عايز تدخل هندسة بترول؟ يبقى تدخل هنا

ahmed doula · #1 03-12-2011, 01:23 PM

ملحوظه: الموضوع منقول من طالب بالكليه لدعم الفزع والاحباط فقط لا غير ,,,

التوبيك ده مهم جدا لكل اللى عاوزين يخشوا الكلية الرائعة اللى اسمها بترول و تعدين
التوبيك عبارة عن خبرة سنتين فى الكلية و السويس نفسها و كل حاجة
فياريت الاهتمام لان اللى هيخشها لازم تتوافر فيه شروط معينة و انا هذكرها هنا

اولا بالنسبة للى هيسكنوا مدينة :

و دول المفروض اللى يقعد فى المدينة الخمس سنين يجيلو اعفاء من الجيش عشان اللى هيشوفه
الشروط المطلوبة فى الطالب اللى ناوى يسكن مدينة - بعد الشر - :

1- الا يزيد طوله عن 160 او 170 سنتيمتر و دى كانت مأساتى لان السرير مش هياخد اكتر من كده و طول الوقت كانت رجلى مرمية برة السرير حتى كنت بفكر اعملها مكان اعينها فيه لما اجى انام
2- الا يزيد وزنه عن 60 كيلو لان اللى اكتر من كده السرير هياخده و ............... هوب
3- يكون جايب مخدة و ملاية و غطاء معاه لان اللى هيدوهوله فى المدينة هيعينه فى الدولاب زى ما هما لاخر السنة - و ما تسألوش ليه
4- يكون سمك جلده 5 سم عشان ما يتأثرش بناموس السويس اللى انا باكدلكوا انكو عمركو ما شفتوه فى حياتكم . كل ناموس العالم لما بتهشه بيمشى ده لما بتهشه بيلزق فيك اكتر و لا هامه

5- يكون جايب معاه ناموسية عرض الخرم فيها لا يزيد عن 1 ميكرون - ما هو يا اما تتخنق يا اما تستحمل دبان السويس اللى هو العن من الناموس

6- تجيب معاك طقم كوبايات لان نصه هيتكسر عافية
7- تعمل حسابك تجيب حاجات لزمايلك اللى فى الاوض اللى جنبك لانهم غالبا جايين من بيوتهم فاضيين فهتلاقيهم على طول بيطبوا عليك عشان يستلفوا منك

8- تجيب اقفال و مسامير على اد ما تقدر عشان الدواليب المخلعة
9-حاول على اد ما تقدر ما تجيبش لا سجاير و لاحشيش لان المشرف بيخش الاوض بالقوة و فجأة و دون سابق انذار - كسرلنا ترباس الاوضة مرتين - و لوحده كده بمزاج اهله
10- احذر من الخيانة و الندالة عشان الجماعة اللى جايبين فوق ال99 % دول معظمهم خونة و اندال
11- لازم تتحول لفار اعمى ساعة الاكل . ليه ؟ اقولك انا :
اولا : تبقى فار عشان تاكل اى حاجة تتقدملك من غير ما تتذمر من الجودة او الكمية اللى ما تكفيش فعلا غير فار بالعافية
ثانيا : اعمى عشان ما تشوفش هما بيطبخوا و يعملوا و يغرفوا الاكل ازاى - للى بيقرفوا -
12- شيل سنانك و ركب طقم من الصلب عشان تعرف تمضغ حتة اللحمة بتاعة يوم الخميس
13- انسى الكوتشينة و الشطرنج و الدومينو و الحاجات دى كلها هناك عشان المشرف بيعتبرهم رجز من عمل الشيطان و بياخدهم يلعب بيهم فى اوضته
14- حاول تهرب سخان صغير معاك . ليه ؟
اولا : تهربه لانه ممنوع استخدام اى اجهزة كهربية - مش كفاية يا اخى انهم بيسيبولك شواحن الموبايل ؟-
ثانيا : السخان لان انبوبة البوتجاز بتاعة الدور بتخلص فى نص ساعة على الشاى و اللبن و البيض
15- لو ما جبتش السخان حاول تروح جيم من دلوقتى احسن لانك هتروح تغير الانبوبة بنفسك يا بابا مفيش موظف هيغيرها و شوف بقى المسافات هناك عاملة ازاى
16- من اول يوم حاول تلاقى ثغرة تخش منها للمدينة فى اوقات الطوارئ لان الجماعة اللى هناك دول دماغهم طاقة و ممكن يبيتوك فى الشارع لو رجعت متاخر مهما كان العذر الا اذا اتكرمت و اديتهم الكارنيه و ساعتها تبقى غبى بجد
17- هاتلك بقى خط اتصالات عشان تتفرج على التليفزيون لان التليفزيون الوحيد فى المبنى مش بيشتغل . ليه ؟ لسبب بسيط جدا المشرف واخده فى اوضته بيصلحه - يا عينى شقيان ليل نهار -

