:::::::::::::::: إلا رمضـــــان ::::::::::::::::

["أم طلحة"]

بسم الله
السلام عليكم ورحمة الله وبركاته

حملة : إلا رمضان * الفكرة دي سمعتها في برنامج إلا رمضان للشيخ هاني حلمي و الكلمات مقتبسة من الحلقة ومن مقالة كنت قرأتها وأكيد أضفت إليها أيضا
إلا رمضان....لا تُنتهك حرمات رمضان


عايزين رمضان السنادي يكون غير ,عايزين نقضي رمضان من غير مسلسلات وأفلام وفوازير وأغاني أو أي معاصي تانية ,مش عايزين ننتهك الحرمات في رمضان

خايفين ربنا يعاقبنا لأننا ما راعيناش حرمة الشهر العظيم ده

انت عارف يعني إيه انتهاك حرمات في شهر تضاعف فيه الحسنات وتضاعف فيه السيئات كمان
العلماء قالوا قاعدة
ثلاث حاجات تضاعف بها الأجور عند الله
شرف الزمان وشرف المكان وشرف الشخص
شرف الزمان ...رمضان...مغفرة للذنوب وعتق من النيران ورحمات بتتنزل

وشرف المكان ...بيت الله الحرام
قال تعالى : وَمَنْ يُرِدْ فِيهِ بِإِلْحَادٍ بِظُلْمٍ نُذِقْهُ مِنْ عَذَابٍ أَلِيمٍ
عارف يعني إيه يُرِدْ يعني مجرد إنه يفكر وماعملش الحاجة ؛زي واحد قاعد هناك وبيقول أول ما هارجع بلدي هانتقم من فلان ؛ده هايصيبه عذاب عظيم
خادوا منها العلماء مضاعفة السيئات في المكان الشريف والزمان الشريف

فبالله عليك لا تُنتك حرمات رمضان..إلا رمضان
الرسول عليه الصلاة والسلام قال إن الله يغار وإن المؤمن يغار وغيرة الله أن تنتهك محارمه أو كما قال صلى الله عليه وسلم
,بالله عليكم غيرة لله مش عشان حاجة تانية
عشان ربنا ما يتنزلش علينا بغضبه
كفاية اللي احنا عايشينه العملية مش محتاجة تسوء أكتر من كده
كلنا عارفين اللي بيحصل لأمتنا , كفاية اللي أمتنا فيه دلوقتي
مش عارف تقف قدام شهواتك ,مش عارف تقول لنفسك لأ؟!! حتى ولو كان ربنا بيبسط يده لك حتى تتوب ,حتى تًئُوب ,حتى تراجع نفسك؛يفتح لك منجم الذهب ده وانت تديله ظهرك!!
مش قادر يعدي عليك الوقت ده من غير ماتتفرج على المسلسل الفلاني والفيلم العلاني والفوازير والأغاني
خلي بالك الأمر مش هيّن ,فإذا عظم الداعي وامتنع الفعل عظم الأجر وإذا ضعف الداعي وتم الفعل عظم الوزر
الكلام ده معناه إيه؟
لو واحد الظروف اللي حواليه كلها بتهيء له المعصيه ومع كده معملهاش يبأى أجره كبير زىقصة سيدنا يوسف عليه السلام وامرأة العزيز,أما لو واحد الظروف اللي حواليه بتهيء له الطاعه يعنى مفيش داعي للمعصية ومع كده عملها يبأى الوزر كبير

يعنى فى رمضان الشياطين مصفدة وأبواب النار مغلقة وأبواب الجنة مفتوحة والناس فى تسابق فى الخيرات
واحد بيختم قرآن وواحد بيقيم الليل وواحد بيتصدق و.......و....
لو انت عصيت هيبأى الوزر كبيييييييييييير لأن الجو كله جو طاعة
************************************************** *******


