قصة الموظفون الثلاثة !!

["أم طلحة"]

قصة الموظفون الثلاثة


مجموعه موظفين فى شركة
وفى موسم تقسيم الأرباح فى الشركة كل الى بيقدم طلب لمكافأه أو لإلغاء خصم بيحصل عليه
فالموظفين بيستنوا الوقت دة

فمنهم الى عليه جزءات وخصومات طول السنة ومع كدة مطنش خالص ومش فارقة معاه حتى مقدمش طلب عشان يرفعوا عنه الخصم..
فبالتالى هتفضل الخصومات زى ماهى وإدارة الشركة هتتضايق منه لإنه موظف مهمل وسىء ومع ذلك لم يستغل الفرصة يعنى مُصِر على موقفه ....موظف يستحق الرفد

ومنهم الموظف المقصر طول السنة ولكن بيستنى أوقات الأرباح فتترفع عنه الخصومات وممكن ياخد مكافأه كمان ..
هو مش هيتغير ولا هيبقى موظف نشيط ولا حاجة ..
هو بس بيعرف يستفيد من الفرصة

فيدخل يعيط للمدير ومعلش وسامحنى والظروف وأنا طمعان فى كرمك ..والبيت والعيال ...........إلى اخره

فالمدير من كرمه يرفع عن الخصومات ولو عيط كمان شوية واجتهد شويه يديله مكافأه
مع إن المدير عارف ومتأكد ان الموظف هيرجع تانى زى الأول مهمل فى عمله وبيتأخر فى مواعيده ومبيعملش الى عليه ..
بس اهى فرصه تانية ..وستحسب عليه

ومنهم الموظف المجتهد طول السنة ممكن مرة قصر مرة أتأخر لكنه فى النهاية موظف منضبط

ده بقى بيستنى وقت الأرباح عشان يترقى
عشان يعلى فى الدرجة الوظيفية بتاعته



طيب تعالوا نقارن بسرعه بين الثلاثه:

الموظف الأول وأمثاله : أكيد مجانين ...

هو فى حد عاقل يكون عنده خصومات ويقولوا له قدم طلب وخصمك يتلغى يقولهم ...مكسل أقدم طلب!!
ولا فى حد عاقل يكون معهوش فلوس ويقولوا له فى واحد بيوزع فلوس يقولهم ...مش قادر أنزل أروح له!!



الموظف التانى وأمثاله : صنف الكسالى ولكن بيعرفوا يستغلوا الفرص
ده الصنف الى بيطلقوا عليه
(الى عارف يمشى أموره )
لكن مشكلته فى حاجتين:


:1) لو جه تفتيش مفاجىء على الشركة وهو عنده كل المخالفات قبل ان يأتى وقت الأرباح ممكن يترفد

2) هيفضل محلك سر عمره كله ...كل سنة يعمل مخالفات ثم ترفع عنه ثم يعود مرة أخرى وهكذا
يعنى هو شخص بيجرى فى مكانه
صنف مرتبه ثابت لا يأخذ علوات ولا ترقيات ولا مكافأت إستثنائيه


الموظف الثالث وأمثاله: الصنف الذكى الطموح
الموظف دة فى كل موسم بيترقى درجة
دايما فى زيادة علوات ,مكافأت ,حوافز ,شهادات تقدير




وبعد كام سنه لو عملت مقارنة بين الثلاث موظفين

ممكن تلاقى الأول اترفد ...
التانى فى مكانه
الثالث ممكن تلاقيه أخذ منصب ادارى كبير فى الشركة


أنتهت القصة ويبقى المعنى

((رمضان ....والعشره الاواخر من رمضان...
العشره الأوائل من ذى الحجه ...محرم ...
وكل مواسم الطاعات...وكل طاعه جديده بنقبل عليها .....))

عاوزين نسأل نفسنا قبل ما ندخل أحنا عاوزين إيه من موسم الطاعة او من الطاعة؟؟؟
ثواب وبس!!!!!!!!!

طبعا الثواب حاجة جميلة وكلنا محتاجينها والحسنة تفرق كثير يوم القيامة لكن هل ده الى أحنا عوزينه وبس!!


لو سألنا سؤالين بعد القصة
السؤال الاول أى أنواع الموظفين أنت ؟؟؟

ولله المثل الأعلى والأعلى والأعلى لا نمثل ولا نشبه ..تعالى الله عما نقول علوا كبيرا
ولكننا نضرب مثال بالقصة السابقة

لو نظرنا إلى أغلبنا وأغلب أعمالنا سنجد الأتى:
بنصوم رمضان ونصلى التراويح عشان ناخد حسنات ثم ولا حاجة !!
بنصرف فلوس ونطلع نحج ثم ولا حاجة !!

