Home of movies

[maryam.s]

طبعا كلنا سمعنا الاعلان ده او عالاقل اللى داخلين عارفينه بتاع الMBCs
اللى ما بتعملش زيه (لو لاحظتوا يعنى)
الا فى الدراسة تلاقى كل لاافلام اللى كانت عالسينما وكنت هتموت وتشوفها لانك مش عرفت تنزلها من عالنت او مالقيتهاش cd
وطبعا السنة ديه مميزن الافلام
Slum dog millionaire(غريبة مش كده لانه لسة نازل السنة ديه وواخدله بتاع 7 او 8 جوايز اوسكار)
ولاtwilight ولا نيكولاس كيدج وانديانا جونز(ولو انه مممثل رخم ماعرفش اتشهر على ايه)
طيب انا عايزة اقول ايه؟
انا عايزة اقولكم ان احنا دايما كنا نتفرج عالاجنبى بكل ما لذ وطاب منه
بمعنى ان اه فيه كام لقطة ما يتشافوش خالص لكن الفيلم جامد جدا
وممكن كمان تشوفه اكتر من مرة وتيجى قبل الحتت اياها وتحول وتقول اه انا مش بشوف اللقطات ديه(يعنى انا فى السليم اهه) زى فيلم nextبتاع نيكولاس
هو طبعا الفيلم من غير نقاش فكرته جامدة طحن كعادته(او كعادة الافلام الاجنبية عموما) لكن تبقى اللقطة الاساسية فى الفيم كله مش كويسة؟!!!!!!!!!!
(معلش انا صريحة لان ديه الحقيقة )واكيد اللى شافه عارف انا بتكلم عن ايه
المهم اننا بنتفرج ع الاجنبى سيبكم من اللقطات
لكن هم(وديه اكبر حججنا) ناس روعة فى كل حاجة(تمثيل افكار واتقان فى الاتنين يعنى بجد مفيش احسن من كده
طبعا على عكس اى حاجة عربى كلها تدور حول نفس ام الفكرة(اتنين بيحبوا بعض واهاليهم مش موافقين
طبعا دول بيعيشوا قصة حبهم لحد ما بيقنعوا الدنيا كلها(وبالمرة اهاليهم يعنى) عليهم وتوتة توتة خلصت الحدوتة بيبقى سهل قوى انك تخمن النهاية ويوم ما يعملوا فيلم عدل تلاقيه مليان كوميديا بطريقة تشل وطبعا مناظر تحسسك انك بتتفرج ع اسفل ممثلى هوليوود وارداهم فى نفس الوقت بكل صراحة كده(ده ع حد علمى واللى بسمعه لانى اصلا مش بستحمل اتفرج بجد ع فيلم عربى بالمرة)
وطبعا الافلام الاعربى والهندى دلوقتى بقت ماشية ع نهج الاجنبى(وما تفهمونيش غلط مش ماشية ع نهجهم فى الاتقان والابداع والكلام الفاضى ده)لا دول ماشيين ع نهجهم فى البنات اللى لابسة مش لابسة واللقطات الغبية اللى زادت وطبعا اهم حاجة انه مهما كان موضوع الفيلم او المسلسل طبعا(علمى بحت او مغامرات او قضايا وتحقيقات(وما اكثرهم فى الاجنبى غريبة مش كده!!!!!!) المهم عايزة اقول مهما كانت قصة الفيلم لازم البطل او البطلة مش تبقى كل حياتهم بينقذوا العالم يعنى لازم ياخد حقه او هى تاخد حقها من الحب او النظرة الاولى ووووو.................
اه صحيح ونسيت اقولكم ع ظاهرة خطيرة ان اصلا فيه بعض الناس اصلا تلاقيهم يعرفوا الممثلين الاجانب عن العرب اللى ممكن وما يبقوش عارفين اساميهم اصلا(زى حالالتى كده)
وممكن كمان تلاقيهم يعرفوا عن الاجانب اكتر من اللى يعرفوه عن العرب والفضل فى كده يرجع طبعا لاوبرا الشهيرة(اللى بالمناسبة من قريب استضافت اش وابى(للى مايعرفهمش اش ديه اللمثلة الهندية اللى كانت ملكة جمال العالم اللى كانت بتمثل فى الفيلم العبقرى_على الرغم من كم الكفر اللى كان فيه وكله بهر بيه_(جوده اكبر)
