مشكله تاعباني

[MohammeD el_SadaT]

المشاركة الأصلية كتبت بواسطة bo$y

بسم الله الرحمن الرحيم
انا عارفه ان دي اول مشاركه ليا .. بس المهم يعني انا مش عضوه جديده انا كنت مسجله بعضويه تانيه و ضاعت مني تقريباً لان الباسورد مش فاكراه
المهم مش ده موضوعنا

اتكلم في مشكلتي لاني بجد قربت اموت نفسي يا جماعه

انا دلوقتي في تانيه ثانوي و انا علمي كمان
المشكله بقى انا مش عارفه ارتب وقتي خالص خالص خالص و انا في اول السنه في اغسطس اول ما بدأت دروس عشت في دور رامبو و انا هقدر و هعمل و اسوي بس كل الأمل ده تااه و اختفى في ثانيه واحده

انا يا جماعه مثلاً عندي امتحان بكره في منهج التفاضل و المثلثات كله عشان خلصناه انا بقى زهقتهم معايا في البيت و قاعده اراجع من الجمعه اللي فاتت لدلوقتي و للأسف ركنت بقية المواد على جنب و الناس بتقولي غلط ماتخليش ماده تطغي على ماده كده مش هتوصلي لحاجه

و غيرت المدرسين كذا مره بس مش في كل المواد يعني العربي غيرته تلات مرات و اخر مره دي هي اللي المدرس فيها عجبني شرحه و اسلوبه و انا ماكنتش بغير بمزاجي يا جماعه بس كان دايماً يا اما المدرس يمشي يا يحصل له مش مشكله فزهقت يعني
و الالماني غيرته مره واحده

لكن انا فعلاً مافيش حاجه عارفه افتكرها خالص ..
في الكيميا على سبيل المثال كللللللللل المعادلات و الابواب التسعه دخلوا في بعض
و مش عارفه و بحاول اراجع كل فتره الابواب واحد واحد عشان مانساش و المستر يقولي اصبري يا بنتي شويه لحد ما نخلص المنهج احنا لسه في الباب التاسع و ده طويل احلى فتره فترة المراجعه و معرفش ايه

و الانجليزي انا خلصته و القواعد بتاعة الجرامر دخلت في بعض و الترانسليشن اللي في النماذج صعبه اوي و مش جايب كلمات من اللي انا حفظتها .. يعني أنا كنت بحفظ عشان ماحلش حاجه !!

و حساب المثلثات ده مشكلتي العالميه الاثبتات بتاعة الباب التاني بجد مش عايزه اقول غير حسبي الله و نعم الوكيل و امبارح صدقوني و انا بحل في النماذج قعدت اعيط لانه معقد اوي اوي اوي اوي

بجد انا تعبت اوي و انا كان نفسي ادخل طب بس واضح إني لازم لازم اتنازل عن الحلم ده و بسرعه عشان ماتصدمش بالواقع

يا جماعه هو فعلاً المعلومات هترجع تاني و لا هفضل بالزهايمر ده
حد يرد عليا بجد انا تعبت اوي اوي

هذا دعاء قبل المذاكرة:

( اللهم اني اسالك فهم النبيين و حفظ المرسلين و الملائكة المقربين و ان تجعل لساني عابرا بذكرك و قلبي بطاعتك و سري بخشيتك فانت حسبي و نعم و كيلي )

دعاء بعد المذاكرة:

( اللهم استودعك ما علمتني و اسالك ان ترده لي وقت حاجتي اليه و ما توفيقي الا بالله عليك توكلت و اليك المصير)

أسأل الله لنا ولكم النجااح والتوفيق في الدنيا والاخره

[bosy .. mostafa]

بسم الله الرحمن الرحيم

ممكن حضرتك تكتبى إسم عضويتك القديمه وأنا أجبلك الباسورد بتاعها أو تكتبيه وأنا أدمجهالك مع العضويه دى

كان اسمي "جارة القمر" بس لو دمجت العضويه دي مع دي هل هيكون اسم الظهور زي ما هو ولا هيبقى انهي واحد
و جزاك الله خيراً