بالله عليك انوي بصدق دلوقتي , خسارة تضيع وقتك فى معصية والناس بتطيع ربنا ! اوعى تكون بعيد في وقت الناس كلها بتحاول تقرب
انت فيك خير ولا يحرم الرحمة فى رمضان إلا محروم شقي ..فلا تكن أنت
خلي شعارك
فَإِنَّهُمْ عَدُوٌّ لِي إِلا رَبَّ الْعَالَمِينَ
أي حاجة هاتقطع طريقي لربنا صارت عدو لي
أي حاجة هاتقطع طريقي عن رفقة النبي عليه السلام في الجنة صارت عدو لي
لو شهوتي هي اللي هاتقطع طريقي يبأى من هذه اللحظة هي عدو لي
فَإِنَّهُمْ عَدُوٌّ لِي إِلا رَبَّ الْعَالَمِينَ


نتوب مع بعض من دلوقتي بصدق...يلا مستني إيه؟

متردد ليه؟كإنك بتقول خايف أتوب وارجع تاني!ذنوبي كتير ازاي ربنا هايغفرهالي!!

ربنا قال : قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرحيم

ربنا ماقالش الذين أذنبوا مرة أو اتنين أو تلاتة لأه قال الَّذِينَ أَسْرَفُوا فاهم يعني إيه أسرفوا؟

صدقني ربنا هايغفرلك وهاتكون أحسن كمان إن شاء الله ويمكن تسبقنا كلنا لو صدقت نيتك ,توكل على الله وارجعله وقوله راجعلك يارب ولا يُمكن أسمح لحاجة تبعدني عنك تاني راجعلك يارب

وأبشرك بقوله عز وجل
إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا
يعني لما نتوب توبة صادقة لله عز وجل ستبدل سيئاتنا إلى حسنات بإذن الله
و لكن اعلم أخي واعلمي أختي أن للتوبة شروط
*الندم على ما فات
*الإقلاع عن الذنب
*العزم على عدم الرجوع,فإن عدت إليه فكرر التوبة إلى الله ولكن ليكن عزمك صادقاً
*إذا كانت هناك مظالم تُرد إلى أهلها
*وتذكر قوله تعالى إِنَّ الْحَسَنَاتِ يُذْهِبْنَ السَّيِّئَاتِ ذَلِكَ ذِكْرَى لِلذَّاكِرِينَ ,فاعمل وأكثر من الأعمال الصالحة ليزول أثر السيئات
*وتذكر قوله تعالى أيضا وَلَيْسَتِ التَّوْبَةُ لِلَّذِينَ يَعْمَلُونَ السَّيِّئَاتِ حَتَّى إِذَا حَضَرَ أَحَدَهُمُ الْمَوْتُ قَالَ إِنِّي تُبْتُ الْآنَ ...فلابد أن تكون التوبة قبل الغرغرة , ولا أحد منا يعلم متى تكون فتُب الآن, وقبل خروج الشمس من مغربها ولا أحد يعلم أيضا متى تكون

يلا بسرعة...مافيش وقت لأن ماحدش ضامن عمره ينتهي امتى...قوم دلوقتي أيوة دلوقتي حالاً ...قوم اتوضا وصلي ركعتين توبة وقول لربنا
راجعلك ندمان يارب ,بحبك يارب ولا يُمكن أسمح لحاجة تبعدني عنك تاني بس أنا ضعيف يارب فأعني على القرب منك وطاعتك وحسن عبادتك
وابكي واتذلل له والله هذه هي الذلة التي تعود عليك بالعزة واطلب منه يسامحك ويتقبل منك

يلا قوم مستني إيه؟
وماتنساش
فَإِنَّهُمْ عَدُوٌّ لِي إِلا رَبَّ الْعَالَمِينَ



********************************************
ملحوظة: لا يُفهم من كلامي السابق إلا رمضان أن نعصي الله في باقي السنة ولا نعصيه في رمضان
بالتأكيد ليس هذا هو المقصود بل ما نريده ونهدف إليه إن شاء الله ببعدنا عن المعصية لمدة شهر كامل بإذن الله سيكون حافز لنا أن نثبت على ذلك ونبتعد عنها بعد رمضان...والله هو الهادي و الموفق



منقول .

[Mr. Medhat Salah]

بارك الله فيك