أرجو المساعدة عشان انا هضيع

[Dr/yara]

اذيكم يا دكاتره او مهندسين مقدما ان شاء الله انا سنه اولى صيدله يعنى لسه الثانويه سايبه اثارها عليه
نظام انكم تايهين او حاسين بالضياع وانكم مش عارفين تلموا المنهج ده احساس طبيعى جدا بس اللى مش طبيعى انكم تسيبوا نفسكم ليه ماشى بصوا عاده نظام المذاكره بيختلف من واحد للتانى لان فيه ناس بتحفظ اسرع من ناس وكده يعنى عموما انت فى تانيه انا هكلم على ماده ماده وربنا يقدرنى وفدكم واى حاجه انا تحت امركم
العربى
بصوا متقلاقوش منه خالص اهم حاجه تكون ماشى مع مدرس الدرس كويس وهو عاده بيلم المنهج كويس لان العربى اسرع حاجه بتتنسى يعنى عادى جدا انك تنسى مواطن الجمال والحاجات المتشابه فى الدروس
بس النحو لازم تكون فاهمه كويس وتحل عليه كتير على قد ما تقدر
النصوص الحفظ لازم تكون حافظها من دلوقتى ومتسمعش كلام حد يقولك خليها قبل الامتحان ومواطن الجمال والاسئله حاول تفهم كل سؤال رايح فين وتربطوا بحاجه معينه صدقونى دى طريقه سهله جدا للتذكر
القراءه المعانى وخلافه حاول تلم الغريب منها والعادى انت ممكن تطلع معناه من القطعه متقاقش من القراءه خالص بس ومتهيالى القراءه اساسا 7 دروس يعنى مقدور عليهم
القصه طموح جاريه دى مفيش اسهل منها ولو كنت زى من عشقها يبقى ياربت تقره الفصل الاول بتركيز لو فيه وقت صدقنى بيوفر عليك فى حفظ الاسئله كتير جدا
البلاغه اهم حاجه الحل جداااااا
ده بالنسبه للعربى يعنى دلوقتى حاول تشوف الاسئله المشهوره وتحل اسئله امتحانات على الدروس اللى ذكرتها ولو فيه درس مش ضامنه حاول تدوس عليه دلوقتى عشان شهر خامسه المفروض بتركن العربى شويه وتركز فى الباقى فلازم تكون مقفله كويس على فكره والله انا كنت شغاله كده وربنا يكرمكم و خلى عندك ثقه بنفسك ربنا مبيضيعش تعب حد وعلى قد تعبك هتلاقى

الكمياء
اهم حاجه العضويه ركز فيها جدا وانت بتذاكرها لانها سهله ودرجاتها كتيره فى الامتحان
ياريت تعمل كشكول للمعادلات بس هيسهل عليك كتير بعدين فى المراجعه المعادلات مره واحده قبل الابواب منفصله
الكمياء عموما ارخم باب فيها الثامن صح ولا ايه والباقى فى السهل يعنى حل كتير ومذاكره بتركيز هتضمن فيها الدرجه النهائيه

الانجليزى
هو انا كنت اقل ماده بذاكرها بس يعنى احفظ كلمات علىقد ما تقدر هيساعدك كتير فى الامتحان ومتنساش paragraph درجته زى القصه فلازم ايدك تكون واخده على الكتابه القصه كويسه ومفهاش تداخل كتير
الفرنساوى
ده بجد كان مشكله فى ثانوى بس يعنى اغلب الناس كانت بتحب فرنساوى وبيقولوا عليه ماده مجموع هى لغه يعنى اكتر حاجه محتاجها تكون عارف كلمات المهج والمواقف وطبعا الافعال الشاذه تظبطها وعاده الامتحان بيجى كويس
الرياضه
الحل الكتير ثم الحل الكتير ثم الحل الكتير مفتاح الدرجه المهائيه فيها عشان تدخل الامتحان متلاقيش حاجه اول مره تشوفها يعنى هىلرياضه كانت غلسه على دفعتى شويه بس الرياضه يعنى من مواد المجموع

كفايه كده دلوقتى واهم حاجه متقلقش لسه فيه وقت بس المذاكره لازم تكون بتركيز مش لازم انجز كل حاجه اقد ما الحاجه اللى بذاكرها تدخل دماغى وتشد حيلك عشان تلحق ترجع اكتر من مره
المراجعه مهمه جدا لان من غيرها هتبقى عامل زى طريق مشيت فيه مره واحده فاكيد مش هتنقى فاكر الا الخطوط الرئيسه
يارب كل واحد يحقق اللى نفسه فيه واى سؤال انا تحت امركم ويارب اكون قدرت افدكم واسفه للاطاله