متي ستنتهي تلك المأساة ؟؟

[Mr.Optimistic]

السلام عليكم ورحمة الله وبركاته

طبعا المنتدي بيتك الثاني وفيه أسرتك تلتقي بهم علي فترات متقطعة وهكذا .......!!

عاوز حد عنده تفسير

ليه دايما بحس بخوف ...من نفسي .... من الظروف ......وأكتر حاجة بترعبني لما بفكر في المستقبل .

أوقات بحمس نفسي وبتخذ قرارات تكاد تكون مستحيلة عند أشخاص آخرين
وأبدأ وأنا أقنع نفسي أني قادر علي صنع المستحيل .....!!
وما ألبث أن أقع وتتحطم معي كل أحلامي .

أوقات بحس إني ذكي والحمد لله واسأل نفسي أنا افرق ايه عن العلماء زي اينشتين أو جابر بن حيان أو العظماء ....!!
وأوقات تانية بحس إني أغبي مخلوق ومش قادر أحدث تغيير وينتابني اليأس من شعر رأسي إلي أطراف أناملي ( والاوقات دي أكتر من الاوقات التانية بكتير )

يمكن في لحظة واحدة أهد كل اللي بنيته في مشوااااار طويل وحصلت معايا مرة
بدخل في راسي أوهام ونكون كأننا شخصان كلاهما يصارع الاخر
والله بحس بجد إن الصراع ده داير جوايا ..؟؟
مبقتش عارف أتحكم في نفسي

أوقات كتير جدا بحب الناس تكرهني وبحب جداا انعزل عن العالم بحاله
أأقلم نفسي مع نفسي .أستخبي في قوضتي وأقفل بابي ومستحيل أشوف حد وأوقات العزلة دي بتاخد أكتر من شهر ونص .

دايما كنت بفكر في كلمة ( افهم نفسك )
عاوز اعرف مين اللي فاهم نفسه ..........؟
من اللي يعرف يوصف نفسه ............؟؟
الواحد - من وجهة نظري - عامل زي معادلات معقدة فك شفرتها مستحيل
ولو فكها يبقي مش فهم نفسه بس يبقي فهم العالم ده بحاله

بس أنا بجد زهقت من المحاولة والتفكير ( ايهما سينتصر ؟؟؟؟)
((أنا أم أنا ؟؟؟ ))
أفكار متناقضة بتدور جوايا يعني مثلا
أوقات بقول لنفسي ( انا قايم أذاكر )
اسمع اللي بيقولي ( متقومش )
والافكار كلها عندي كده

معظم اللي حواليا شايفني غريب الاطوار تبعا لطريقة كلامي أو طريقة معاملتي أو طريقة تفكيري .


متي ستنتهي تلك المأساة ؟؟