولا ايه هياخد الشكاوى بإديه ولحظات وخرج الرئيس محمد مرسى من الجامع واول ماشافه المصلين فى الساحه قعدوا يهتفوله بعبارات جميله كلها محبه ومد فعلا الرئيس محمد مرسى إديه واخد من الناس الشكاوى وسط دربكه من الحرس بتوعه وكأنهم ماكنوش متوقعين إنه يمد إديه فعلا للناس وياخد شكاويهم بإديه ( ساعتها انا دعيت للرئيس محمد مرسى بإن ربنايكرمه زى ماهيكرم الناس الغلابه اللى قدمت له شكواهم واخدها بإديه ومعتمدش على اى حد غيرة فى لم شكاوى الناس وطلابتهم

وركب الرئيس العربيه وسط هتافات اهالى مطروح وإتحرك الموكب واول ما الموكب بداء يتحرك وعدت عربيه الرئيس وعربيتيت الحراسه اخترق الناس الكردون اللى كان عمله عساكر الامن المركزى وجريوا وراء عربيه الرئيس ومنعوا باقى العربيات من المرور ومشيت بسرعه معاهم اشوف ايه هيجرى وعلى الكورنيش وانا ماشى وسط الناس وعربيات الحراسه والصاعقه بتعدى براحه من وسطنا بتحاول تلحق عربيه الرئيس بصيت لقيت الناس بتهلل وبتجرى فببص لقيت الرئيس محمد مرسى نازل من العربيه وبيحرك اديه للناس واول ماالحرس شاف الناس جايه من بعيد على الرئيس ركبته العربيه وحولت تجرى بسرعه بس كان الاطفال العرب اتشعلقوا فى العربيه وكأنهم بيقولو للرئيس فاضى ياأسطى وبعد محاولات من الناس والحرس إنهم ينزلوهم نزلوا وجريت العربيه بالرئيس

ولما مشيت عربيه الرئيس هتف الناس يسقط يسقط المحافظ واتجهوا على المحافظه

وروحت بيتنا مشى وطول ما انا ماشى اقابل عسكرى امن مركزى واقف لحد موصلت بيتنا ورميت نفسى على السرير من التعب وقولت فى نفسى بجد الرئيس محمد مرسى لو إستمر على إنه مايحطش حواجز بينه وبين شعبه أكيد هيكون محبوب من الكل زى اهالى مطروح مابتحبه

اللى اكتشفته فى اليوم ده ان الرئيس كان فعلا زى ما تمنيت انه يكون ، مش مجرد رئيس لمصر الرئيس لازم يكون حاسس بشعبه من خلال لقائه المباشر بيه ( تحيا مصر ) ويعيش رئيس جمهوريتنا مادام مخلصا لوعوده ولا يضع حواجز بينه وبين شعبه ولا ينظر اللى مصلحه جماعه او حزب وإنما ينظر إلى مصلحه مصر فقط مصر وأهلها

النهايه
20/10/2012

بقلمى
تامر على الطويل
امير الجروح

[مريم السباعى.]

بص بعيدا عن وجهة نظرى فى الرئيس محمد مرسى
فسردك للموضوع رائع
فانت عاشق لتفاصيل بشكل مبدع
دام ابداعك
ومنتظرين جديدك دائما

[نحلة المنتدى]

تسلم ايدك يا تامر قصه حلوه
وربنا يخليلنا الرئيس ياااااارب

[تامر الطويل]

المشاركة الأصلية كتبت بواسطة مريم السباعى.

بص بعيدا عن وجهة نظرى فى الرئيس محمد مرسى
فسردك للموضوع رائع
فانت عاشق لتفاصيل بشكل مبدع
دام ابداعك
ومنتظرين جديدك دائما

ربنا يخليكى يارب اختى الغاليه وللاسف اتضح ان الرئيس مش رئيس كل المصرين ده رئيس اهله وعشيرته وبس

المشاركة الأصلية كتبت بواسطة نحلة المنتدى

تسلم ايدك يا تامر قصه حلوه
وربنا يخليلنا الرئيس ياااااارب

نورتينى اختى الغاليه

[*HOPES*]

رراااااااااائعه

[عبدالرحمن محمد فؤاد]

السلام عليكم و رحمة الله و بركاته
-------------------------------------
تــــذكــــــر ـ بأن لك في الحياة رسالة أنت مؤديها ستحاسب على إضاعتها و ستجزى إن نفذت معانيها ๕ تــــذكــــــر ـ أنك تتعلم معنى المسؤولية في الصغر وبعدها ستتحملها و تعمل بها وسيكون عليك في النهاية تلقينها لغيرك