المخرج عمرو سلامة: من فضلك سيء لسمعة مصر

[ayman samy]

[IMG]file:///C:/DOCUME%7E1/crystal/LOCALS%7E1/Temp/moz-screenshot.jpg[/IMG][IMG]file:///C:/DOCUME%7E1/crystal/LOCALS%7E1/Temp/moz-screenshot-1.jpg[/IMG]


لفترة اللي فاتت أنا مصدوم من كل هؤلاء الذين ينادون بمعاقبة من يسيء لسمعة مصر، و خصوصا أن المتهم دائما ما يكون مصري، فمتى و كيف وكلتك مصر ضدي أن تدافع عنها؟ و بعدين في معظم الأوقات دي، المتهم بيكون واحد بيعري أو بيفضح الفساد أو المصايب اللي بتحصل كل يوم قدام عنينا، يعني هو لو بيسيء بيسيء للناس الفاسدة أو للخلل اللي موجود مش لكيان مصر نفسه.

و بعدين إيه الفرق ما بين مصر و المصريين؟ يعني إيه أصلا مصر؟ هل هي الحدود الجغرافية يعني اللي بتفصلنا عن السودان و ليبيا و فلسطين؟ و لا هي ناسها؟ و لا هو ترابها؟ و لا هي الأهرامات و الفراعنة و الأثار؟ و لا هي كلام الأغاني الساذج اللي معمول للي ماكملوش تعليمهم؟
و إحنا دلوقتي لما نغمض عينينا، و نقول إن مافيش تحرش جنسي، و مافيش توزيع ظالم للثروات، و مافيش كوسة و محسوبية، و مافيش رشاوي، و مافيش سلطة مطلقة لرجال الأعمال فوق القانون أو تنفيذه، ساعتها مصر هتتبسط و تنشكح قوي؟
هتقولنا “كفائة كده يا رجالة” خليكوا ساكتين بقى و صهينوا و خليكوا مش سامعين مش شايفين مش قايلين؟
و إيه اللي هيحصل لو كل أمة “صهينت” على مشاكلها؟ إزاي مشاكلها هتتحل؟ هنبدأ منين؟ يعني لو واحد راح للدكتور و إتكسف يقوله عنده إيه، و مارضاش يتعمله تحاليل، الدكتور هيعرف يعالجه؟
و لا قصدهم نعالجها في الخباثة؟ و لو ده قصدهم يبقى قبل ما يحاسبونا على الإسائة لسمعة مصر لازم إحنا نرميهم في أوسخ عنابر السرايا الصفرا، لإن كلامهم مايخشش دماغ حد.
و هل ده دور الرقابة الصارمة اللي بتقص كل يوم كل ما هو مقروء و مسموع و مرئي، عشان يـ….وا على الولعة، و يكفوا ع الخبر مجور و يحاولوا يقنعونا و يقنعوا العالم إن كله فل و كله ألسطة؟
لو النهاردة حاولت تعمل فيلم مثلا بيقول إن عندنا مشكلة ما، هيقف قدامك أمة لا إله إلا الله، و أولهم الرقابة، هتقولك بتسيء لسمعة مصر، ما ينفعش، لحسن يحصلنا زي ما حصل للرقابة لما إترفد كل موظفينها بعد فيلم المذنبون – اللي المفروض إنه أساء برضه لسمعة مصر – حتى لو اللي في الفيلم بيحصل كل يوم قدام عينيهم و بيعانوا منه، يقولولك لأ، مش هننشر غسيلنا الوسخ، و لو أقنعتهم إنك اللي بتعمله إنك بتحاول تغسله ثاني، و حصلت معجزة كونية و وافقوا، هيطلعلك شوية ذباب بيدعي حب مصر أكثر منك، و إنه خايف على مصلحتها أكثر منك، و يقولك “كلا البتة” إنت بتسيء لسمعة مصر.
أول خطوة في حل أي مشكلة، هي الإعتراف بيها، و معرفة حجمها، و إحنا عندنا في مصر مشاكل لا حصر لها، مصرة الحكومة، أو الصحافة التابعة لها، أو التليفزيون القومي إنه يعتبرها مش موجودة، حتى لو كل الناس اللي شغالة في الأماكن ديه بيعانوا منها كل يوم.
إمتى هنعترف إننا عندنا مشكلة عنصرية؟ إحنا عنصريين أكثر من الأمريكان البيض في القرن اللي قبل اللي فات مع الزنوج، و لولا إننا كسالى و سلبيين كنا قتلنا كل من هو لا يوافقنا الرأي مليون المية، شعبنا بيمارس العنصرية يوميا، مقتنع إن الخليجي غبي و مسرف، و الشامي نصاب، و الجزايري بربري، و أخيرا الجملة الشهيرة “هو مسيحي بس كويس”
إمتى هنعترف إننا شعب نصه بيعاني من التحرش الجنسي و النص الثاني من الكبت الجنسي، بما فيهم المتزوجين اللي مايعرفوش الألف من كوز الدرة و الذكي يفهم قصدي.
إمتى هنعترف إننا جبناء، و كسلانين، و سلبيين، و مش بناخد خطوة في إننا نغير أي حاجة مش عاجبانا؟ و بنشتكي ع الفاضي و المليان، و حرامية، و و مرتشين، و فاكرين نفسنا حاجة جامدة بدون أي دليل على كده، و عايزين ناخد فلوس كثير و نشتغل أقل، و تافهين إلخ إلخ..
و على فكرة بقى، مهما حاولنا نستر نفسنا، العالم شايفنا عريانين، لا شايفنا أحفاد الفراعنة، و لا شرب من نيلها و لا فكر يغنيلها، و إحنا فاكرين إن في شوية أثار و بطولات كاس قارات مداريين على الأرقام اللي موجودة في كل إحصائيات العالم، اللي بتسيء لسمعة مصر بجد، أو بمعنى أصح بتحطها في نصابها الصحيح.
المقالة ديه كده ممكن تتحول لشكوى برضه بلا هدف، لو بعد ما قريتها ماحاولتش إنك تغير، تغير نفسك قبل ما تغير اللي حوليك، و تحاول تاخد خطوة لقدام في محاربة كل المشاكل ديه، لإنك مصري، و كل فعل يومي ليك بيأثر في سمعة مصر، مسؤليتك إنت إنك تشتغل، و تبطل عنصرية، و تبطل شكوى مع سواق التاكس، و برضة مسؤوليتك إنك تغير السياسة، و تغير التعليم، و تغير الصحة و تغير كل حاجة مسوسة في مجتمعنا، مهما كنت نكرة، و مالكش سلطة، تقدر تغير بمليون ألف طريقة أولها إنك تقول “أي” و ماتسكتش لحقك، بس عشان ده يحصل، لازم نعرف إيه هي المشاكل أصلا، و نعلنها، و نتدايق من وجودها، و نصرخ و نقول بدل “الأي” عشرة و ألف.
و لو مصر مش عايزة حد يسيئ لسمعتها، يبقى تمشي عدل الأول، و تبطل المشي البطال