كثير بيشتكى أنه بيصوم رمضان ويقرأ قرآن ثم وبعد رمضان يعود كما كان !!
يصوم فى ذى الحجة وعرفة ثم يعود كما كان !!
يصوم فى محرم وعاشوراء ثم ...

مبيتغيرش...

منهم الى راضى بحاله وفاكر إنه كدة ممشيها صح وإن هى دى الوسطية !!!
أبقى كويس فى رمضان ومواسم الطاعات وبعدين أرجع زى ما انا وبكدة أبقى مسكت العصاية من النص

للأسف تفتكر دلوقتى لو ُمت وأنت فى النص التانى من العصاية
مصيرك هيكون أيه ؟؟

أصل أكيد فى فرق سواء فى حياتك أو وقت موتك

قال تعالى {أَمْ حَسِبَ الَّذِينَ اجْتَرَحُوا السَّيِّئَاتِ أَنْ نَجْعَلَهُمْ كَالَّذِينَ آمَنُوا وَعَمِلُوا الصَّالِحَاتِ سَوَاءً مَحْيَاهُمْ وَمَمَاتُهُمْ سَاءَ مَا يَحْكُمُونَ} [الجاثية : 21]





وبعدين أنت معندكش طموح ؟؟؟

تخيل صحبك الى كان زيه زيك وبعدين التزم وكل مره تشوفه تلاقيه أحسن وبعد كام سنه قابلته لقيته ختم القرآن (حفظه كله) وبقى بيعلم غيره وبقى داعيه كمان
ساعتها هتقف وتقول : ياااااه ده كان زيى ...

عارف الفرق فين انه كل شويه كان بيترقى درجة وأنت يدوب كنت بتحاول تشيل خصم من خصومات طول السنة



السؤال الثانى:
أنت ناوى على إيه وأنت داخل على موسم طاعة أو أنت بادىء تعمل طاعة ؟؟؟؟؟
الثواب بس!!
ولا الثواب والتغير وان ربنا يرضى ويقبلك!!


اسمع لما ربنا فرض علينا العبادات قال أيه..

{يَا أَيُّهَا النَّاسُ اعْبُدُوا رَبَّكُمُ الَّذِي خَلَقَكُمْ وَالَّذِينَ مِنْ قَبْلِكُمْ لَعَلَّكُمْ تَتَّقُونَ} [البقرة : 21]

{يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ} [البقرة : 183]

{وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلَا تَتَّبِعُوا السُّبُلَ فَتَفَرَّقَ بِكُمْ عَنْ سَبِيلِهِ ذَلِكُمْ وَصَّاكُمْ بِهِ لَعَلَّكُمْ تَتَّقُونَ} [الأنعام : 153]

{لَنْ يَنَالَ اللَّهَ لُحُومُهَا وَلَا دِمَاؤُهَا وَلَكِنْ يَنَالُهُ التَّقْوَى مِنْكُمْ كَذَلِكَ سَخَّرَهَا لَكُمْ لِتُكَبِّرُوا اللَّهَ عَلَى مَا هَدَاكُمْ وَبَشِّرِ الْمُحْسِنِينَ} [الحج : 37]

{اتْلُ مَا أُوحِيَ إِلَيْكَ مِنَ الْكِتَابِ وَأَقِمِ الصَّلَاةَ إِنَّ الصَّلَاةَ تَنْهَى عَنِ الْفَحْشَاءِ وَالْمُنْكَرِ وَلَذِكْرُ اللَّهِ أَكْبَرُ وَاللَّهُ يَعْلَمُ مَا تَصْنَعُونَ} [العنكبوت : 45]

يعنى دايما المقصد تغير بيحصل بعد العبادة

ياريت نجدد نيتنا كلنا وأحنا داخلين على أى طاعة إننا محتاجين
..(( نترقى ))..

لإن لو معملناش كدة هنكون عملنا زى مثال شديد وصعب سمعته من أحد الشيوخ حفظه الله

قال:
الى بيروح يحج ويزور النبى صلى الله عليه وسلم
يبكى ويقول إنه بيحب النبى جدا

لو قلت للشخص دة ..أيه رأيك تاخد النبى معاك بيتك
ما يرضيه تبقيه فى بيتك
وما لا يرضيه تخرجه فورا من بيتك وحياتك ....

للأسف كثير جدا لا يريد (...)
ولا (سنه النبى ) فى بيته..

والاسهل عليه انه يأتى كل كام سنه يبكى امام قبره
ويدعى حبه..!!!

نقلا عن الاخت :أحب ربى .
من منتدى : احلى حياة فى طاعة الله .

[OM_SONDOS]

جميلة
جزاك الله خيرا

[moha_eslam]

انا فعلا استفد من الموضوع دا

[ehabsanad]

جـــــــــــــــــــزاك الله خيرا