أرشيف إبداعات الأعضاء فى ما يخص بلاد العرب جميعا

[أحمد عبد العال عز]

ليه ؟ هوه أحنا عبيد؟
شعر \ سمير الأمير
ليه؟ هوه احنا عبيد
هوه عرابى لسه مجاش
ولاقالشى الظلم مايورثناش؟
ولا قال ياخديو متهددناش
محناش ناقصين تهديد
محناش ناقصين.. إلزم حدك

محناش قيراطين من قراريط جدك
والا بيت مامتك وباباك يا غزّيل
احنا الشعب اللى ساعات بينام و يقّيل
لكن لما بيصحى عاديك
يطلعلك فى ماسورة الميه
مهما تقفل فى الشبايبك.
من باب الدم يخش عليك.
**
اعقل ولايمها الله يهديك
خليك جنب البيزنيس زى التانى
حافظ ع القرشين ياحويط
ابعد عن كانى وعن مانى
نطاط الوهم ونطاط الحيط
النسل النمرود موصول الخيط
من عند معاويه لغاية بشار
ومن الحجاج لما لعلى عبد الله
افهم بقى
متاخدش كلامى هزار
البحر الأحمر مش حله
و الأبيض مش طشت غسيل
وبلدنا مش حتة أرضيه
مكتوبه باسمك ف وصيه
بلدنا.. بلدنا.. لكل ولادنا
من عند قنالنا للسد
هبة الفلاح والنيل
مش ورث لحد
اسمعنى المره دى بجد..
خليك عاقل
وكفايةعليك قوى تبقى مدير
شركة تصدير الجرجير
أو بنك الصحراء و التعمير
إلزم حدك
شيل على قدك
واوعى الغولة تزغلل ف عينيك
و تشدك
تبنيك علشان تتفرج على هدك
وتلم الدنيا عليك
بعد ماكانت ليك يا حزين
تصبح غلبان مسكين
تتمنى ترجع تانى مجرد ابن
زيك زى ابن الفرعون القاتل
وابن الفرعون المقتول
وابن الفرعون ال...
الله يخرب بيت الظلم
ولاده كتير...

بس ولوّ
بس ولوّ
مهما تغيب الثورة
فى عنينا بتغلى وتحلوّ
ادعيلها ربنا يهديها
سبيل الحق
وادعيلنا المولى يقدرنا
ونقولك لأ