ده بالنسبة للمدينة طبعا انا ما ذكرتش كل الحاجات

ثانيا بالنسبة للى هيقعدوا فى شقة :

1- اهم تنقوا صاحب الشقة يبقى اللى اهم من الشقة صاحب الشقة
2- تتاكد من كل حاجة فى الشقة لانى تانى سنة قعدت فى شقة ترم بحاله و فى الاخر لقيت بتوع المية جايين يشيلوا الماسورة . ليه يا جدعان كده ؟ عشان الشقة ما فيهاش عداد لا و ايه ؟ صاحبة الشقة تيجى تقولك فى الاخر انا هخصم من التامين المبلغ بتاع فاتورة المية !!!!!!!!!!!!!!!!!!!!!!!!!
3- اوعى تاخدها فى الدور الارضى الا اذا كنت عضو فى جمعية محبى الفئران و الصراصير العالمية

4- تتاكد ان الشقة فيها بلاط لانى بعد ما قعدت فى الشقة بشيل السجاد عشان - يا عينى- انضفها فوجئت برمل و تراب و ما فيش بلاط و هالو يا فئران

5- حاول تشوفلك ورث كده و لا كده عشان الاسعار هناك غالية بغباوة الشقة اوضتين و صالة و ربع حمام و بندفع 450 فى الشهر زيادة عليهم 450 تامين غالبا ما بتاخدهمش ده غير ال100 اللى السمسار بياخدها و ما بيرضاش باقل من كده
6- تحاول تتعرف على كهربائى و بتاع وصلة و سباك لحالات الطوارئ اللى هتشوفها كتير
حاول تتاقلم على صوت الزلط من دلوقتى عشان ما تاخدش بالك اوى من العيال اللى عمالة تزقل طوب و زلط على الشبك بتاعك ليل نهار
و ما تحاولش مش هتعرف تمشيهم

ده بالنسبة لبعض الحاجات الخاصة بالشقة

ثالثا : بالنسبة للكلية :

1- تجيب مروحة صغيرة معاك عشان المراوح مش هتشتغل خالص
2- حاول تتبرعلهم انت و زمايلك و تجيبوا كشك كهربا لانهم سارقين الكهربا من عمود على اول الشارع - و دى حقيقة علمية مؤكدة من مصدر داخل الكلية -
( راعى انهم قعدوا يبنوا فى سور الكلية بس 10 سنين عشان يوفروا فلوس كانوا هما اللى بيعملوا الطوب و يستنوه على ما يجهز )
3- اوعى تعمل فى حسابك ان فيه دكاترة عدلين حتى لو بانوا كده فى الاول انما فى اخر السنة هتشوف المصايب كلها
4- حاول تبقى اينشتين التانى لان الدكاترة هيعاملوك على هذا الاساس
5- ابعد عن الاخوان على اد ما تقدر
6- اوعى تعمل حسابك ان دى كلية روشنة و رحلات لدريم بقى و الاقصر و سلطان و الحاجات اللى بقية الجامعات المحترمة بتعملها دى !!! لا لا لا لا لا لا اخرك هتطلع رحلة لسينا ب7 جنيه و هتبقى تبع الاخوان برضه
7- اوعى تفتكر ان المعيدين عشان شباب زيك هيقدروك !!!! لا لا لا لا لا لا لا دول هيدوك على دماغك كانهم بيطلعوا اللى اتعمل فيهم من الدكاترة عليك
8- حاول تتعود على اللخبطة اللى هتحصلك ما بين المعيد و الدكتور لان المعيد بيشرح بالطرق و المناهج الحديثة و الدكتور لسه عايش فى القرن الخامس عشر
عاوزين دليل ؟
كنا فى مرة فى محاضرة و الناس اللى ورا مشغلين الموبايلات بقى و نظام قام طالع الدكتور مرة واحدة بكل حزم و زعق و قال :
اللى معاه راديو ورا ده يطفيه دلوقتى !!!!!!!!!!!!!!! لا تعليق
9- حاول تبقى سوبرمان و تتعلم الطيران لان هتلاقى عليك محاضرة فى المبنى بتاع المحاضرات و وراها على طول من غير فواصل سيكشن عملى فى المعمل و المسافة بين الاتنين بالظبط 7 كيلو يعنى على ما تحمل الميكروباص و تطلع و توصل المعمل هيكون السيكشن فى الباى باى