إستغفرى ربك وإستشهدى
" ولا تقتلو النفس الذى حرم الله الا بالحق "

مهي الآيه اللي حضرتك كتبتها دي هي اللي بتصبرني

كلنا بندخل فى بدايه العام بتحفيز الأجازه بمعنى أدق طول الأجازه بنرسم أمانى أنا هدخل أذاكر أنا هنسى اللعب أنا هنسى كذا وكذا وكذا ..... وهبدأ حياه جديده وبالفعل أول إسبوع وأول شهر بنمشى تمام وبعد كده الملل بيبدأ يتملكنا ونحس بالتعب والإرهاق ونقول مش فاكرين تعبنا راح على الفاضى ونبدأ نسلم وده كله ما هو إلا وسوسه من الشيطان الرجيم ليضعف من ثباتك ويخرجك من نشاطك وللأسف معظمنا بيسلم لكن المفروض نلتزم بالصلاه وقراءه القرآن والدعاء والتفرب من الله وإعطاء كل شىء حقه

الكلام اللي بتقوله صح و بيحصل و انا حالياً بحاول اقرب من ربنا و بتخذ الخطوات الاولى بصلي قيام بالليل و بقرأ قرآن

لازم تدى كل حاجه حقها لكن فيه أشياء ليها أولويات يعنى إنتى عندك إمتحان يبقى ماده الإمتحان حالياً أهم وتتذاكر ويتركز عليها لكن بعد الإمتحان نرجع للبروجرام بتاعنا وندى كل ماده حقها والماده اللى تحسى بتقصير ناحييتها تركزى عليها أكتر وهكذا

بحاول اعمل كده بس مشكلتي انظم وقتي ازااااااااااي

مش مهم مين المدرس مشهور ولا لاء متمكن ولا لاء
المهم الراحه النفسيه ممكن مدرس يشرح بطريقه أفضل من التانى لكن إنتى مستريحه فين مكان ما هتستريحى هتستقبلى المعلومه بطريقه صحيحه

عارف يا محمد اول مدرس عربي اخدت معاه كان مشهور اوي و ماعندوش وقت ماشاء الله عليه مش بحسد
بس بصراحه ماكنتش بفهم منه حاجه لا انا ولا حد معايا في المجموعه اصلاً

هنه مفيش مشكله إستهدى بالله وإدعى ربنا وصلى وذكرى كويس ومتحسيش باليأس لان اليأس بدايه التحطم وإوعى تفقدى ثقتك فى نفسك متقوليش خلاص مفيش فايده قول ربنا كبير وإن شاء الله هيسهلها

و نعم بالله

كلمه أتنازل دى تزعلنى جداااً منك أهو هنه بقه إنتى تخليتى عن قيتك وموثقتيش فى نفسك إستهدى بالله وخلى ثقتك فى ربنا كبيره
وإن شاء الله تحققى اللى إنتى بتتمنيه

يسمع من بقك ربنا

جزاك الله خيراً يا محمد لردك
==

اقولك ايه هى مشكلة كل اللى فى الثانوية تقريبا بس اللى انا اكتشفته اننا كلنا بنبقى خايفين و مرعوبين بس بتيجى فى الاخر و الله بتلاقى دماغك و ايدك بتحل و انتى ساعات اصلا بتحسى انك مش فاكرة الحاجة دى بس صدقينى ان شاء الله كله هيبقى تام

الكيمياء اهتمى اوى بدليل تقويم الطالب و كتاب المدرسة دول بجد اهم كتب و طبعا الامتحانات و بعد كده اى كتب انتى عايزاها

و ربنا يوفقك

مهو اللي حواليا بيوتروني اكتر و كله بيقعد يحكيلي اساطير واللي بيضايقني اوي يا "ارق ملاك" انه الناس اللي اكبر مني اللي هم من دور زوجة اخويا مثلاً بيقعدوا يقولولي "احنا على ايامكم كنا بنذاكر اكتر من كده و برضو ماستفدناش بحاجه" بتضايق اوي من الكلمه دي و ده بيحسسني بالتقصير اكتر

ربنا يكرمك يا قمر