سؤال سريع ينفع اسيب المدرسين واقعد اذاكر فى البيت؟؟؟

[معاذ هداية]

السلام عليكم ورحمة الله وبركاته
انا متابع للمنتدى ده من زمان وقررت اشارك اليوم بسؤال بسيط

لو انا مضيع فى بعض المواد ينفع ما اروحش الدروس واقعد شهر 5 كله فى البيت الم المواد اللى واقعه منى
انا محتار جدا وارجو الرد وياريت توضحولى الاسباب
جزاكم الله خيرا

[TheMobiler]

فى رأيى الشخصى ( بلاش ) ..

لأن المدرسين بتبقى حاطة خطط حلوة جداً للمراجعة والواجب علينا إننا نتبعها والمنهج يتلم ..

دة فى رأيى وإن شاء الله الأعضاء يفيدوك أكتر

[معاذ هداية]

بسم الله الرحمن الرحيم

جزاك الله خيرا على الرد بس انا هقول مشكلتى باختصار

انا فى حجات كتيرة جدا فى الاحياء مش حافظها ومش عارف فيها حاجه
وكذلك الفيزياء
بالنسبة للانجليزى مكنتش متابع مع المدرس من اول السنة وكنت بروح حصة واغيب اتنين وكده
ومش عارف حاجه فى القصة خالص غير اول فصل
والعربى يعنى فى بعض حجات واقعه منى
والاقتصاد مش حافظ منه غير 8 صفح من 42 صفحة
والمستوى الرفيع عربى طيعا ضايع فيه خالص
ومش باقى على الامتحان حاجه
فانا بقول لو فضلت اروح الدروس مش هلحق اخلص كل ده ولو قعدت فى البيت وربنا وفقنى ممكن الحق اخلص
فياريت تفتونى فى امرى
جزاكم الله خيرا

[* Dr.Nour *]

السلام عليكم ورحمة الله وبركاته ..
أنا من رأيي تروح الدروس عادي و تمتحن يعني تذاكر في البيت و تمتحن على اللي ذاكرته على طول علشان التدريب مهم جداً لكن لو قعدت في البيت تقريباً مش هيكون فيه نفس جو الامتحان و كمان الالتزام هيكون أقل أعتقد .

[هالة محمد 2]

اولا لو انتا مثلا عارف هياخدوا اية فى الدرس وتقدر تذاكرة لوحدك بلاش تروح وذاكر الحصة فى البيت وكمل الى بعدها لا منتش فاهمة الحصة فا لازم تروح
بعد كدا علشان تخلص المواد بسرعة هات المذاكرة وشوفها كام ورقة وشوف المادة عايز تخلصها فى كام يوم واقسم المواد على عدد الايام الى عايز تخلص فيها المادة وشوف هيطلع كام ورقة وزاكرها فى اليوم دا برضو هيشجعك لما تقول دا انا لو مشيت على النظام دا هخلص المادة فى خلاص اسبوع مثلا هيديك دافع انك تذاكر
وربنا يوفقك واى سؤال احنا تحت امرك

[doha94]

انـــــــــــــا هقعــــــــد فى البيـــــت شهــــــــــر 5 علشـــــــــان المـــــدرسين اللــــــى بـــــــــاخد معـــــــاهم بيطـــــولوا اووووووووووووى
لو انــــــــــت بتـــــــــروح المـــــــراجعه وتـــــــــــرجــــــع تعبـــــــان ومصـــــدع منهــــــــا يبـــــقى اقعــــــد فى البيــــــــت احسن

لو مـــــــــش كده اصحــــــــــى الفجـــــــر ذاكــــــر لغـــــــــايه ميـــــــعاد الدرس هيبقـــــى قــــدامك وقـــــت طويل لان الولــــــــاد بيــــروحوا الـــــدروس متأخــــــر ولمـــــا ترجع ابقــــــى نام

[amothman123]

الأحياء و الفيزياء لالالالالالالالالالالالالالالالالالالالالالالالالا لالالالالالالالالالالالالالالالالالالالالالالالالا لالالالالالالالالالالا
لازم مدرس لو عاوز تجيب فيهم درجة كويسة

