منتدى كلية العلوم

اينشتاين · #1 10-09-2007, 07:55 PM

شكرا يا اميرة على تعبك معانا وخلاص انا بقيت طالب فى كلية العلوم ( جامعة القاهرة)
والكلية ماشاء الله رائعة ومطلعة ناس عباقرة بجد ووزراء كتييييييير (وزير الانتاج الحربى حاليا كمثال)
بس اكتر حاجة خانقانى حكاية الساعات المعتمدة دى ...حاسس انى مش فاهم وحتى الجدول لسه ماعملتهوش ..يا ريت لو تقدرى تساعدينى
وشكرا ع المجهود اللى بتبذليه معانا

علمي علوم · #2 10-09-2007, 10:01 PM

العفو يا اينشتاين على ايه

.

واهلاااااااااااااااااااااااا وسهلاااااااااااااااااااااااااا بيك فى كلية علوم القاهرة

.

وكويس ان الكلية عجبتك بس معلش هتلاقى الجامعة كلها مهدودة الايام دى علشان التصليحات اللى فيها , مع انها كانت جميلة برضه قبل كدا مش عارفة مش عجباهم فى ايه:D.
وبجد انت هتتفاجىء كل شوية إن شاء الله بكم الناس العبقرية اللى اتخرجوا من الكلية دى.

ويا ترى عرفت السنتر بتاع الكلية فين ولا لسه؟ ( ماتخفش ده مش سنتر دروس ولا حاجة:D ).

وبالنسبة للنظام الجديد بتاع الساعات المعتمدة ده فمتقلقش ده نظام جميل جدا

.

ويا ترى انت اخترت خلاص القسم اللى عايزه وقدمت فيه ولا لسه؟ وهل رحت للمرشد الاكاديمى بتاعك ولا لسه؟ واخد الرقم السرى بتاعك ؟؟؟

وبالنسبة للجدول فمتقلقش برضه إن شاء الله تعرف تعمله كويس بس يا ريت بس ترد على اسئلتى علشان اعرف اساعدك إن شاء الله.

والعفو تانى مرة مافيش مجهود ولا حاجة

.

اينشتاين · #3 11-09-2007, 03:49 AM

شكلك علوم القاهرة مادام عرفتى بالهد اللى بيحصل :D
المهم انا حضرت الاجتماع بتاع العميد وخدت دليل الارشاد الاكاديمى ( الاصفرانى ده )
وبعدين اول امبارح تقريبا رحت للمرشد الاكاديمى ( كان دكتور شريف خيرى باين )
وفهمت هعمل الجدول ازاى بس الرقم السرى ده اجيبه منين
وحاجة كمان معقدانى
هى المحاضرة النظرى بتبقى ساعتين فهل تتحسب ساعتين معتمدتين ؟والعملى التلات ساعات بيتحسبوا ساعة مع العلم ان الرياضيات مثلا ست ساعات معتمدة فهل ده معناه انها هتبقى محاضرتين نظرى ومحاضرتين عملى طول التيرم

وانا هدخل جيوفيزياء( برغم تحذيرات الجميع من الصعوبة المفرطة ) فهل معنى كده انى احط جيولوجيا وجيوفيزياء مع الرياضة والكيمياء والفيزياء ؟
نسيت اسألك ...هل التقديم للقسم له اجراء معين ولا مجرد اختيارى لمواد التخصص يكفى ؟
تعبتك معايا يا اميرة معلش :D

علمي علوم · #4 13-09-2007, 05:56 PM

هههههههههههههه انا فعلا علوم القاهرة

طب كويس انك عملت الحاجات دى كلها وعرفت تعمل الجدول وبالنسبة للرقم السرى فانت بتاخده من شئون الطلبه

بالنسبة للساعات المعتمدة:_

معيار الساعة المعتمدة :
أ - بالنسبة للمحاضرات النظرية:
تحتسب ساعة معتمدة واحدة لكل محاضرة مدتها ساعة واحدة أسبوعيا خلال الفصل الدراسى الواحد .
ب- بالنسبة للدروس العملية والتدربيات التطبيقية:
تحتسب ساعة معتمدة واحدة لكل فترة عملية أو تدريبية مدتها من 2 إلى 3 ساعات أسبوعيا خلال الفصل الدراسى الواحد .

وبالنسبة لقسم جيوفيزياء فهو قسم جميل جدا على فكرة ما شاء الله ومش صعب اوى كدا زى ما بيقولوا وليه فرص عمل كتيرة وخاصة فى شركات البترول والشركات الاجنبية فى مصر وعلى فكرة بقى عليه اقبال شديد دا حتى فى طلبه بقوا يختاروه بدل قسم جيولوجيا.

وفعلا انت كدا المفروض تختار جيوفيزياء وجيولوجيا فى سنة اولى بجانب المواد الاجبارى ومتطلبات الجامعة ( زى حقوق انسان وحاسب الى وكدا ... ).

وعلى فكرة انا فى قسم بيوفيزياء منفرد , يعنى قسمنا جنب قسمكم

.

وبالنسبة للتقديم للقسم فانت بتكتب المواد اللى عايزها مع المرشد الاكاديمى وهو بيساعدك وبيملى معاك الاستمارة بتاعت التقديم وبيمضى عليها وبعدين انت بتاخدها وتقدمها للشئون تقريبا . بس مش انت قابلت المرشد بتاعك خلاص طب ليه لسه ماقدمتش للقسم؟؟؟ وعلى فكرة انت ممكن تسال المرشد بتاعك فى اى حاجة انت عايزها حتى ممكن تستخيره فى القسم اللى تدخله وهو بيساعدك جامد باذن الله لانه بيسالك على ميولك ومنها بيعرف القسم المناسب ليك إن شاء الله.
بس انا عن نفسى شايفة ان قسم جيوفيزياء جميل جدا إن شاء الله.

ولا تعب ولا حاجة يا اينشتاين ويا رب اكون افدتك فى حاجة ولو فى اى استفسارات تانية اسأل على طول وربنا معاك يا رب
واسفة على الرد المتأخر بسبب مشاكل فى النت عندى

شكرا يا احمد على مرورك الجميل وفعلا كلية العلوم صعبة شوية بس اللى بيحبها وبيهتم بمذكرته شوية بيمشى فيها كويس اوى باذن الله

اينشتاين · #5 15-09-2007, 06:59 AM

متشكر اوى اوى يا اميرة واللى فهمتو من كلامك ان لو مثلا الكيمياء ثلاث ساعات معتمدة فيكون هناك محاضرة نظرية مدتها ساعتين ومحاضرة عملية مدتها ساعتين او تلاتة وذلك كل اسبوع
تمام كده؟
انا تمام عملت الجدول وسلمته لشئون الطلبة وعندى محاضرات النهاردة ...كمان ساعة كده

ربنا يوفقك ان شاء الله