شايفة النهاردة الدنيا كلها لونها اسود

[الشفق الباكي]

بصى بجد انازعلانه اوى وانا بقرأ التوبيك بتاعك
لانى حسيت الاحساس دا قبل كده بدل المره مرتين
مره معايا ومره بنت خالى
والمرتين كانوا فى الكيميا ونفسى افهم مشكله مدرسين الكيميا فى التصحيح بجد
وفعلا التظلم ماهو الا اعاده جمع
واعتقد علشان الورقه تتصحح من جديد لازم ترفعى قضيه وحاجات زى كده
بصى مش تزعلى نفسك بجد ولا تفكرى فى الموضوع دا
وخلى دايما عندك ايمان باللى فى ايدك
مجموعك اللى فى ايدك دلوقتى هو اللى تشتغلى عليه
واول حاجه لازم تعرفيها فى بلدنا ان لو ليكى حق
الاحتمال الاول انك مش تاخديه ويليه احتمال انك تاخديه
وطلعى نفسك من المود دا لان مفيش حاجه تستاهل حتى الدرجات
لان فى الاول وفى الاخر قدرك ونصيبك هتاخديه لان دا رزق
انا كنت جايبه سنتى فى الكيميا 46,5 وكان ليا درجتين للاسف
وكنت هتجنن لانى خايفه انى مش ادخل صيدله بس الحمد لله
وكنت جايبه42,5 اقتصاد واحصا يعنى لو كنت بصيت على مجاميع السنه اللى قبلى كان هيجيلى جلطه قبل ما التنسيق يظهر بس والله اتعوضت والحمد لله
تخيلى لما تكونى جايبه فى تانيه 99 ومجموع السنتين بالمستوى الرفيع كمان يبقى 96,5
يعنى جايبه 93 او ممكن اقل والله مش عارفه
انتى بقى حاولى تعكسيها
لو جايبه المجموع دا فى تانيه قولى انا هشد فى تالته والموضوع هيتعكس معايا
بجد ربنا يعدلها وبيفرجها خالص
ربنا يعينك ومش عايزه اشوفك مضايقه او بتتكلمى بالاحباط دا
وثقى ان ربنا مش بيضيع ابدا تعب حد