الصيدليه المحموله ......شفاء من كل دااااااء

[mera_mar21]

بسم اللله الرحمن الرحيم
فى البدايه موضوع جميل عامه عجبنى فنقلته لكم واترككم معه



مين مننا مش بيحس ساعات انه قرفان وكاره الدنيا كلها


ومش حاسس بلذه اى حاجه وحياته كلها حزن


وقلبه قاسي زى الحجر مش بيأثر فيه اى كلام


وحاسس انه كداب ومش لاقي علاج لنفسه


وهموم الدنيا راكباه ومكبلاه ومش عارف يعمل
ايه كل ما يطلع من حاجه يدخل فى حاجه


انهارده بقى احنا جايبين حل
لكــــــــــــــــــــــــــــل المشكلات دى


ايه ده معقول ؟؟ ازاى يعني خاتم سليمان هو ولا مصباح علاء الدين


مفيش حل للمشكلات دى ريح نفسك


لا فيه وحقولك عليه اهو واتحداك ان عملته ومتحلتش كل مشاكلك


عايزين تعرفوا ايه الحل




تابعونا فى الصيدليه المحموله

[mera_mar21]

وانااااااااااااا هعرض الموضوع بتفريغ اخوات فاضلات جزاهم الله واياكم كل خير

عندك مشكله مخلياك على طول حزين وزهقان من الدنيا ؟؟؟
انا انهارده عندي حل لكــــــــــــــــــــــــل المشاكل دى ؟؟ ياسلام ازاى بقى مصباح علاء الدين مثلا ولا خاتم سليمان !! لا يا سيدي ولا ده ولا ده استني عليا وحقولك اهه
تعالى شوف كده فى ناس كتير بتيجي تقول انا اموري متعسره ونفسي فى حاجات كتير ومش عارف احققها . هم الدنيا ركب الواحد والواحد مش عارف يعمل ايه علشان يصلح ما بينه وبين الله جل وعلى . النهارده أنا بقولك أنا عندي الحل

فيه ناس تيجي تقولك انا حاسس إني كداب ومنافق وعايش بوشين , ولا عارف أستقيم على طريق ربنا ولا عارف أعيش الحياة زى ما الناس عايشينها , وانا عارف إن النفاق ده أخرته الدرك الأسفل من النار ! ومش عارف أعمل ايه .

وواحد تانى يقولك أنا قلبي بقى عامل زى الحجر قاسي جدا , ولا نافع فيه صلاه ولا صيام ولا قرآن ولا مواعظ , أعمل إيه حد يخلصني من المشكلة دي , أنا أنهارده جاى أقولك أنا عندى وصفة علاجك إن شاء الله

فيه ناس تيجي تقولك انا لسه بحن للمعاصي القديمه , ولسه مرتبط بيها , ومش عارف أنسي الذنوب اللي كنت بعملها زمان , بفتكرها على طول وهو ده السبب اللي بيخليني كل ما بمشي خطوتين لربنا برجعهم تانى !!


وناس تقولك انا بعمل ذنوب تقيلة , ونفسي أتوب منها والله و بس حاسس أن ربنا سبحانه وتعالى بيعاقبني عليها , إزاي أفتح صفحة جديدة مع ربنا ؟؟؟ قولي الطريق بيبتدى منين ؟؟ وأنا بقولك متخافش الحل سهل وميسور والله العظيم بس ربنا يرزقنا الصدق الإخلاص .


وفيه ناس شكوتهم من النفس الأماره بالسوء , وبيقولك نفسي هي اللى مودياني فى السكه دى بس مش عارف أعمل فيها إيه ؟ . وناس تقولك الوساوس بتاعت الشيطان ماليه دماغي ونفسي ربنا يطهر قلبي منها , انا حقولك العلاج الشافي الكافي بس بالله عليك تسمع كلامى النهارده للآخر وإن شاء الله حياتك تتغير 180 درجة
أنا أنهارده حقولك على عمل اللى يعمله حيحصله حاجات كتيرة حلوة اوى :

** يبقى إيمانه أشد من الجبال !
**وميضعفش قدام أي فتنه من الفتن !
** وربنا يحفظ اللي بيعمل العمل ده من سوء الخاتمه !
** واللى يعمله ربنا سبحانه وتعالى يقيه من أهوال القبر ! **اللي يعمله ينجو من أهوال الحشر يوم القيامة !
** وهو سبب عظيم جدا علشان ربنا يعتقنا من النار ويحرم أجسادناعلى النار

تعالوا النهارده لأعجب الأعمال الصالحة , إلى دليل صدق الإيمان , إلى شعار المتقين فى كل زمان , إلى أعظم سبب في تزكية النفوس, إلى النعيم والرضوان , حنبتدى النهارده سلسله الصيدليه المحموله الإيمانية , وأولها .... الصدقة !!