وابى ده جوزها ممثل برده وهما يعتبروا اشهر كوبل فى بوليود حاليا)
وطبعا ما ننساش نهنى نانسى لانها بقت مشهورة عالمية بعد ما اوبرا وصفتها بانها من اكثر
الناس تاثيرا فى الشرق
الاوسط على الرغم من تحفظه(ع حد قولها)
المهم
اننا عارفين وعرفنا كل حاجة عن الممثلين الاجانب والافلم لدرجة انك دلوقتى(بعد كام سنة خبرة طبعا)
تقدر تصنف الافلام اللى تشوفها عن الى ما تشوفهاش بمعنى انك عرفت مثلا ان الممثلة ديه مش مؤدبة عادة فى افلامها او لبسها وكده فبالتالى لما بتعرف انها فى فيلم بتفضل انك مش تشوفه(ده لو طبعا بيفرق معاكم(صراحة يعنى))
ممثلين تانيين مهما كانت قصة الفيلم او دورهم
بتشوفلهم افلام زى العبقرى دنزل –شون كونرى(طبعا بغض النظر عن تاريخه مع نساء جيمس بوند)-نيكولاس كيدج- جونى ديب-وكثير غيرهم(وفى لستات ممكن جوليا وساندرا(مع حبتين ثلاثه استثناءات فى كام فيلم ليهم كده)
وممثلين تانيين مهما عملوا مش بتشوفلهم افلام خالص(زى سيلفستر وبتاع انديانا جونز ده وجون ترافولتا(ماعدا face off طبعا)
ده كله طبعا غير المسلسلات بتاعتهم اللى حدث ولا حرج (طبعا عبقرية بلاحدود فى ابداع الافكار والتمثيل) بغض النظر بقى عن مثلا لو المخرج ستيفن سبيلبرج اليهودى او اللقطات اللى بتبقى موجودة زى ماقلتكم مهما كانت قصة المسلسل علمية زى(ER,grey anantomy,bones)
مغامراتية,تحقيقة,,,,,,,,,,,,
لازم لازم يكون فيه لقطات مش مظبطة او قصة(لا اتنين ثلاثة اربعة عالاقل
عشان نكون منصفين برده) حب فى البتاع الواحد
طبعا انا بكتب ده كله وانا قلبى بجد بيتقطع وقرفانة بجد من نفسي
لانى عارفة اد ايه انا كنت بخدع نفسي بكلمتين العبقرية والابداع عندهم
(طبعااالحجة القديمة ده لما بتفرج عالاجنبى حصيلتى اللغوية بتزيد اه بامارة فى الدرس ببقى اكتر واحدة عارفة ترجمة اغلب الكلمات)
كل ده
عشان اتفرج
لحد ما تماديت وبقيت مدمنة
او ممكن نقول خبيرة عشان نخفف وقع الكلمة ع نفسنا الامارة بالسوء ديه
يعنى من الاخر عايزة اقول كفاية قوى لحد كده كفاية نخدع نفسنا كفاية ذنوب لحد كده هتقولولى مثلا بنحول عند اللقطات اللى مش ظريفة ديه(ده حتى الmbcهات بدات تحذف كمان)(اللى كنت برده بقوله)
هقولكم طيب وانتو اصلا عرفتو ازاى مش شوفتوا بدايتها وبعد كده حولتوا(او بقى مع الخبرة بقيتوا بتعرفوا قبليها بشوية كفاية انكوا تلحقوا تقلبوا القناة) او لو كنتم شفتوا الفيلم قبل كده ده طبعا بيسهل الماضيع خالص بتبقى عارف فعلا من قبليها وتحول)
وهقوكم برده طب ليه من الاول نجيب الذنوب كده لحد عندنا
مش كفاية لحد كده
يعنى احنا بنتحاسب عالنفس الواحد(واحنا اظن الدكتورة كانت لسة قايلة اننا بنتنفس 16 مرة فى الدقيقة)
فتخيلوبقى كم السيئات اللى بنعملها فى الدقيقة الواحدة ولا بقى فى السنة الواحدة
من الاخر اناعاملة التوبيك ده عشان اوقف نفسي عند حدها(على الرغم من ان فيه كام مسلسل جامدين متابعاهم جديد ونفسي اكملهم زى(the4400,damages)
بس
It is high time to put an end to all this
المهم بقى المطلوب منكم ايه بعد ما فضيت خواطرى ديه

