حياتك بعد عشر سنين

[صفــاء الروح]

ياااه كتير كنت بفكر فى السؤال دا....بس دايما بحاول تكون الإجابة حاجة كويسة

أكيد لما أشوف مستقبلى كويس أكيد هشتغل علشانه


هو عشان يبقى فى طموح لازم يبقى في حلم

أنا بحلم أدخل هندسة...وطموحى بقى أنى أتفوق فيها...عايزة وأنا بدرس مبقاش بدرس نظرى وبس....يعنى لازم أحاول بقدر الإمكان أنى أشوف أكتر....ميبقاش التعليم دايما فى المدرسة أو فى الجامعة...فى حاجة اسمها تعليم ذاتى

وعشان الطموح يتحقق لازم يبقى فى عمل....عشان كدا أنا السنة دى فى تانية ثانوى... ودى بقى حاسة أن الجهاد فيها بيبقى جهاد نفس....مش جهاد مذاكرة...وجهاد النفس أصعب أظن بيعتمد على تكرار المحاولات...ممكن أنا أبقى بجاهد نفسي عشان مدخلش النت وأنا مش مخلصة اللى ورايا
أول مرة هذاكر ساعتين وهقوم..عشان النت بيجري فى دمى..مولودة فى بقى سلك DSL
تانى مرة هيبقوا 4....تالت مرة هيبقوا 5.....بس عارفين ممكن المرة الرابعة يرجعوا اتنين تانى....وأبدأ أحاول من جديد
بس فى مرة من المرات هلاقى نفسي اتعودت انى مسبش مكتبى غير لما أخلص عدد الساعات بتاعت يومى

كل المحاولات دى اسمها عمل....ومش معنى أن فى محاولات فاشلة يبقى متعتبرش المحاولات الفاشلة دى عمل...لأ دا كون أنى بحاول فدا عمل ربنا يجازينى عليه،، فشل أو نجح دى حاجة نقدر نتخطاها مع الوقت
وعلى قد العمل على قد ما الحلم بيتحقق ونوصل لطموحنا....ونبدأ نحلم من جديد





اخخخ أنا قولت كل دا...ومش جاوبت على السؤال هههههههه

بعد 10 سنين أنا هكون خلصت هندسة تقريبا بقالى أربع سنين....اممم ممكن ساعتها هبقى اتعينت فى الكلية

وهكون طبعا ليا مشروعاتى الخاصة
مش لازم تبقى فى نفس المجال اللى اتخصصت فيه بس ممكن أدخل هندسة قسم كميا و اشتغل مشروع إلكترونيات
كدا يعنى...أو أى حاجة تانية أنا لسة مش عارفة كل الأقسام ...

ولما هدرس فى الكلية الطلبة بتوعى دول هيحاول بكل جهدى أنهم يكونوا أحسن ناس
عمرى ما هدى دروس ولا هاخد فلوس من شغل خاص على حساب شغلى الأساسي كل اللى محتاج من علمى حاجة هديهاله وهساعد أى حد يطلب حاجة منى....هوفرلهم الوقت اللى محتاجينه منى....ويا سلام بقى لو مثلا مثلا العيال المحترمة منهم اللى عندهم كفاءات أقدر أضمنلهم فرص عمل لما يتخرجوا....بجد هتبقى حاجة جميلة..دا حلم كتير بحلم بيه....نفسي أحققه ولازم اشتغل عشانه...حتى لو كان مبالغ فيه بالنسبة لبعض الناس بس دا حلمى" تمثيله تحفــــــــة.... بتعجبنى أفلامه"

لازم أحاول أحقق حلمى...وعشان كدا لازم أشتغل واتعلم كويس


معلش أنا talkative أوى.....بس استحملونى بقى عجبنى الموضوع