استفسار عن الالتحاق بوظيفة مدرس بالازهر

[elbeltagy]

السلام عليكم ورحمة الله وبركاته
انا خريج كلية الاداب قسم لغة انجليزيه بتقدير جيد
وعايز التحق كمعلم للغة بالازهر الشريف
ممكن لو تكرمتم تعرفونى التقديم بيبقى مفتوح امتى وازاى التحق بالعمل فالازهر لو تكرمتم اخوانى الكرام؟
وشكرا

[sheko yusef]

التقديم لما بينزل بينزل في جريده الازهر وحاليا بياخدوا ابناء الازهر

[الاستاذ عوض على]

ممكن حضرتك تسأل عن بعض المسئولين عن المعاهد المنضمة
وتدفع له مبلغا من المال
ليتم تعيينك سريعا مع العمالة المنضمة لهذه المعاهد
لأن تقدير حضرتك جيد فقط ومن الصعب جدا أن تعمل من خلال المسابقات العادية

[Mohammad Fawzy]

المشاركة الأصلية كتبت بواسطة elbeltagy

السلام عليكم ورحمة الله وبركاته
انا خريج كلية الاداب قسم لغة انجليزيه بتقدير جيد
وعايز التحق كمعلم للغة بالازهر الشريف
ممكن لو تكرمتم تعرفونى التقديم بيبقى مفتوح امتى وازاى التحق بالعمل فالازهر لو تكرمتم اخوانى الكرام؟
وشكرا

اذهب الى المنطقة الازهرية فى محافظتك واسال عن اى مسابقات او تعاقدات حالية واذا لم تجد اسال عن نظام العمل بالحصة لانك ممكن تتعاقد بعد كدة او حتى تتثبت على طول، وتابع فى نفس الوقت جريدة صوت الازهر الاسبوعية كل يوم جمعة (بجنيه واحد) وتابع على مواقع الازهر وهنا ايضا وربنا هيوفقك ان شاء الله المهم ان تثق بالله

[Mohammad Fawzy]

المشاركة الأصلية كتبت بواسطة الاستاذ عوض على

ممكن حضرتك تسأل عن بعض المسئولين عن المعاهد المنضمة
وتدفع له مبلغا من المال
ليتم تعيينك سريعا مع العمالة المنضمة لهذه المعاهد
لأن تقدير حضرتك جيد فقط ومن الصعب جدا أن تعمل من خلال المسابقات العادية

اسمح لى استاذ عوض

يقول الله - تعالى -: "سماعون للكذب أكّالون للسحت". قال ابن مسعود: السحت: الرشا.
وجاء عن أبيّ قال: لعن رسول الله الراشي والمرتشي. وفي رواية ابن عمر والرائش.
ويروى عن رسول الله كما في مسند أحمد أنه: (ما من قوم يظهر فيهم الرشا إلا أخذوا بالرعب).
وقال ابن مسعود الرشوة: في الحكم كفر، وهي في الناس سحت.
وقال علي - رضي الله عنه -: (السحت الرشوة).
وقال عمر بن عبد العزيز - رضي الله عنه -: كانت الهدية في زمن رسول الله هدية واليوم رشوة.
وعن ابن مسعود قال: السحت أن يقضي الرجل لأخيه حاجة فيهدي إليه هدية فيقبلها.

[amiraali]

اخى الفاضل
نصيحة لوجه الله من اخيك له نفس ظروفك وتم تعينى بالازهر الشريف لا تقع فى نفس الخطا لو انتظرت قليلا لتاخذ فرصتك فى التربية والتعليم لهو افضل لك فنحن نشعر بالاضطهاد فى الازهر وخاصة المواد الثقافيه اولا من السادة القائمين على الازهر فانت ليس لك الحق ان تكون رئيس لجنه ولا شيخ معهد ويقولون عنا اننا نصارى الازهر ومادتك مهمله يوم الامتحان تقوم على غير
رغبتك بتغشيش الطلاب والا تصبح من المغضوب عليهم بالاضافة الى نظرة الناس الى مدرسين الازهر حتى ولو كنت اكفا من ناس كتير فى التربيه والتعليم . يمكن كلامى مايعجبش ناس كتير لكنها الحقيقه

