الباب الرابع ...

الباش مهندس · #1 21-01-2010, 03:53 AM

بسم الله الرحمن الرحيم
ازيكو ... ؟
يا رب تكونو بخير

الباب الرابع ده يا جماعه
جزئين :
- عناصر الفئة s

- عناصر الفئة
p

نبدأ الجزء الاول ... مع عناصر الفئة

s

احنا طبعاً مش هناخد عناصر الفئة

s كلها وندرسها

لا .. احنا هناخد مثال عليها بس

والمثال ده هيكون عناصر المجموعة الاولي
اللي هي عناصر الاقلاء
وعناصر الاقلاء دول ست عناصر

الليثيوم ..

Li

الصوديوم :

Na

البوتاسيوم :

k

الروبيديوم :

Rb

السيزيوم :

Cs

الفرانسيوم :

Fr

اولاً

هنعرف العناصر دي موجوده في الطبيعة علي هيئة ايه
مثلاً

الصوديوم

: يحتل الترتيب السادس من حيث الانتشار في القشرة الارضية

اهم خامات الصوديوم اكيد الملح الصخري ( NaCl )

البوتاسيوم

مثلاً : سحتل الترتيب السابع من حيث الانتشار في القشرة الارضية

اهم خاماته بقي

كلوريد البوتاسيوم وده موجود في ماء البحر وكمان موجود في رواسب
الكارناليت ( KCl.MgCl2.6H2O )
اما بقيه الفلزات نادرة الوجود
اما عنصر الفرانسيوم
دا بقي عنصر مشع ما اكتشفهوش الا سنه 1946 وكان ناتج لانحلال عنصر الاكتنيوم المشع
وعلي فكرة
فتره عمر النصف للعنصر المشع ده 20 دقيقة بس
اعتقد لحد كده مفيش اي حاجة صعبه
ثانياً
هنعرف ايه خواص العناصر دي

اول خاصية

: ان كل العناصر دي بتتميز بان المستوي الاخير بتاعها فيه الكترون مفرد واحد بس

وطبعاً ده هيترتب عله حاجات كتير

1- عدد تأكسد العناصر دي كلها ثابت وهو ( +1 )
2- كل عنصر من العناصر هنلاقيه موجود في دايه دورة جديدة من الجدول
3- معظم مركباتها ايونية
وعلي فكرة ايون كل عنصر فيهم يشبه الغاز الخامل اللي قبله
اما اللافلزات فالايون يشبه الغاز الخامل اللي بعده
4- عوامل مختزله قوية جداً
لانها بتحدث لها عمليه أكسده ( مش أكتر )
5- تتميز بالنشاط الكيميائي الكبير
عشان سهولة فقد الالكترون اللي في الاخر ده
يبقي قيم جهد التأين بتاعتها اقل من قيم جهد تأين جميع العناصر المعروفة
6- تتميز بضعف قوي تماسك ذراتها وبالتالي فهي اكتر العناصر الفلزات ليونة
وكمان اقل الفلزات في درجات الانصهار والحراره
وده طبعاً عشان قوة الرابطة الفلزية بيتحدد بعدد الكترونات التكافؤ
واحنا عندنا هنا الكترون واحد بس
كده اول خاصية خلصت
وياريت تكون مفهومة

الخاصيه التانية

: ذرات العناصر دي تعتبر اكبر الذرات المعرومفه حجماً

وطبعاً الكلام دا هيترتب عليه حاجات كتير زي :

1- زيادة نصف القطر هيقلل ارتباط الكترون التكافؤ بالنواه
وهيخلي فقده سهل
وعشان كده تعتبر الفلزات دي اعلي الفلزات ايجابيه كهربيه ونشاط كيميائي كمان
2- هتتميز بقله كثافتها ( سهلة اوي دي )
3- سالبيتها الكهربيه صغيرة اوي
عشان كده لما بتتحد مع اللافلزات بتعمل روابط ايونية قوية جداً
4- كبر الحجم ده يستغل في حاجه اسمها
الخلايا الكهروضوئيه
زي البوتاسيوم والسيزيوم مثلاًً
اصل احنا لما بنعرض الفلزات دي للضوء يتم تحرير الالكترونات من سطح الفلز
وكده الخاصية التانية كمان فركش
خش معايا ع التالته

الخاصية التالته

: لما بنحاول نعمل لالكترونات الذرات دي اثاره الي مستويات طاقه اعلي

بتدينا الوان

وكل عنصر بيبقي ليه لون مميز عن التاني
يعني ممكن نعرف العنصر باللون بتاعه
مثلاً الليثيوم بيدينا لون قرمزي
والصوديوم بيدينا لون اصفر ذهبي
اما البوتاسيوم بقي بيدينا بنفسجي فاتح
والسيزيوم بيدينا ازرق بنفسجي
ويستخدم ذلك في الكشف الجاف
اللي هو يعني كشف اللهب
بص
احنا بنجيب سلك من البلاتين ونغمسوا في حمض الهيدروكلوريك المركز عشان ننضفوا
وبعدين نغمسوا في الملح المجهول ( اللي احنا عايزين نعرف هو ايه )
وبعدين نعرضوا للهب بنزن غير المضئ
هيدينا اللون المميز للعنصر
تمام كده ولا ايه ... ؟
ندخل ع الخاصية الرابعه

الخاصية الرابعه

: العناصر دي نشيطه جداً

وعشان كده بنحفظها بعيد عن الهوا والرطوبة

وبنغمرها في الهيدروكربونات السائله
زي الكيروسين مثلاً
أعتقد كده ممكن تجاوب ع السؤال اللي بيقول
ليه بنحفظ الصوديوم تحت سطح الكيروسين ؟
ايوه .. شاطر
عشان نشاط هذا العنصر الكبير ( وممكن تشيل عشان وتحط نظراً )

الخاصيه الخامسة

: الفلزات دي نشيطة جداً ( يوووووووه بقي وربنا حفظناها )

وعشان كده

تحل محل هيدروجين الماء
والتفاعل يكون مصحوباً بانطلاق طاقه كبيرة
الطاقه دي بقي تؤدي الي اشتعال الهيدروجين المتصاعد
واعتقد برضه كده نعرف تجاوب ع السؤال ده
ليه مش بنطفي حرائق الصوديوم بالماء .. ؟
أجب بنقسك ( زي ما في الكتب الخارجية )
كده خلصنا 5 خواص

الخاصيه السادسة

: عناصر هذه المجموعه نشطه كيميائياً ( ههههههههه )

تصدأ في الهواء بسهوله وتفقد برقيها الفلزي اللامع

طب ليه .. ؟
نتيجه لتكون الاكاسيد ( خد بالك هنا سؤال علل )
الخاصيه السادسه خلصت خلاص
وعلي فكرة الموضوع لحد كده سهل جداً
والموضوع كله اصلاً سهل
بس المشكله معايا ان في معادلات
انا مش عارف اكتبها لحضراتكم
ع العموم انا هكمل الدرس في اي وقت تاني ان شاء الله
باي دلوقتي

يتبع ....