10- اوعى و اياك و احذر من ركوب التاكسى و لا حتى فى الضرورة القصوى سواقين التاكسى مستغلين جدا
و الله حصلت قبل كده واحد يا عينى جاى يقدم لابنه فنزل من الموقف و خد تاكسى قاله الكلية يا اسطى الراجل خده نزله عند بوابة الكلية و ما رضيش يخش جوة كمان مع ان جوة مسافة كبيرة برضه على ما يوصل للكلية نفسها المهم السواق قاله 5 جنيه طبعا الموقف باين
طب ايه يعنى خمسة حنيه و انت عرفت ازاى اساسا اللى حصل ؟ هو انت كنت راكب معاهم ؟
لا الموضوع ببساطة ان المسافة بين بوابة الموقف و بوابة الكلية اللى نزلوا عندها 10 متر
11- حاول تكتسب صبر ايوب فى التعامل مع بتوع شئون الطلبة اللى يجيبوا للواحد شلل كلى و نصفى و جزئى و لاول مرة معا
و مش عاوز احكى مواقف شئون الطلبة دى بصراحة لانها بتفكرنى بايام غبية

بس كفاية كده
انا عاوزك تكتشف الباقى لوحدك ياللى هتخش لان فعلا اللى هيخش بعد الكلام ده كله يبقى بيحب الكلية فعلا و هيستحمل بقية الحاجات اللى انا ما قلتهاش

الحل الوحيد :

تعمل زيى و زى بقية الناس العاقلين اللى حولوا من الكلية و راحوا كليات هما بيحبوها
انا الحمد لله ماشى فى اجراءات تحويلى لحاسبات و معلومات المنصورة
ادعولى بالتوفيق لان بتوع شئون الطلبة فى السويس مطلعين عينى

........................

lolo cat · #2 03-12-2011, 01:58 PM

ههههههههههههههههههه حلوة اووووووووووووووووى نا صح مش رياضة بس شكل بتوع الرياضة لما يشوفو التوبيك ده هيفقدوا الامل حرام عليك خليهم يجربوا ايه يعنى ههه

مهند مقلد2 · #3 03-12-2011, 01:59 PM

روح يا شيخ ربنا يباركلك

محمود ابو عيشة · #4 03-12-2011, 02:01 PM

روح ياشيخ .......................... وتالي بسرعة

highlight · #5 03-12-2011, 07:48 PM

ياااااااااااااااااااه حرام عليك...
ليه تحط موضوع كده.....هترعب الناس من الكلية
لو كله فكر فى الكلية دى بالطريقة دى.......
و اللى هيحصلهم من وراها....دا هيبقى ولا حااااااااجة
قصاد الدولااااااااااااااااااااااااااااااااااااااااااااا ااارات اللى هيقبضوها
لانهم فعلا بيطلع عينهم لما بينزلوا يتدربوا فى الصحرا..........
بس بينزلزا فى فنادق 5 نجوم...و سراير و تكيفات و هنا...
و يمكن ينزلوا فى فيلا كمان.........
فى حاجات ايجابية كتيـــــــــــــــــــــــــر....
و الاكلات كــــــــــــــــــل الاصناف........و يمكن ينزلوا فى فيلل كمان

annoccc · #6 04-12-2011, 12:53 AM

أنا شايف انك مستسلم على الاخر ومستغرب جداً من احباطك للناس .
وحاسس انك مش شايف هدفك وماشى تتخبط يمين وشمال ، ارسالك على بر ، واعرف انتا رايح فين .

والله انا خايف تروح الكلية التانية وبرضه تقول عيها كلام زى الأولانية ويمكن اكتر ، وبعد كدة تعمل زى الى رقصوا عالسلم ، ولا تطول بلح الشام ولا عنب اليمن .