[Mr...Ahmed]

بلاااااااااااااااااش تغلط غلطتى يا صاحبى
اصبر ف التربية والتعليم ولو بالحصة عشان حتكره نفسك وحتنسى الانجليزى من اساسه عشان حتى الموجهين مستوياتهم مضروبة بالنار والعيال تحس انهم بياكلو طينة والانجليزى ده بالنسبالهم لوغارتمات
انا نصحتك اهو ومتقوليش امال انت شغال فيه ليه .. عشان انا غلطت غلطة عمرى وسبت تعاقد التربية والتعليم وجيت لتثبيت الازهر معاهد منضمة زى ما الاستاذ عوض قال

[Mr...Ahmed]

المشاركة الأصلية كتبت بواسطة mohammad fawzy

اسمح لى استاذ عوض

يقول الله - تعالى -: "سماعون للكذب أكّالون للسحت". قال ابن مسعود: السحت: الرشا.
وجاء عن أبيّ قال: لعن رسول الله الراشي والمرتشي. وفي رواية ابن عمر والرائش.
ويروى عن رسول الله كما في مسند أحمد أنه: (ما من قوم يظهر فيهم الرشا إلا أخذوا بالرعب).
وقال ابن مسعود الرشوة: في الحكم كفر، وهي في الناس سحت.
وقال علي - رضي الله عنه -: (السحت الرشوة).
وقال عمر بن عبد العزيز - رضي الله عنه -: كانت الهدية في زمن رسول الله هدية واليوم رشوة.
وعن ابن مسعود قال: السحت أن يقضي الرجل لأخيه حاجة فيهدي إليه هدية فيقبلها.

بالراحة بس يا عم محمد الله يكرمك
انا معاهد منضمة واحب اقولك ان اللى انا دفعته انا وغيرى اتبنى بيه للمعهد دور تانى مش موضوع رشوة ومش رشوة وبعدين احنا امتحنا اكتر من 3 مرات ومن ضمنهم امتحننى مستشار فى اللغة الانجليزية وعصرنى والحمدلله نجحت ف ال 3 مرات

[Mohammad Fawzy]

المشاركة الأصلية كتبت بواسطة mr...ahmed

بالراحة بس يا عم محمد الله يكرمك
انا معاهد منضمة واحب اقولك ان اللى انا دفعته انا وغيرى اتبنى بيه للمعهد دور تانى مش موضوع رشوة ومش رشوة وبعدين احنا امتحنا اكتر من 3 مرات ومن ضمنهم امتحننى مستشار فى اللغة الانجليزية وعصرنى والحمدلله نجحت ف ال 3 مرات

بالراحة يا باشا وكل حاجة بس هل استلمت ايصال مثلا بالمبلغ اللى دفعته؟ هل فى حاجة تثبت ان الفلوس دى رايحة للازهر؟ هل دفع الفلوس دى اصلا قانونى؟ طبعا الاجابة لأ لانها بكل بساطة رشوة وملهاش اسم تانى للاسف ولو جه حد ودفع فلوس اكتر كان زمانه مكانك

مش مثالى انا ولا بدعيها بس فى نفس الوقت الدنيا كلها عارفة ان الشغل فى المعاهد المنضمة بالفلوس للاسف، وكلامى او توصيفى للفلوس اللى بتندفع مش هيغير حقيقتها والحل لازم يجى من فوق

[elbeltagy]

المشاركة الأصلية كتبت بواسطة sheko yusef

التقديم لما بينزل بينزل في جريده الازهر وحاليا بياخدوا ابناء الازهر

كنت اتمنى من الله انى اشتغل كمدرس لأنى خريج من سنه وعندى كورسات معتمده من شركات دوليه وحكوميه فاللغة الانجليزية وعلشان احافظ على مستوايا كمان.
انما الخيرة فيما اختاره الله

[elbeltagy]

شكراً يا جماعه على مشاركتكم ليا
وبــــــــــــــــــــــــــــــارك الله فيكم اجمعين