هل من الثواب أن يغشش المعلم تلاميذه؟

[mahmoudmagraby]

بسم الله الرحمن الرحيم
الحمد لله والصلاة والسلام على رسول الله
أعزائى المعلمين المحترمين...من أسوأ العادات التى يعلمها بعض المعلمين لتلاميذهم الغش
أحكى لكم ما حدث وأرجو أن تقولوا لى رأيكم بكل صراحة
إبنى كان يمتحن فى الصف السادس وحدث أن قام المعلم بتغشيش طالب فى الإمتحان عن طريق الهاتف
وأعطى التلميذ الهاتف أمام كل التلاميذ الذين ينظرون ويسمعون ما يدور أمامهم!!!!!!!!!
حكى لى ابنى ما حدث وبعض زملائه بالتفصيل ...تقدمت بشكوى وتم التحقيق فيها
ولكن!!!! لامنى الكثير على تصرفى وأننى سأسبب لها وهأذيها هى واللجنة الخ
لدرجة أن هددنى مسئول أنه سوف يعمل ويسوى فى لأن المعلم قريبه
والمعلمين زعلانين على سمعة المدرسة ومش زعلانين على ما يجنيه التلاميذ من تعلم سلوكيات تفسد أخلاقهم
ما نصيحتكم لى وللمعلمين الذين يفسدون أبنائنا بهذه السلوكيات ؟؟؟؟

[mahmoudmagraby]

أرجو من الأساتذة والمعلمين المحترمين طرح رأيكم فى هذا الموضوع ونصائحكم الغاليه حتى أنقلها لهم ولكم جزيل الشكر وخالص الدعاء

[magdymhdy]

والله دي مشكلة في كل مدارسنا ابتلينا بها والنتيجة طالب ضعيف لايعي شيئا ولايستطيع حتى كتابة اسمه بطريقة صحيحة

والذي ساعد في انتشار هذه الظاهرة الدروس الخصوصية وحرص كل مدرس على التوصية على الطلاب الذين يأخذون عنده درسا

وطبعا دي خدمات متبادلة بين المدرسين وخاصة في سنوات النقل

[منار على]

رايى انك متتنازلش وكمل اللى انت بتعمله

الغش دا ظاهره مؤرفه

يعنى نضيع مجهود طالب شاطر ونحبطه ونربى طالب خايب على انه ازاى يطلع عضو غشاش ومنافق فى مجتمعنا اللى معدتش ناقص اصلا يعنى لا بننفع الطالب الخايب بعلم ولا حتى بنربيه على اسس سليمه عشان يطلع انسان نضيف

ونقعد نسمع فى تبريرات سخيفه زى هو هيعمل ايه يعنى هيدخل طب لا مش هيدخل طب بس بدل مايطلع نجار او سباك منافق وغشاش واول مايغش يغشنااحنا ويبقى ذمبه فى رقبتنا لان اننا اللى علمناه دااو ساهمنا فيه بافعالنا يطلع انسان نضيف عنده ضمير يتعامل معانا بما يرضى الله
واصلا كل الاحوال اللى فيها البلد دى اساسها التعليم الفاشل والنظام القديم اللى كان بيدى تعليمات مباشره بالغش لحد ماعلمنا ولادناازاى يبقوا منعدمى الضمير لان البدايه الغش والنهايه كدب ونفاق وكوسه وظلم وانعدام ضمير وحاجات كتير جدا كلنا بنعانى منها

مش عارفه انا ازاى مدرس يدخل يشرح حديث من غشنا فليس منا وفى الامتحان يبقى اول حد يغشش دا الطالب يبصله ازاى

حسبى الله ونعم الوكيل

[mahmoudmagraby]

تحية وتقدير وشكر لحضرتك أ منار على
يارب يكتر من أمثالك
ياريت كل المعلمين المحترمين يضربوا بيد من حديد على يد أى معلم مقصر أو يحاول أن يزرع سلوكيات سيئة فى التلاميذ
شكراً أ منار وفقكم الله ورعاكم
وبمناسبة التنازل
أنا بطبعى طيب وتنازلت عن المذكرة
ولكن المدير الرائع لم يأخذ بها وقال لى دا حق التربية والتعليم

[سامي10]

والله انا كنت في لجنه في الاعداديه ودمي اتحرق الغش الي كان ف اللجنه علي مرائ من رئيس اللجنه
و المراقبين الاوائل وكانهم .............. اقول ايه بس؟؟؟
حاولت علي قد ما اقدر امنع الغش في اللجن الي كنت بخشها بسي هاعمل ايه ؟ والعيال و الاهالي كانوا بلطجيه ؟؟؟؟؟ حتي انني تمنيت الا اراقب تاني ابدا عشااان دمي ميتحرقشي و يجيلي الضغط و السكر ..

[adawi]

والله الغش منتشر فى معظم المدارس وده طبعا هو سبب استهتار الطالب بالمدرس لانه عارف ان فى الامتحانات سوف يدخل عليهم مدرس ....... ويغششهم الامتحان !!!!!!!!!!!!!!!!!!!!!!!!!!!!!!!

[mahmoudmagraby]

أعزائى المعلمين المحترمين ...حياكم الله
أرجوكم اللى يدخل لجنة بعد كده إن شاء الله يشد اللجنة ...وفى نفس الوقت بكل لين ورأفة فى المعاملة مع التلاميذ
وأى معلم تشوفه يغشش تبلغ عنه ...ولك الثواب عند الله لأنك تعمل على درأ المفسدة وتحاول أن تنهى عن منكر ...فأبنائنا يجلبون من وراء الغش أسوأ السلوكيات .....وحسبنا الله ونعم الوكيل فى المدرس اللى يغشش وحسبنا الله ونعم الوكيل فى اللى يشوف مدر أو زميله يغشش ولا يمنعه...حفظنا الله وإياكم من كل سوء

[mahmoudmagraby]

أرجو من أعزائى المعلمين المحترمين طرح آرائهم وأفكارهم وتوصياتهم لمحاربة ظاهرة الغش فى الإمتحانات
لدرجة أن بعض المعلمين والمعلماااات بتغشش بالهاتف المحمووووووول عينى عينك وتعطى الهاتف للتلميذ ويتملى والمشكله أمه اللى بتمليه من البيت ودا كلام زملائه فى اللجنه ...بالله عليكم ماذا يتعلم ويجنى زملائه وهو نفسه من هذه السلوكيااااات
حفظنا الله وإياكم
أرجووووكم قدموا النصيحة لهؤلاء ................