المصدر جروب كلنا خالد سعيد ع الفيس بوك
http://www.facebook.com/ElShaheeed#!/ElShaheeed?v=wall
شكر خاص للعضو mrweb
وارجو من الجميع السرعة من اجل وقف تللك الاهانة والمسخرة ومن اجل حياة امانة ادخل مصر امنانا

[mrweb]

لا شكر على واجب

[ibrahim elsayed]

انا معاك فى اغلب بل كل الكلام اللى قولته
وهى دى المصيبه الخلط والتضارب فى الكلام من هى مصر
الارض الصماء ام الناس التى تحيا عليها
عندما اصف شخص بالفساد نصف فعله ولانصفه هو
فهو اكتسب هذه الصفه نتيجه لفعل ما
ودلوقتى هتصنف تبع مين ولا مين مهما الهتيفه شغالين
وفى كل الردود والمواضيع متفلسفين
ومن الاخر كله تمام وزى الفل انا اللى مش عارف اعيش فى البلد ياريت يوصفلى روشته التأقلم مع هؤلاءالنهابين
اللى تعدوا مراحل النهب والكذب من سنين ودلوقتى مرحلة هستغباك رغم علمك
وهفرسك وهغيظك ولو بتعرف تصوت وتولول اعمل وبرده مش هاسمعك
اللهم عفوك

[أستاذ/شفيق الأخضر]

مصر هي ام الدنيا برغم كل ما فيها

[علاء سيف]

لازم إحنا نرميهم في أوسخ عنابر السرايا الصفرا، لإن كلامهم مايخشش دماغ حد.

طبعا هذا هو تقبل الرأي الاخر عند هؤلاء الذين صدعوا رؤسنا بحرية الرأي وهم اشد الناس ارهاب فكري

إمتى هنعترف إننا شعب نصه بيعاني من التحرش الجنسي و النص الثاني من الكبت الجنسي، بما فيهم المتزوجين اللي مايعرفوش الألف من كوز الدرة و الذكي يفهم قصدي.

هذا هو لب الامر عندهم سيبونا نعبر عن المشكلة دي بالذات وعلشان ميبقاش فيلم اباحي نحشر لكم فيه حتة عن الفساد او التطرف الديني ويبقى الجنس في سياق الدراما وانتم رجعيين ومش فاهميين ووهابين

إمتى هنعترف إننا جبناء، و كسلانين، و سلبيين، و مش بناخد خطوة في إننا نغير أي حاجة مش عاجبانا؟ و بنشتكي ع الفاضي و المليان، و حرامية، و و مرتشين، و فاكرين نفسنا حاجة جامدة بدون أي دليل على كده، و عايزين ناخد فلوس كثير و نشتغل أقل، و تافهين إلخ إلخ..

]

طبعا كلنا ماعدا هوا على اعتبار انه هو المصري الوحيد اللي كويس واحنا اللي فينا كل العبر