انكم

• تقولوا رايكم وهل فعلا حسيتوا بالذنب قبل كده وانتو بتتفرجوا ولا انتو اصلا وانتو بتقراوا التوبيك عمالين بتقولو وانتى مالك بينا(احنا حرين يعنى)مش عاجبك حالك غيريه مع نفسك) وكده يعنى

وايه فى رايكم الطريقة المثلى للحد من كده (انا عارفة طبعا ان عامل الدراسة مساعد برده عشان كده اصلا عملت التوبيك اليومين دول بالذات(حاجة تساعدنا يعنى)))

من الاخر يا جماعة انا كنت عايزة اقول
IT IS NOW OR NEVER
وكلنا عارفين الحديث
قال صلى الله عليه وسلم
(لا تزول قدما عبد يوم القيامة حتى يسال عن اربع:
عن عمرو فيننا افناه وعن جسده فيما ابلاه وعن ماله من اين اكتسبه وفيم اننفقه؟وعن علمه ماذا عمل به؟)
والحديث ده كمان
قال صلى الله عليه وسلم
(اغتنم خمسا قبل خمس:
شبابك قبل هرمك,صحتك قبل سقمك, وفراغك قبل شغلك وغناك قبل فقرك وحياتك قبل موتك)
والله المستعان
مستنية تعليقاتكم وردودكم
(وانتو عارفين ان كنت ناوية اعمل الموضوع من زمان بس اتشغلت مع بداية الدراسة وكده وظبطته كده فى دماغى ودلوقتى وانا بكتبه ناو اختى الصغيرة حبيبتى(عايزة ادبحها طبعا)شالت التلفيزين والريسفر وحطتهم جوه الدولاب عشات ما يشغلهاش عن الدراسة لانه فى اوضتها)
يعنى الله المستعان عالفترة اللى جاية ديه لحد ما الواحد يتعود عالموضوع ده ويشد حيله كده)))
وان شاء الله لو لقيت الناس فعلا مهتمة وفارق معاها حاجة زى كده هيكون موضوع الجاى عن ادمان الانمى المدبلج(طبعا مش بتاع سبيسبور اللى بتقطع نص الحلقة والنص التانى تلاقيها كل اللبنات اللى لابسين كت عاملالهم نص كم لونه بعيد خالص عن لون البتاع اللى هى لابساه)
لا بتاع مواقع الانمى المشهورة زى(msoms و مكسات كده)
ان شاء الله يعنى
انا عارفة ان الموضوع كبير ورغاية قوى بس مش فاضية بجد اظبطه بحيث يبقى شكله احسن ومغرى انك تقراه كله وكده يعنى
فاعذرونى يعنى ده ان دخلت تابعه اصلا(لا طبعا بهزر ان شاء الله ادخل ع اد اتابع الموضوع )

The end


,and they lived happily ever after

Home of the movies

[account closed]