ياللي بتقول الدنيا مقفله قدامي , وهم الدنيا راكبني , وأتخنقت من الدنيا باللي فيها , والله سبيل اليسر من الصدقة .

يقول الله جل وعلى( فَأَمَّا مَنْ أَعْطَى وَاتَّقَى وَصَدَّقَ بِالْحُسْنَى فَسَنُيَسِّرُهُ لِلْيُسْرَى).

ومعنى كده أن امورك تتيسر فى الحياة واليسرى هى الجنة ... فيبقى نعيم فى الدنيا ونعيم فى الآخره .

بس الشرط لكل ده إيه ....( أعطى وأتقى وصدق بالحسنى )

الله سبحانه وتعالى قال﴿يَمْحَقُ اللّهُ الْرِّبَا وَيُرْبِي الصَّدَقَاتِ ).

فالصدقة تزيد الرزق وتنزل البركات .



أحد الناس كان راجل موظف إسمه عبد الله , الراجل كان على أد حاله , بس كان عنده مشاكل مادية أصعب مما تتصورون , والديون كانت مغرقاه للأخر , وبدأ يخاف ويقول انا خايف أموت وأسيب الديون اللى عليا للناس تغرق فيها ويعيشوا فى هم بسببي , فبيقول كان الدين منغص عليا عيشتي لغاية ما يوم خرجت مع شباب أصحابي , وقعدت احكيلهم على الهم اللى أنا عايشه , فواحد منهم ربنا يكرمه قام شار عليا وقالى : ( عليك بالصدقه ) .
فقمت أنا ضحكت فى نفسي كده وقلت صدقة إيه يا عم الحاج ! ده إحنا مش لاقيين ناكل .... فقمت رجعت لمراتى وقلتلها ده واحد أنهارده وأنا بحكيله همى قالى عليك بالصدقه !! فقالتله طيب ما نحاول نعملها نطلع شئ بسيط اوى من المرتب كل شهر عسى انها تكون سبب ... فبيقول والله العظيم ده اللى حصل أن انا اقتسمت جزء بسيط اوى من مرتبي وخرجته صدقة شهريه .. أول حاجه بقى فيه بركه فى الفلوس ..... الفلوس اللى كانت بتتصرف هنا وهنا والفواتير اللى أد كده خفت !!! شويه بشويه ربنا بقى بيفتح عليا فى أبواب مكنتش متخيلها , واحد من قرايبنا فتح شركه مساهمه عقاريه وبقيت أجيبله ناس وبقى بيديني على كل واحد بجيبهوله مبلغ, وسبحان الله بقى واحد يجيب واحد لحد ما الدين انقضى !!! ببركه هذه الصدقة , فهي كده

واحدة من الاخوات أخت فلسطينيه بتحكي عن تجربتها مع الصدقه , فبتقول أنها في يوم من الأيام كانت خارجة فلقت ولد صغير بيتسول قدام محل شاورما , فالناس طردوه من المحل , فصعب عليها فقالتله انت عايز إيه , قالها انا عايز اكل , فقامت مطلعه 5 جنيه ومديهاله |. بتقول انا كان معايا فى شنطتي 250 جنيه بس وكان زوجي بيحتاج علاج بيدخل فى ال500 جنيه !! فأخدت بعضي ورحت الصيدليه بعد ما كنت تصدقت على الولد الفقير ده , فرحت الصيدليه وكنت عماله أساوم الصيدلي أنه يديني الدواء على الحساب شكك يعني لان زوجي كان حالته صعبه جدا وكان لازم ياخد العلاج النهارده , فالصيدلي موافقش فلقيت واحد واقف ورايا بيقول للصيدلي شوف الست عايزه ايه وراح دافعلها الفلوس , وفجأه ملقتهوش قدامها ركب عربيته ومشي , فبتقول لما وقفت مع نفسي كده وفكرت قلت ده ربنا بيجازيني على الصدقه اللى اديتها للولد الصبح وفك كربتي انا وزوجى وخلى الراجل ده يدفعلنا الفلوس , والأمثله كتير جدا على هذا الأمر



وانت ياللي بتقول أنك حاسس أنك كداب ومنافق ومش عارف تعمل ايه فى نفسك , أقولك انا بقى ,

قال سول الله صلى الله عليه وسلم ( الصدقة برهان )

يعنى دليل وبرهان الإيمان , فاللى عايز يخلص من مشكله انه منافق وكداب فالصدقه برهان الإيمان , فقال النبي صلى الله عليه وسلم لبلال : ( أنفق يا بلال ولا تخشي من ذي العرش إقلال ) .

