ساعات الواحد بيفتكر حاجات وفي الواقع يلاقيها حاجة تانية خالص ..عايزة احكي شوية

[nado_nona]

السلام عليكممممم جميعا .... يا رب كلكم تكونوا بخير و كويسين ..... انا طالبة في سنة اولي اقتصاد و علوم سياسية - القسم الانجليزي - ج القاهرة .... وكنت طبعااا ف ٣ ثانوي السنة اللي فاتت .. وكنت كارهه نفسي وفاكرة بجد ان الثانوية دي كابوووووووس لازم الواحد يفوووق منه واول ما خلصت كنت حاسة اني داخلة في حلم .... الجامعة والحرية والراحة وحاجات كتير كنت متخيلاها

المهم قضيت الثانوية ف شدة اعصاااااب وتوتر وضغط ضغط ورغم كده كان فيها ضحك ف الدروس وفرحة بتقفيل الامتحانات ف الدروس وقلق ورعب ليلة الامتحان اخر السنة .. وانهيار ف الاعصاب قبل النتيجة .. وزيادة حادة ف ضربات القلب لحظة ظهور النتيجة وانتو بتشوفوا قدامكم نتيجة تعب سنتين متواصلين .. سهر بقي ومشاوير دروس وفلووس مواصلات ودروس وشمس وحر وبرد ومطر .. وكتب وملازم ومراجعات نهائية كل ده ف الاخر بتشوفه علي هيئة ارقام .. نتيجة كده مش مجرد كان رقم في ورقة .. ده مجهود اسرة كاملة مش مجرد فرد لوحده

المهم ان رغم كل التعب ده الا اني لحظة النتيجة كنت مش متصورة اني هجيب ١٠٠٪ ف ٣ ثانوي ويكون المجموع الكلي ل ٢ و ٣ هو ٩٧.٥٪ وادبي وكده
ساعتها بجد نسيت اي تعب تعبته واي خنقة واي ضغط حسيت ان التنسيق في ايدي انا اللي هتحكم فيه ... كنت قاعدة كده بقول ان وزارة التعليم العالي بتقولي يا نادو احنا عارضين عليكي كل الكليات المتاحة للادبي وكل كلية منهم هتبقي سعيدة انك تبقي فيها لانك تستحقي ده ومش مكتب التنسيق اللي هيقررلك والقرار هيبقي بتاعك لوحدك ... وفعلا اخترت الكلية اللي عيزاها ....

بس منكرش اني اول ما دخلت الكلية حسيت بكتئاب جدا لان الجو جديد ومختلف تماما .. احساسك انك طول عمرك طالب متفوق ومجتهد ومتميز وفجأة تحس انك تاااااايه ومش فاهم حاجة ولاول مرة في حياتك تحس بفشل او يجيلك احساس انك ممكن تشيل مواد او تعيد السنة !!!!!!!!!
ايه كمية الاحباط دي .. لكن الحقيقة ان دلوقتي قربنا ع امتحانات الميد ترم .. واهو بحاول برده ع قد ما اقدر افهم الدنيا ماشية ازاي واحاول اذاكر
وقررت اني متضايقش لو جبت درجات مش حلوة ف الميد ترم لان دي هتكون اول تجربة ليا في حالة وحياة مختلفة وجديدة تماما اهم حاجة اذاكر واعرف ازاي نظام الكلية ودراستها المختلفة تماما عن المدارس واعوض الباقي ان شاء الله في امتحانات الترم

وعلي فكرة ناس كتييييييير قالتلي اسألي سنة ٤ و٣ نظام الكلية ازاي .. منكرش اني اكيد سالت بس اللي بجد اتاكدت منه ونصيحة لاي حد بيقرا الكلام ده

** انت مش هتتعلم حاجة بالسمع من اللي حواليك .. والحاجة اللي هتتعلمها بجد هي اللي هتكون عن طريقك انت بتجربة شخصية منك انت **
عشان كده مهما حد كلمك عن طريقة مذاكرة او كلمك عن حياة الجامعة او الحياة المهنية عمره ما هيوصلك الفكرة اللي هتعيشها .. ولا مانع من الاستفادة بتجارب الاخرين

