دود المش منه فيه- شعر سمير الأمير

[Samir Elamir]

دود المش منه فيه

*يا عم روح شوفلك دكان
هيه البلد ناقصه مصايب
عامل مناضل وانت جبان
وفى النضال وسطك سايب

*أما السياسه نجاسه بجد
حكومتها ولا معارضتها
يتخانقوا مين يركب ويشد
مين اللى يربح خسارتها

*الله يكون فى العون يا بلاد
من المعارضه والحاكمين
خناقه بين حراميه شداد
واحنا اللى بين الاتنين ضايعين

*داهيه تاخدكوا شبه بعضيكو
واشرف ما فيكو مع مصالحه
ويوم ما صوتنا يعريكو
فوق دمنا راح تتصالحوا


*أحزابنا دى مجرد ملعوب
مقلب وحكومتنا عملاه
علشان نبطل زقل الطوب
ونتوه بقى بين لأه وآه

*أحزاب كده زى الدورات
المحصورين يرتاحوا فيها
وكلها حبة شعارات
باخت وفقدت معانيها


*طب نعمل أيه يعنى نبطل
ونسيب بلدنا للتجار
عمال تهبل وتهطل
وعاملى شاعر وانت حمار

*ياعم مين قالك سيبها
انا بس عايزك تبقى أروب
تعرف بجد اللى تاعبها
بدال ماتهرب م المطلوب

*يلزمها احزاب شعبيه
لأن دول يافطه وجرنان
ومعمولين لدواعى أمنيه
افهم بقى و بطل توهان

*أفهم بقى متجننيش
قال يعنى لسه أنا متجنيتش
ضحيت بأمك لجل تعيش
أهى برضه بنتك متعشتش

*أنا قصدى ماضى ومستقبل
يعنى اللى تزرعه راح تجنيه
وشعب عاقل مش أهبل
يخزق عنيين اللى يعّميه

*نرجع بقى لحكاية الحزب
لوانته أصلا كنت بانيه
حيبقى جد ما هواش كدب
والناس لابد حتؤمن بيه

[أنت___عمري]

قراءة في دفاتر المش المصري
قدمها لنا خبير الحياة المصرية الشاعر بهموم الشعب الأسير
أخونا الشاعر الكبير سمير الأمير
تسلم ايدك يا فنان

[Samir Elamir]

أشكرك من كل قلبى- ومتابعتك تدخل على قلبى شعورا يالدفء - إذ أشعر أن هناك من يسمعنى- مش قولتلك- فعلا- ( إنت .. عمرى)

[المتبتلة]

تسلم ايديك يا مبدع والله القراءة لحضرتك شرف فما بالك بالرد على موضوعات حضرتك

سلم احساسك وسلم ابداعك يا رب

[Samir Elamir]

العزيزة الغالية المتبتلة
أشكرك الشرف هو أن أحظى بطلتك على ما أكتب ويكفينى فقط أن تمس قصيدتى شيئا فى نفوس من أتمنى أن يكونوا أصدقاء فى رحلة العمر
لك محبتى واحترامى