التقييم البديل ( الامتحانات اصلا حرام )

[مسلمة22]

المهم ان اسئلة الامتحانات الغريبة العجيبة شكلها عامل ازاي
علل لما يأتي ، واكمل الفراغات ، و اختار ما بين الاقواس
المهم الاسئلة دي كدة معناها من الاخر انك تحفظ الكتاب زي اسمك ، زي لما حد بيسألك اسمك ايه تقول محمد تحفظ الكتاب ده من الجلدة للجلدة عشان لما تستلم ورقة الاسئلة بيضا لازم تسلمها زرقا

نموذج من اسئلة الامتحانات قال علل لما يأتي ليه كربونات الصوديوم قلوي التأ ثير علي صبغة عباد الشمس ، طيب و الطالب ماله بكربونات الصوديوم قلوي ولا حمضى هما و عباد الشمس حرين مع بعض اي دخل الطالب بينهم

و السؤال الاظرف اختار ما بين القوسين
-تشكلت خزانات المياه الجوفية والنفط في الزمن الجيولوجي
(الأول –الثالث –الرابع –الثاني)
ايوة طيب و الواحد ليه يشغل نفسه بالموضوع ده هي المياه الجوفية كانت في اي زمن ،
اما كبيرهم الذي علمهم السحر فهو سؤال اكتب ما تعرفه عن ، يعني احكي بقي براحتك ووريني حفظت كام صفحة يا شاطر

السؤال هل الواحد لو قعد يحفظ في علوم مش في تخصصه يا تري ده بينمي ذكاؤه ، اكيد بينمي الذكاء بس ده مجهود مهدر و الاولي ان الطالب يوفر المجهود ده لدراسة المواد اللي حتبقي في تخصصه و شغله ، و حاجة تانية المجهود المهدر ده لمدة 14 سنة ، الطالب في الجامعة بيكره العلم بيبقي عايز يخلص من ال 4 سنين و يستلم الشهادة بأي طريقة و خلاص و لا عنده استعداد يقرا في مراجع و لا عنده استعداد يروح مكتبة يقرا