انفراد : رقـم محمـول الرئيـــس !

[Observer]

انفراد: رقم محمول الرئيس

في دولة ما من دول الولايات الفسادستانية المتحدة أشارت مجموعة منتقاة من خبراء الترويج
والعلاقات العامة علي رئيس الدولة أن يقوم بنشر رقم تليفونه المحمول في جميع وسائل الإعلام
لتحسين صورته وزيادة شعبيته والتي أظهرت إستطلاعات الرأي أنها في تآكل مستمر.

وافق الرئيس علي أمل أن يحدث التواصل المطلوب بينه وبين أفراد الشعب ويتعرف بنفسه علي
مشاكلهم وسبب عدم رضائهم عنه رغم مخاوفه الشديدة من كثرة التليفونات وإمكانية تعرضه
لمكالمات غير لائقة من مغرضين ومندسين بين صفوف هذا الشعب المدهش المطاوع المسالم
المهاود المطرمخ.


بمجرد أن وافق الرئيس تم عمل حملة إعلانية ضخمة وغير مسبوقة في طول البلاد وعرضها
للإعلان عن الرقم وتم كتابة الرقم علي لوحات مضيئة عملاقة أعلي العمارات والمباني
الحكومية وقد صيغت الدعاية بعبارات جذابة وشيقة منها :



((إتصل برقم الرئيس وإنت وأهلك تهيص ))
((إتصل بالرئيس يكون لك خير ونيس ))
(( إتصلي بالرئيس وبكره يجيلك العريس ))

وكان الخلاف حول المكالمة هل تكون مجانية أم لا وتم حسم الموضوع بأن تكون هناك رسوم
لزيادة الدخل وتنمية الموارد ودفع عجلة الإنتاج وعمل ودعم مشاريع الصرف الصحي والمياة

وعمل نهضة تنموية مستقبلية



بدأت الخدمة وتلقي الرئيس عدة مكالمات :

المكالمة الأولي :

- ألو
- أيوه
- إنت الريس
- أيوه يا حبيبي … إيه مشكلتك
- أنا ياريس دخلت قسم شرطة أعمل محضر قام الظباط والمخبرين جابوا ساعة رقمية وقعدوا يشوف
من حيضربني أكتر علي قفايا في الدقيقة يرضيك كده ياريس وأنا ولا مجرم ولا حاجة أنا رايح أشتكي
وأعمل محضر في الجيران.
- بص يا مواطن … إحنا كلنا في خدمة الوطن.. والشعب في خدمة الشرطة .. لما يكون ظابط بيحميك
ويحمي أولادك إيده بردانة شوية وعايز يدفيها ويسخنها في قفاك ده يزعلك … لازم تضحي شوية
علشان الوطن …!!
- شكراً ياريس ..ربنا يخليك لنا ويخليك للوطن … ؟


المكالمة الثانية :

- ألو
- أيوه
- الريس معايا شخصياً
- أ يوه … قول يا مواطن … إيه مشكلتك …
- أنا ياريس وغيري ملايين ساكنين في المقابر .
- أسكت ..إتكلم عن نفسك بس يا مواطن بلاش تعميم … إنت عايز تعمل لي تنظيم علي التليفون؟
- نفسي ياريس في شقة من إللي بتتوزع علي لاعيبة الكورة وبنشوف تصاويرها في التلفيزيون…
- واضح يا مواطن إنك مش متعلم ومش فاهم حاجة … تسكينك في المقابر إنت وغيرك ده له حكمة
عظيمة .. إنت عارف إن الدين بيأمرنا بزيارتها للموعظة والإعتبار من آن لأخر لكي نعرف أنها دنيا
فانية … وإنت محظوظ كل يوم وكل ساعة بتتعظ …
ده إنت تحمد ربنا إننا لم نأخذ منك ضريبة إتعاظ …. !!
- شكراً ياريس ..ربنا يخليك لنا ويخليك للوطن … ؟


المكالمة الثالثة :