وان شاء الله ربنا يوفقكم جميعا وكل واحد يدخل اللي يحبه وهو اللي يتحكم في مجموعة و كمان ملحوظة مهمة اوووووووي اوعي حد يكون لسه لحد دلوقتي مثلا مبداش مذاكرة اوي ومفوت حاجات ويقول خلاص الوقت راح وانا ضعت ويستسلم .. لحد اخر شهر قبل الامتمحان انت معاك وقت .. بلاش تحبطوا نفسكوا باي حاجة ومع الاصرار هتعملوا كل حاجة حتي لو قدامكم يوم واحد ...... وكلمة مستحيل تعالوا نلغيها من قاموس حياتنا



بس خلاص

[*moon*]

والله كلام جميل
خليتيني أنسي الفيزيا والخنقة اللي كانت مسبباهالي ودوشة الدروس
كلامك جاي ف الوقت المناسب
خصوصا ان مواعيد الفزيا بتاعي ضربت والمدرس اللي كنت باخد عنده تعب ومش هيدينا دروس تاني
وعمالة ألف ع المدرسين ومحتارة ع الآخر
أكيد الحياة الجامعية مختلفة تماما عن الثانوي ونظام جديد ولازم أول حاجة ف الأول تبقي صعبة لحد مانتأقلم ع الوضع الجديد
ربنا يوفقك ويوفقنا كلنا ويعدي السنادي علي خير

[EZEL coming]

الف شكر على الكلام الذى يقوم بيحاء التفوق والتفاؤل وعلى فكرة انا بردو كونت فاكر ان انا مماخش الكلية الحياة هتبقى وردى وجميلة ومية مية والحرية واعيش الحياة بس الحقيقة زى ما انتى قولتى الجامعة حياة اخرى تماما بل عايزة مذكرة وجد اكثر من الثانوية العامة

[محمود ابو عيشة]

الف شكر ليكي علي الكلام الرائع ده
وانا كنت علمي ف 2 بس قدر الله ومشاء فعل وانضربت ضربه صعبه في تانية مكنتش متصور
اني هجيب المجموع ده ( 85%) بس الحمد لله انا احسن من غيري كتير طبعا
ع العموم حولت ادبي دلوقتي ومعاي تاريخ وفلسفه و علم نفس الحمد لله ماشي
بس خايف منهم اوي لان انا مش بعرف احفظ وهم طبعا محتاجين حفظ
وانا مثلا بحفظ الباب ده مثلا ولما بدخل في البعده بحس اني ناس كله حاجه
هل ده طبيعي ولا ايه احسن خايف جدا
وأكتر خوفي بقي من العربي و e مش عارف ليه تايهه خالص رغم اني لازم اعمل حاجه في الانجليزي
علشان ازود مجموعي السنه دي علشان عايز لو دخلت حاجه يبقي قسم انجيزي طبعا
ربنا يوفقك ويوفقنا لانك عطتينااا امل بجد لكل حاجه
.................................................. .................................................. ...

[THE CodeR]

دي مشكلة في التعليم بتاعنا للاسف
في فجوة كبييييييييييييرة اوي بين مستوي التعليم في الكلية و في الثانوية العامة
ده لان اغلب ما في ثانوي بسيط بيحتاج بس الحفظ الا حاجات قليلة يعني ... الفنيات اللي مبتجيش فيها الاسئلة !!
لكن في كلية كل كلمها ليها فائدة في مكانها (انا مجربتش لكن ده علي الاقل اللي اظنه) عشان كده لازم الكل هيحس الفرق بين الاتنين
متيأسيش العملية مش صعبة
بس اول حاجة اشيل من دماغي ان المادة الفلانية صعبة
و ابدأ كأني اول مرة اعرفها
خطوة خطوة ولو حد ساعدني فيها همشي
و ربك كريم هيكرمك قدر عملك و ما يزيد

[alsakr30]

الف الف شكرا على الموضوع الجميل والكلام ده
فعلا والله انت قولتى كل اللى فى نفسى اقوله فعلا الواحد بينسى كل تعب لما يلاقى تعبه لما يشوف
ثمرة التعب ده وفعلا نظام الثانوية مختلف 360 درجة عن الجامعة
وفعلا السنة الاولى بتكون اصعب سنة بس ربنا يستر وان شاء الله كل واحد يححق اللى يتمناه
بالتوفيق