بصضراحة انا كنت متننرفزة جدا ف بداية الموضوع


كنت حاسة انها دعوة لمشاهدة الافلام



بس ربنا يجزيكي خير ع اللي ذكرتيه


وربنا يهدي عصاة المسلمين

[يالا بينا]

الف شكر يا عم الدكتور على الموضوع المتميز ده
انتي عارفة...المشكلة ان الناس اصلا مش عايزة تتفرج غير على كده..الامن رحم الله...
لكن المشكلة ان الافلام الاجنبية دي من اذكى المنتجات الغربية اللي بيصعب على الناس مقاطعتها لانها بتشدهم ..احيانا مش اللي بيشدهم هو اللقطات اياها،لكن بيشدهم الاحداث والثقافة المختلفة عن البلاد العربية....
يعني فيلم(armmagdon) دا بيصور مشاهد انتهاء العالم....هدفه:ينبهنا ان يوم القيامة هيكون زي كده...
الفيلم على الجروب الفصحى المترجم في الحملة عندنا للي يحب يشوفه
مين بقى عندنا فكر يعمل زي كده؟ احنا بس كفاية نقلد ال.......
ما علينا.....المهم ياريت كلنا ننتبه يا جماعة للامور الصغيرة دي واللي ممكن تبدد حياتنا وحياة اطفالنا..

[Last Fantasy]

دعوة أحترمها بس موعدكيش إني أنضم ليكي لأن إحنا لازم نسمع أفلام بس عربي إنجليزي معرفش وبما إن العربي سخيف زي مقلتي فلازم نسمع أجنبي وبصراحه الافلام الجديدة جامده أوي وأراهنك إنك حتكوني متابعاها وحتابعيها وحتشوفي

[maryam.s]