- ألو
- أيوه
- الريس حبيبنا معانا
- أيوه أيوه كده ….إيه مشكلتك يا حبيبي …؟؟
- أنا ياريس شاب عندي 29 سنه ومتخرج بقالي 9 سنين ومش لاقي شغل ..ولسة بآخد
مصروفي من والدي وقاعد علي القهوة طول اليوم … نفسي أشتغل ياريس …
- أنت غريب قوي يا مواطن … مش تحمد ربنا إننا مريحينك ..عايز تروح للشقي برجليك … وبعدين
مالها قعدة القهوة … إتعلم منها حاجة تفيدك …ممكن تبقي بطل شطرنج زي كسباروف وساعتها
تعرف إن جلوسك علي القهوة كان مصلحة …
- شكراً ياريس ..ربنا يخليك لنا ويخليك للوطن … ؟


المكالمة الرابعة:

- ألو ..صباح الخير ياريسنا يا جميل
- ألوووووووووو…صباح الجمال … أيوه يا شابة ... إيه مشكلتك وأنا أحلها لكي في فمتوثانية …
- أنا يا ريس عانس … وصلت لسن 35 ومش لاقية عريس … نفسي أتجوز زي البنات
كلها ويبقي عندي بيت وأسمع كلمة ماما ….
- هههههه … إنت تحمدي ربنا …جواز إيه وقرف إيه …خلفة وطبيخ وواحد متخلف
ينكد عليكي ومسئولية … خليكي كده ….
- ياريس … نفسي أحب وأتحب ….
- يا مواطنة … حب الوطن كفاية عليكي ….
- شكراً ياريس ..ربنا يخليك لنا ويخليك للوطن … ؟
في الحقيقة نجحت التجربة نجاحا باهرا وزاد الدخل القومي من جراء مكالمات الشعب للرئيس
الذي انشأ بدوره وزارة مسئولة عن الرد علي مكالمات الرئيس ...



حد عاوز الرقم ؟!!

[Observer]

http://www.masrawy.com/ketabat/Artic...aspx?AID=77076

[careena]

ههههههههههههههههههههههه
الو الو الووووووووو جامدة ياريس

[libero]

موضوع دمه خفيف ومؤثر .....

شكرا يا ريس ....... ع النقل

[Observer]

المشاركة الأصلية كتبت بواسطة careena

ههههههههههههههههههههههه
الو الو الووووووووو جامدة ياريس

اى خدمة كارينا

[Observer]

المشاركة الأصلية كتبت بواسطة Mido Sohagy

موضوع دمه خفيف ومؤثر .....

شكرا يا ريس ....... ع النقل

شكرا ميـــــــــــدو

[عمر ابو قطرة]

جميل
يارب يجعلنا في احسن حال

[Observer]

المشاركة الأصلية كتبت بواسطة عمر ابو قطرة

جميل
يارب يجعلنا في احسن حال

ويصلح فساد قلوبنا

[عاشقة الموج]

حقيقى فطست م الضحك
هى كلمة فطست دى عربى و لغة فسادستانية
هههههههههههههههههههههه
و الغريب إن الشعب مازال موافق
و يخليك ياريس
ههههههههههه
و عجبى

[هيمو ميرو]

ههههههههههههههههههههه

[**تسابيح**]

هو الريس عنده موبايل عادي زيننا كداا !!!

[Observer]

المشاركة الأصلية كتبت بواسطة عاشقة الموج

حقيقى فطست م الضحك
هى كلمة فطست دى عربى و لغة فسادستانية
هههههههههههههههههههههه
و الغريب إن الشعب مازال موافق
و يخليك ياريس
ههههههههههه
و عجبى

شرفنى مرورك الجميل عاشقة الموج

[Observer]

المشاركة الأصلية كتبت بواسطة تسابيح النجوم

هو الريس عنده موبايل عادي زيننا كداا !!!

30 سنة فى الحكم اكيد حوش وجاب موبايل