أولى و ثانية طب ... أول خطوة ... و خطوة بخطوة

[عاشق البلانكو الابيض]

علم الأنسجة .. Histology

العلم ده زي م قلنا قبل كده وصفي .. بيعتمد على الوصف

و بينقسم الى قسمين كبار ..

1. General Histology و ده بيتكلم عن ..

الأنسجة الأربعة الرئسية و المكونة للجسم .. و هي

النسيج الطلائي Epithelial Tissue و ده بيغطي الأسطح بتاعة الجسم من جوة و من برة علشان كده سموه الطلائي .. طبعا بالاضافة لوظايف تانية ح تتعرف عليها بدراسته

النسيج الضام Connective Tissue و ده بيضم و يجمع و يربط بين الأنسجة المختلفة .. و بيتحور لأنواع تانية علشان يخدم أهداف معينة .. زي مثلا الغضاريف Cartilages و العظام Bones و برده ح تتعرف عليه بالتفصيل في الدراسة

النسيج العضلي Muscular Tissue و طبعا ده النسيج اللي بتتكون منه العضلات و بيتقسم لنوعين على حسب وجود خطوط تحت الميكروسكوب .. العضلات المخططة Striated muscles و العضلات الملساء smooth muscles و تتعرف الفروق بينهم بالتفصيل في الدراسة

النسيج العصبي Nervous Tissue و ده النسيج المكون للمخ و الحبل الشوكي و الأعصاب كلها

كل واحد من دول له خصائص شكلية Morphological و تركيبية Structural و وظيفية Functional و تحورات Transformations ليناسب المكان اللي بيخدم فيه و كل الحاجات دي بتدرسها في أول فرع .. علم الأنسجة العام General Histology

2. Special (Systemic) Histology و ده بتدرس فيه ..

الأنسجة الموجودة في كل جهاز من أجهزة الجسم ... يعني مثال

الجهاز الهضمي ... المعدة بتتكون من نسيج طلائي Epithelial covering متحور ليقوم بافراز العصارة المعدية و عضلات ملساء Smooth muscles لتقوم بتحريك الطعام

و هكذا في باقي أجزاء الجهاز الهضمي اللي أنت عارفها من التشريح .. و كذلك في كل الأجهزة الل برده درستها في التشريح

يعني نقدر نقول أن علم الأنسجة هو الشقيق الأصغر لعلم التشريح فكلاهما يبحثان في وصف مكونات الكائن البشري و لكنهما يخلفان في مجال الرؤية

في التشريح على مستوى العضو .. أما في الهستولوجيا فعلى مستوى النسيج و الخلية

و المنهج ده بيتقسم برده على السنتين على حسب جامعتك

تم بفضل الله علم الخلايا و الأنسجة