اولا السلام عليكم
ثانيا هو انا مش كنت متوقعة ان المشاركة تكون رهيبة كده بس
اقدر من غير زعل اصنف عدد المشاهدات الرائع ده
ل مجموعتين اتنين الاولى صغنوووووووونة خالص
واالتانيةهى اللى واخدة نصيب الاسد
الصغنوة ناسها مالهمش اصلا فى الافلام
يعنى ناس بمعنى اصح ربنا هداهم من كده
او ممكن نقول ان البيئة اللى حواليهم اصلا كويسة مالهاش خالص فى الافلام والهجص ده
ودول ممكن نقسمهم نصين نص زى خوخة جزاها الله خيرا ردت وشجعتنى ع انى اكمل
ونص عادى مش شايف ان رده هيفرق او هيعمل حاجة او نقول كسل يرد اصلا
نيجى بقى للمجموعة الكبيرة اللى هما ببساطة الناس اللى عارفين كويس قوى انا بتكلم عن ايه لكن مش قادرين يواجهوا نفسهم بالحقيقة دي
او بمعنى اصح مش عايزين لانهم مش متخيلين حياتهم من غير كده
ودول بقى يتقسموا نصين نص مش قادر وبالتالى مش هيشاركنى وبالتالى ماردش عالموضوع والنص التانى زى last fantasy
مش قادر يتخلى عن حاجة وبالتالى اعلنها صراحة فى رده عالتوبيك
سينا بقى من ده كله
انا كنت عايزة اقولكم حاجة
انا فعلا لما فكرت فى الموضوع اكتر قلت فعلا ايه ده انتى متخيلة ان هم هيردوا عليكى ويشاركوكى وكده
وان التغيير بيتم فى يوم وليلة ولا يومين حتى
لا ده انتى ممكن نقول عايزة تغيرى اسلوب حياة عارفة يعنى ايه اسلوب حياة بالكامل عايزة تغيريه
بس رجعت قلت تانى ان اللى فعلا عايز يتغير
واللى فعلا عايز الاخرة مش الدنيا اكيد اكيد اكيد هيكون مستعد يغير اسلوب حياته ده واكيد فى فترة مش هينة بالمرة
يعنى انا عارفة كويس
قوى انه مش بالسهولة اللى انا متصوراها
بس هقولكم حاجة انتو
تسمعوا الشيوخ اما
يتكموا عن حجاب اليومين دول
تلاقيهم بيقولوا ايه
البنت عرفت انا الحجاب
فرض فلبستهه بس زى ما هى
حباه مش زى ما
ربنا عايزه ونفس المثال
فى قصة صغيرة لواحده
اعرفها لما بلفت التزمت بحجابها وكده وقالت لمامتها توضح لخالاتها
كده عشان مش
يجو يزعلوا لما ما تسلمش ع عيالهم
او لما ما تتديهمش
نفس الوش بتاع قبل كده
وكان ردها
ع كده يعنى خالاتى يزعلوولا ربنا يزعل؟؟؟؟؟؟؟؟؟؟؟؟!!!!!!!!!!!!!!!!
هتقولولى ده مالوش علاقة اصلا بالموضوع هقولكم
لا ليه لان كل ده بيبين
ان النفس
الامارة بالسوء ممكن نكبح جماحها لو احنا عايزين ربنا بجد
لو احنا عايزين الاخرة
لو احنا فعلا مدركين اننا ممكن نموت فى اى لحظة وتنتهى رحلتنا الصغيرة
لرحلة الخلود بقى
وعايزة اقولكم حاجة كمان انا ايوة طبعا عشان الموضوع كبير وصعب لسة ببطل فيه_(يعنى زيه زي اى عادة عايزين نغيرها سجاير ادمان سماع اغانى )_ وكده لسةايوة بتفرج بس طبعا فى تقدم ملحوظ وهو
ان الكم قل جدا والاحساس بالذنب زاد جدا وبالتالى تاثيره بدا يظهر جدا
وبجد بجد عايزة اشكرك
last fantasy
لانى عشان خاطر حضرتك بس
بس مش هتفرج ع اى فيلم من الافلام الجامدة ديه وان شاء الله ربنا هيعنى ويساعدنى ع كده وهجى فى يوم واقولكم بكل زهو وفرحة انا مش بتفرج ع الحاجات ديه تانى ابدا
وكنت عايزة اسال حضرتك سؤال
هو يعنى ايه لازم نتفرج ع حاجة؟؟؟؟؟
مين قال انه لازم يعنى اللى عايزة اقوله ان لو حضرتك فعلا فضلت مؤمن بكده يبقى ضرب من الخيال لو فى يوم من الايام بطلت الحاجة ديه
واكيد يعنى فيه حاجات تانية نشغل بيها وقتنا ونستفيد باقصى درجة منه عن طريقها
ولا للدرجة ديه بقى عندنا وقت للفراغ ؟؟؟؟؟!!!!!!!!!1
وكمان ايه بناخد عليه سيئات
باختصار يا جماعة اللى عايزة يعمل حاجة هيعملها كل اللى محتاجه انه يثق بنفسه وقدرته ع انه هيقدر يعمل الحاجة ديه ثقة
تامة ويقرن كل ده بالتوكل على الله وحسن الظن بيه
**********************
حسب الحديث القدسي(انا عند ظن عبد بى ان خير فخير وان شر فشر)
*****************************
وهيشوف نتايج هايلة جدا جدا ومش لازم
طبعا تكون فى ساعتها او يقف
لا يفضل يحاول لانه ممكن فشله فى كده يكون
ابتلاء فى حد ذاته
ولازم نعرف ان ربنا اذا احب عبدا ابتلاه لو جبنا حاجات كتيرة
بالمنظور ده اكيد حاجات كتيرة قوى فينا غلط هتتغير للاحسن
والله المستعان
وشكرا بجد لكل اللى مروا عالموضوع
وانا كل اللى كنت بتمناه ان ربنا يعينى وفى نفس الوقت يهدى بكلامى حد
ودمتم فى رعاية الله