ما فائدة درس المشتقات فى الحياه العملية ؟؟

[Ne7NeS]

بسم الله الرحمن الرحيم
السلام عليكم ورحمه الله وبركاته اعضاء المنتدى الكرام


لدى مشكله تجعلنى اشعر انى حافظ مش فاهم

بدون مقدمات حتى لا اطيل عليكم مشكلتى مع درس (المشتقات)

انا الحمد لله فاهم القواعد وبعرف احل مسائلها و 10/10
بس مع انا مش عارف انا بعمل كده ليه ؟؟

مثلا الهندسه اتعلمتها عشان اعرف اتعامل مع الرسوم واوجد الزوايا والأطوال وما الى ذالك
الجبر عشان دراسه العلاقات بين المتغيرات وكيفيه التعامل معاها بإحترافيه
النهايات عشان اقدر اتعامل مع الكميات الغير معينه واعرف اعينها
وكل اللى انا بتعلمه دايماً مرتبط بالباقى وده اللى بيخلى الرياضيات ماده جميله جداً


درس المشتقات ده الإستفاده منه فى إيـــه

لما اجيب متوسط التغير ولا معدل التغيير لداله استفدت انا إيـــــه ؟؟؟؟
ايه المعلومه اللى انا كسبتها ؟؟؟

وليه سمهوها بالمسميات دى (متوسط التغير - معدل التغير )

انا اعرف ان المتوسط ده بيبقى عباره عن قيمه بتتوسط حاجه زى السرعه المتوسطه القوه المتوسطه كده
فين بقى القيم اللى متوسط التغير ده بيتوسطها


اعرف ان المعدل ده هو تغير حاجه بالنسبه للزمن او بالنسبه لحاجه تانيه
ومعدل التغير ده بنجيبه لما هـ تؤول للـ0 يعنى مفيش تغيير
يبقى فين المعدل وفين التغيير فى الموضوع



وللأسف كل ما اسأل حد احنا بنعمل الكلام ده كله ليه يقعد يتكلم كتير واللى بفهمه منه فى الآخر :-

هاذا ما وجدنا عليــه آبائنا واجدادنا
كان نفسى احط صوره ابو لهب لما كان بيقولها فى فيلم الهجره بس المنتدى بيمنعنى انى احط روابط قبل 25 مشاركه


بإنتظار رد اساتذتى وزملائى الأعزاء على إستفسارى حول فائدة درس المشتقات ولماذا سميت المصطلحات هكذا

انا اعلم ان هذا لن ينفعنى كطالب يريد ان ينجح او يحصل على الدرجه النهائيه لكنى لا اريد ان اكون (مثل الحمار يحمل اسفارا) والأسفار هنا هتبقى فى المخ انى حافظ كلام ومش فاهمه ودى رياضيات حيث الحفظ دون فهم ممنوع

[Ahmed_121186]

بسم الله الرحمن الرحيم

بص يا سيدي اكيد انت فاهم العلاقة والدالة
العلاقة بتكون بين متغيرين وليكن س , ص
واحنا بنحتاج ندرس معدل تغير س بالنسبة الي ص او العكس ص بالنسبه الي س
معدل تغير المسافة بالنسبة للزمن ايه هو السرعة
يعني اشتقاق المسافة بالنسبة للزمن يديك سرعة
واشتقاق السرعة بالنسبه للزمن يديك عجلة
مش شرط زمن بقي
التفاضل علم كبير جدا وليه استخدامات كتيره ف العلوم الاخري

اتمني ان اكون قدمت معلومة مفيدة

[Ahmed_121186]

اما بخصوص هـ تؤؤل الي الصفر دي بالصلاة ع النبي والله اعلي واعلم
لما اقولك لاحظ شيء بالنسبة الي شيء تاني كل 10 دقايق
واقول لواحد تاني لاحظ نفس الشيء كل 5 دقايق
واقول لمخبر امن دولة فتح عينك ع اللي الشيء اوعى تغمض عينك
اي واحد دراسته هتكون ادق