الباقى ماشى

[karimadel7]

في مواد ينفع تسيبها و مواد لا
المواد اللي تعرف تذاكرها لوحدك اللي هي مواد الحفظ من الاخر اقعد في البيت
الفيزيا بلاش كمل مع المدرس
الاحياء حسب دماغك انا اعرف ناس بتذاكرها لوحدها من اول السنة من غير درس اصلا
و الحاجات اللي مش بتفهمها بتسال مدرس المدرسة
انت و دماغك و شوف نفسك كده

[خالد مصطفـى]

سيب المواد الحفظ
وإستمر ف مواد الفهم



وبالتوفيق =)

[معاذ هداية]

جزاكم الله خيرا
بجد والله شكرا على النصائح
وان شاء الله انا ممكن اروح الفيزياء والاحياء ممكن حصة واحده كده وبالنسبة للباقى ان شاء الله هقعد
بس اصحابى مخوفنى اسيب العربى وبيقولولى بلاش بلاش الاستاذ بيدى حجات كويسة وكده انا بس محتار فى الموقف ده
بس لو انا خصصتله 4 ساعات يوميا وما اروحش الدرس اعتقد يبقى كويس ولا ايه ولا ممكن كده مش مديله حقه
شكرا جزيلا واعتذر على تأخرى فى الرد

[Engineer ..]

بص يا معاذ أولاً اهلا وسهلاً بيك

أنا أخوك محمد
أنا هرد عليك من ناحية العقل والوجدان
بالنسبة لإنك تسيب الدروس دا في حد ذاته ــ كتجربة واقعية حصلت ليا ــ ليه مميزات وعيوب
المميزات انك بلا ضغط بلا توتر تقدر تخلص وتنظم نفسك بسهولة جداً
العيوب .. الكسل و عدم المراقبة وقلة الفهم في بعض الأحيان
لو شخصيتك جادة في العمل اضمنلي انك تفهم وتراجع لوحدك وساعتها يبقى الدروس تضييع وقت
اما انك تروح الدروس
مميزاته ... المراقبة المستمرة في الدروس وحل النماذج الإمتحانية و المراجعة والتاكيد على الاهميات
عيوبة .. الإرهاق وضياع الوقت بعض الشئ
لو انت شخصية بتكسل فياريت تروح الدرس احسن
طب كده معادلتين أعمل ايه ؟
بسرعة حالاً هتشوف ايه اللي ناقصك في أي مادة وهتكتبه و وتحددله مواعيد مناسبة بدون ارهاق وبكل واقعية انك تذاكرهم وتحفظهم كويس جداً
في خلال أسبوع مثلاً لو شوفت تقيمك كويس فتوكل على الله واعلم انك كده ممتاز وجاد في عملك
أما لو اتلاقيت نفسك بتضيع وقت بتدعي انك مش فاهم الجزئية دي مش عارفها فبسرعة شوف الجدول بتاع الأستاذ و امشي عليه كما ينبغي وزي ما قالك بالظبط واياك ساعتها تغيب من مراجعة بدعوة انك هتذاكر ف البيت وتمني نفسك بإنك هتخلصها وانك بتعمل مجهود أحسن منه وهو بيضيع وقتك
دا لو انت تقييمك ضعيف ف الأسبوع ده
تمام ؟
ربنا يوفقك يارب واي استفسار موجودون

[معاذ هداية]

جزاك الله خيرا يا بشمهندس وان شاء الله هتوكل على ربنا وهروح الفيزياء ان شاء الله وحصة احياء او كده فى الاسبوع ان شاء الله واقيم الموقف
جزاكم الله خيرا

[EZEL coming]

شد حيلك وربنا يوفقك

[جهاد14]

رأيي خير الامور الوسط اقعد لحد نص 5 او اخر 4 بس اقعد على الكتب لان مفيش وقت وراجع مع المدرسين من 15-5 مثلا وربنا يوفقك ويوفقنا كلنا يارب

[معاذ هداية]

امين يارب ان شاء الله او اراد هحاول اعمل كده
وشكر جدا
جزاكم الله خيرا