والعلماء كانوا بيقولوا كلمه جميله اوى

( منع الجود سوء الظن بالمعبود ) .

إنت مش ببتصدق ليه ؟ لان خايف إن ربنا مش حيعوضك وإن فلوسك حتقل فأحسن الظن بالله , إنك لو تصدقت بهذه الصدقه ربنا سبحانه وتعالى سيكفيك من كل شر , ومن النفاق , النبي صلى الله عليه وسلم قال ( إنَّ الشحَ والعجز والبِذاء من النفاق ) .

فالبخل صفه من صفات المنافقين , فعايز تخلص من النفاق ومن أى حاجه تقربك ليه , عليك بهذا العمل العجيب ( الصدقة ) .


وانت ياللى بتعانى من قسوة القلب أقولك أد إيه الصدقه بتؤثر على القلب وتلين قلبك فقد قال الرسول صلى الله عليه وسلم

(أتحب أن يلين قلبك و تدرك حاجتك ؟ ارحم اليتيم و امسح رأسه و أطعمه من طعامك يلن قلبك و تدرك حاجتك .)

فهي علاج شافي كافي لموضوع قسوة القلب , فتروح ملجأ وتقعد مع اليتامى دول فتره وتكون جايبلهم أكل من أكلك , وتضاحكهم وتلاعبهم وتدخل على قلبهم السرور , فقلبك على طول يلين وربنا سبحانه وتعالى يفتح لك من أبواب الخير . وحقولك على وصفة تانيه لعلاج قسوة القلب برضه متعلقه بالصدقة .

ربنا قال ايه (ثُمَّ قَسَتْ قُلُوبُكُم مِّن بَعْدِ ذَلِكَ فَهِيَ كَالْحِجَارَةِ أَوْ أَشَدُّ قَسْوَةً)

قلبه بقى حجر طيب ايه اللى بيفتت الحجر

ربنا قال ايه (وَإِنَّ مِنَ الْحِجَارَةِ لَمَا يَتَفَجَّرُ مِنْهُ الأَنْهَارُ وَإِنَّ مِنْهَا لَمَا يَشَّقَّقُ فَيَخْرُجُ مِنْهُ الْمَاء) .

فا أنا عايزك تعمل عمل كبيييييير يبقى فى حياتك زى الماء ما بيعمل فى الحجاره والعمل ده هو ايه ( الصدقة ) فتتصدق بصدقة كبيره ... يرجعلك قلبك . حتقولى ما انا كان ليا قلب وكنت بصلى وبحضر دروس فى الجامع وبحفظ قرآن لكن دلوقتى مش لاقيه ضاع منى !! حقولك هى الصدقة اللى حترجعهولك ... لان الصدقة عند ربنا شئ عظيم جدا إسمع الأية دي بتقول ايه : يقول سبحانه وتعالى

(مَّن ذَا الَّذِي يُقْرِضُ اللّهَ قَرْضًا حَسَنًا فَيُضَاعِفَهُ لَهُ أَضْعَافًا كَثِيرة ) ,

ويقول الرسول عليه الصلاه والسلام (‏من أنفق نفقة في سبيل الله كتب الله له بسبع مائة ضعف ‏) يبقى الصدقة بكام يا عمنا ب700 ضعف !! تخيل بقي .

يتبع بإذن الله

[حووور الجنة]

فعلا كلام رااااااااااااااااااااائع ربنا يجعلنا من المتصدقين دايما و حتي و لو كانت البداية بربع جنية دي هتبقي لينا في الاخرة ثواب عظيم

ميرسي يا حبيبتي عالتذكرة الجميلة و الموضوع الاجمل
و انا في انتظار مواضيعك المتميزة جدا و بجد جزاكي الله خيرا

[nourhan200005]

بارك الله فيكى ........موضوعك اكتر من رائع

[the best futur]

بارك الله فيكى

[mr.aiad]

جزاك الله خيرا . اللهم علمنا ما ينفعنا و أنفعنا بما علمتنا

[mera_mar21]

جزززاكم الله خيراااااااا