تعالـــــــوا نولـــع في المنتــــــــدي

[aladdin027]

مالكم مخضوضين لية؟؟؟
هنولع في المنتدي!!!!
حاجة غريبة يعني
اية المشكلة ماحنا عمالين نولع فية بقالنا فترة كبيرة
جايين دلوقتي مستغربين قوي.

اهو الكبريت و اهو البنزين اتفضلو ولعو

بسسس استنوا هتروحو تولعو كدا و خلاص...لاأأ لازم أقوللكم طريقة مختصرة عشان الحريقة تبقي فعالة.

اولا بقي انسوا عبارة "اختلاف الراي لا يفسد للود قضية "

خلوه يفسد القضية كلها
يعني اية واحد يتجرا اصلا و يعارضك في الراي...يااااااااه كارثة...ازاي يجيله قلب يدخل و يقول لأا انا مش موافق....لااا ساعتها متسكتش ابدا.

تجيبه من شعره...قصدي تقتبس من رده و ترد عليه. بس مش اي رد بقي لااا كلام من اللي هوا اللي بيدخل زي السم في الجسم دا....كلام في العضم.

و كمان مش عاوز اسمع منكم كلمة مسامح او عفا الله عما سلف لاااا ازاي...ميصحش...يعني اية تسامح كدا الناس تقول عليك ضعيف و مش عارف تجيب حقك.....لازم اللي يعترض علي كلامك او يغلط فيك تهزأه...امال اييية يا بشرساعتها بقي يااا فرحتي بيك و انت مهزاه كدا و هو مهزاك و حاجة زي الفل و الموضوع مغلق اغلاق مشرف.

و لااازم اول ما تدخل موضوع تبدأ بالجملة الشهيرة....
اقتباس:
يا جماعة كل الاراء دي غلط انتو بتتكلمو ازاي كدا

....ايوه اوعو تنسوها...خلي في دماغك حاجة اساسية ان كل الاراء غلط و انت اللي صح...اه يا بنى دانت خريج مدارس معرفش مين لا يمكن ابدا رايهم يجي حاجة جنب رايك...يفهمو اية عامة الشعب دول ...انت صح و بقية الناس غلط....طبعاا مفيهاش جدال

و اخيرا بس عشان الحريقة تبقي ولعة بجد....لو اكتشفت نفسك غلطان اياااك تعتذر...هو انت اقل من مين عشان تعتذر لااا خليك متكبر كدا عن الاعتذار و اوعي ابدا تقول اسف.

اية عاوز الناس تاكل وشك؟؟

استنو استنو...كلكو جريتو بعد ما أخدتو التعليمات عشان تروحو تنفذوها.... و في مجموعة منكم هتروح تبلغ عن الموضوع...انا بقي بكلم الفئة اللي راحت تبلغ دي.....بما انكو بلغتوا يبقي شايفين في حاجة غلط في الموضوع و بما انكو شايفين الغلط يبقي انتو معايا علي نفس الخط.

اسمعو الكلمتين بقي و خلونا نخلص. ....انتو مش واخدين بالكو من حال المنتدي من فترة.... في ناس كتير قوي بقت بتنفذ النصايح المهلكة الي كتبتها في الاول.

المواضيع فعلا بقت بتولععععع......إختلاف الراي بقي بيفسد قضايا الود بشكل بشع بيننا......بقينا بندخل نرد اكننا في منافسة او حرب ولازم رايي يطلع صح و الباقيين رايهم غلط...لازم اخالف القوانين بشكل او باخر المهم اني اختلف عن البشر و خلاص....حرام عليكم احنا كدا بنولع في المنتدي بجد.....

احنا كلنا بندخل هنا عشان المفروض اننا اسرة واحدة و بنتناقش و نتحاور...مش عشان نفرض راينا علي بعض .بلاش نرد علي بعض بحدة و عصبية و نتعامل مع اللي بيعارض راينا علي انه جاسوس و عميل مندس.
انا واحد من الناس بعترف اهو اني ساعات لما في رد بيستفزني برد علية بحدة...خصوصا لما يكون بيمس الدين او الوطن... و دا من غيرتي علي الاتنين دول لان دول اهم حاجات عند الانسان...بس انا معترف اهو اني غلطان و مش من حقي اقتبس راي واحد و اعارضة و ارد عليه و نقلبها خناقة.

هأستفيد انا اية يعني لما نقعد انا و عضو نرد علي بعض في موضوع اخ لينا و الموضوع يولع و الناس تنقسم فريقين فريق معايا و فريق بيعارضني و نولع الموضوع و يتقفل....ذنبه اية بقي صاحب الموضوع ان موضوعه يتقفل عشان احنا ما إحترمناهوش ولا احترمنا اداب الحوار اللي ديننا بيعودنا عليها. دا القران الكريم يقول (و الكاظمين الغيظ) لسة احنا ما كظمناش غيظنا و نتحكم في كلامنا و نقول راينا من غير التعرض لاراء غيرنا.

انا واحد من الناس مكنتش بألتزم برأيي بس و كنت ساعات بقتبس اراء و ارد عليها . و انا بتأسف لاي عضو هنا رديت في موضوعه رد ضايقه

يا ريت ...نبطل توليع في المنتدي و نحاول نهدي مع بعض اكتر من كدا...المنتدي هنا منفذ لناس كتير قوي بيهربو فيه ساعة ولا اتنين من ضغوط الحياة والشغل و البيت و الاولاد...بلاش يلاقو هنا كمان ضغوط