بصراحة أنا معدتش طايقة الكلية دي اساسا
السكاشن كل خمس دقايق يغيروا موعدها
ولما نتأخر وله يفتنا سكشن بسبب اللخبطة بتاعتهم دي
يطلعونا أننا مهملين ومش مهتمين حتى أننا نعرف مواعد سكشنا
وبعدين اللي يغير الجدول يحط الورقة بتاعة المواعيد الجديدة جنب المعامل ليه إن شاء الله ؟
ده على أساس أننا رايحين جاين من هناك وله أننا بنحب نتمشى في علوم؟
مش عارفة هو عمل جدول حاجة عويصة أوي كده لدرجة أننا دخلنا في الاسبوع الرابع ولسه مش عارفين يظبطوا الجدول؟
وحتى المحاضرات أسوأ
المدرج بيبقى زحمة جدا جدا
وناس واقفة وناس قاعدة على الأرض
والجو خنقأة تحس أنك قاعد في فرن (لدرجة أنه حصل حالات إغماء)
ومش عارفة ايه الدفعة الدحيحة دي اللي فيها ناس بتحضر المحاضرة 3مرات في التلت مجموعات
ويزنقوا المكان وخلاص
ده غير أن كل واحد بيحضر في المجموعة اللي على مزاجه
يعني اللي قام من النوم حس أنه مش عايز ينزل الكلية انهارده يقوم يقول لنفسه ابقى أحضر المحاضرات مع أي مجموعة تانية وخلاص
وله اللي عايز يحضر مع اصحابه في المجموعة يروح يحضر في مجموعته مرة ويرجع تاني يحضر في مجموعة أصحابه وتلقيه بيتخآنق علشان يقعد في الأول كمان
وغير كده حتى لو كل واحد التزم بمجموعته حيبقى المدرج زحمة برضه لان كل مجموعة 400طالب
وكل بنش بياخد حوالي 20 طالب يعني محتاجين 20 بنش وعدد البنشات اساسا حوالي 14 بينش
وفوق ده كله مش راضيين يفتحوا التكييفات
ليه بقى أصل دي أوامر العميد علشان يحمينا من انفلونزا الخنازير
كأن التكييفات حتنقل انفلونزا الخنازير بس لما نبقى قاعدين (أو بمعنى أصح واقفين) فوق بعض ده مش حينقل انفلونزا الخنازير؟ (شكلهم مركبين التكييفات علشان يتصوروا جنبها على رأي دكتور الفيزياء)
وأنا اصلا عندي حساسية فبتخنق بسرعة وبدوخ
و أحيانا كمان دماغي تصدع فمبقدرش أركز في أي محاضرة
وعادت المحاضرا دي زي قلتها لأ قلتها أحسن كمان
وقعدت أمنى نفسي أن الدروس حتبدأ والعدد حيقل والدروس بدأ بس العدد زاد
لأن كان في ناس ما حضرتش أول اسبوعين كانوا فاكرين أنهم مش مهمين وبدأوا يحضروا دلوقتي
والمعاناة الكبرى لما تحاول تخرج من المدرج مجرد ما المحاضرة تخلص تلاقي جحافل المجموعة اللي بعدنا بتهجم على المدرج علشان يلحقوا مكان قدام ويقعدوا يزقوا في بعض ونبقى لا احنا عارفين نخرج وله همه عارفين يدخلوا
لدرجة أني جاتلي شوية أفكار مجنونة من نوعية
أني طالما في الأغلب مش حشتغل يبقى ما الواحد يحول طب اسنان عددهم قليل ومش متشحططين كل شويه في كلية اهم بياخدوا اول سنة كلها في علوم مش سكاشن هنا ومحضرات هناك
وكفاية أوي أن عندهم جدول!!!!!!!!!!
أنا مخنوقة جدا ومش عارفة اذكر حاجة ومش فاهمة حاجة برضه
وكل مسأل حد يقعد يقولي طبيعي طبيعي
واصل الجامعة مختلفة عن الثانوي والكلمتين دول اللي لا بيودوا ولا بيجيبوا
ماشي طبيعي بس الطبيعي ده نعمل فيه اه
وله منعملش حاجة علشان هوه طبيعي ولما نشيل مادة وله نعيد السنة - لا قدر الله -يبقى ده تبع الطبيعي برضه
الجامعة مختلفة طيب يعني نعمل فيها ايه نذاكر الزاي محدش بيقول بيتهيألي محدش يعرف أصلا
ده غير اللي بيقولوا أحنا كنا زيكوا كده ونجحنا ومنعرفش نجحنا الزاي يعني من الآخر ناجحين بالحظ طب لو واحد حظه وحش يروح ينتحر بقى
ده غير اني ورايا بكرة محاضرة ........لغة
الدكتور بتاع اللغة ده عايز يموتنا من الشلل
محسسني أنه قاعد في فصل حضانة مش في جامعة
لما يقولنا اعملوا الروتس في الصفحة بتعاتهم
وبعد ما نعملها و نروح المحاضرة يقول تجيبوهالي المحاضرة الجاية منقولة في الشيت مع البريفكس والسفكس
ما كان يقول من الأول أعملوها في الشيت كان أيه لازمة اللفة دي
ممكن حد يقولي لو محضرتش بتاعة اللغة دي خالص حيعمل ايه ؟ اصلي ما عدتش ضامنة اني حقدر امسك نفسي أكتر من كده ومش عارفة ممكن أعمل فيه أيه
وبعدين أيه لزمة المادة كلها أنا مش شيفلها أي لزمة الصراحة
كان أغبى قرار اخدته في حياتي كان لازم الواحد يعند ليه مسمعتش الكلام ودخلت طب وله طب اسنان
03-11-2009, 09:40 PM
العرض الشجري
