عاوزتقرب من ربناومش عارف ادخل واعرف تقرب ازاى

[eng_emy]

السلام عليكم ورحمة الله وبركاته
الحمد لله وكفى وصلاة وسلاما على عباده الذين اصطفى

بصوا يا جماعة الموضوع طويل شوية
بس بصراحة حلو اوى وعجبنى قولت انقله هنا يارب كلنا نستفاد منه

فيا جماعه يعنى لما الواحد يجى يكلم شاب من الشباب يقوله احنا هنفوق امتى ؟ هنفوق امتى من الغيبوبه اللى احنا فيها ؟ هنستعد امتى لأول ليله من ليالى القبر ؟ حد فكر فى الموضوع ده قبل كده ؟ هنفوق امتى هنفرح ربنا بتوبتنا الصادقه امتى ؟ هنشيل اشواك المعاصى اللى غارزه فى قلوبنا امتى؟ تلاقى الشاب ممكن عينيه تدمع وتلاقى وشه يحمر وتلاقيه يقولك ياااااااااااه ده انا دا انا كل ما شوف واح صاحبى التزم كل ما اسمع عن الجنه والنار كل ما اسمع شريط او درس بيفوقنى و بيذكرنى بربنا ولقاء ربنا بحس ان انا مخنوق بحس ان انا بعيد اوى عن ربنا سبحانه وتعالى بحس ان انا حياتى لسه ملهاش معنى انا نفسى والله نفسى بحس ان اننا عايز اتوب عايز اسيب عايز اقرب من ربنا عايز بسمش قادر عايز وحاولت قبل كده بس كل اما اجى احاول نفسى تغلبنى كل اما اجى احاول انهزم قدام شهواتى حاولت قبل كده وقلت خلاص هسيب السجاير مش هرجعلها تانى يوم اتنين تلاته اسبوع اتنين خلاص يارب رجعتلك يارب نزلت ركبت مع اصحابى تانى فى العربيه اللى على يمينى مسك سيجاره واللى على شمالى مسك سيجاره قعدت نص ساعه بينهم مخنوق بقاوم بكل قوتى فى الاخر لاقيت نفسى بمد ايدى بختف سيجاره من ايد واحد منهم ورجعت للسجاير تانى قلت هسيب البنات خلاص خلاص نزلت النادى انا هقعد لوحدى مش هكلم حد مش هقع ابدا تانى شويه لاقيت نفسى زهقت قلت طب انزل طب اتمشى كده فى المشايه بتمشى لقيتهم انا بنفسى اللى رحت كلمتهم تانى يااااااااه دا انا عايز ربنا اوى والله العظيم بس مش قادر عايز بس مش قادر دا احنا يا جماعه دا احنا معظمنا بينتمى للنوع ده اللى نفسه يقرب من ربنا اللى عايش معذب لانه بيعصى ربنا بس مهوش قادر وخايف لو رجع لربنا ما يثبتش على طريق ربنا سبحانه وتعالى انت عارف النوع ده ربنا سبحانه وتعالى نزله سورة كامله فى القرآن سورة من السور اللى بنقراها كتير جدا بنقراها مرارا فى صلاة المغرب والعشا والفجر تتصور ربنا سماه ايه عارف ربنا سمانى وسماك ايه ( النفس اللوامه ) فى سورة القيامه يا جماعه الناس اللى عايشه فى غيبوبه لسه وعايزه صدمات كهربائيه تفوقها من الغيبوبه اللى هى فيها اربع صدمات كهربائيه فى سورة القيامه
قال تعالى : "لَا أُقْسِمُ بِيَوْمِ الْقِيَامَةِ " لا أقسم دا قسم مش مش قسم قسم بس لا دى لان ربنا غضبان غضبان ليه يارب ايه اللى غضب ربنا يا جماعه؟ معاصينا؟ ولا غفلتنا ؟ ؤولا مكبرتنا ؟ ولا ادعائنا ان احنا ما بنعصيهوش واحنا بنعصيه ليل نهار ؟ لا أقسم بيوم القيامه اول كلمه كده يارب يوم القيامه يوم القيامه اللى الرسول قال عليه عليه الصلاة والسلام " انه ما من صاحب ذهب ولا فضه " مفيش واحد ربنا اداله دهب و فضه مخرجش حقها . " الا ويأتى يوم القيامه فتصفح له صفائح من نار ويحمى عليها فى نار جهنم ثم يكوى به جبينه وجبهته وجنبه " اسمع يا أخى بالله عليك اسمعى يا اختى بالله عليكى " كلما بردت احمى عليها فى نار جهنم خمسين الف سنه " اله انا بقول الحديث ده ليه انا بقوله علشان نصدق ان فى ناس هتاخد الخمسين الف سنه عذاب الرسول بيقولك ايه " لا يأتينى الناس بالاعمال وتأتونى بالدنيا " ميجيش شاب زيه زيك بدروس وشرايط ودعوه وقيام تهجد وقرآن وصحبه صالحه وتيجى انت بأيه تيجى بالمعاصى والشهوات والذنوب على كتفك لا يأتينى الناس بالاعمال وتأتونى بالشهوات .
" وَلَا أُقْسِمُ بِالنَّفْسِ اللَّوَّامَةِ " النفس المذبذبه اللى سطر ابيض وسطر اسود اللى مره تعصى ومره تطيع اللى شويه هنا وشويه هنا النفس اللوامه اللى عايزه ترجع لربنا بس مش قادره تسيب المعصيه مشهد لا انساه ابد ( احد الشباب الله يرحمه كان توفى فنزلت الكليه بتاعته علشان اعرف المكان بتاع الدفنه فين لاقيت الاعلان متعلق فى الكليه ولاقيت اصحابه تحت الاعلان قاعدين البنات والولاد يجروا ويلعبوا مع بعض انا قعدت ابص كده مذهول ياربى هما مش زعلانين لا زعلانين يا جماعه امال ايه مش قادرين يسيبوا المعصيه بقت عبوديه بقوا مستعبدين مش عارفين يسيبوها )النفس اللوامه النفس المعذبه اللى جواها خير وجواها شهوه يجى يعمل الطاعه مش قادر انا عايز ارجع للدنيا تانى يجى يروح للمعصيه مش قادر انا نفسى ارجع لربنا تانى معذب وهو بيطيع ومعذب وهو مذنب معذب وهو بيصلى التراويح ومعذب وهو قاعد على القهوه ليه لانه مهوش كله لربنا النفس اللوامه النفس العاجزه يا جماعه مش قادر اه مش قادر طب تقدر على عذاب النار؟ لا مقدرش. طب تقدر على مقامع الملائكه ؟ لا مقدرش . طب تقدر على عذاب القبر اللى لو سمعنا صوته الوقتى الانس والجن هيموتوا من صوت استغاثات اللى بيعذبوا بس ؟ لا مقدرش . طب سيب مش قادر اذا كنت مش قادر على نفسك هتقدر على عذاب يوم القيامه ازاى ولا اقسم بالنفس اللوامه .
" أَيَحْسَبُ الْإِنسَانُ أَلَّن نَجْمَعَ عِظَامَهُ " انتوا فاكرين ايه ساعة البعث وانت طالع لحظه جمع العظام ممكن واحد اتقطع مليون حته فى الارض كل حته بتطير وبتتلم من الحته التانيه انت هتتلم حته حته ايد على رجل على ايد على رجل لغاية ما تبقى كامل اول ما تصحى هتلاقى اجزاء الناس بتتطاير كل حته بتروح للجسم بتاعها والناس بتتطلع من تحت الارض والاكفان بتتقطع " أَيَحْسَبُ الْإِنسَانُ أَلَّن نَجْمَعَ عِظَامَهُ " " بَلَى قَادِرِينَ عَلَى أَن نُّسَوِّيَ بَنَانَهُ " السته مليار بنى ادم كل واحد هيطلع وهيرجعله بصمة الصابع بتاعته تانى والسته مليار بنى ادم كل واحد هيجيله الصحيفه بتاعته تانى مفيش واحد هياخد صحيفة غيره ابدا . " أَيَحْسَبُ الْإِنسَانُ أَلَّن نَجْمَعَ عِظَامَهُ{3} بَلَى قَادِرِينَ عَلَى أَن نُّسَوِّيَ بَنَانَهُ{4} بَلْ يُرِيدُ الْإِنسَانُ... " عايز ايه الانسان البنى ادم عايز ايه انتوا عايزين ايه "لِيَفْجُرَ أَمَامَهُ" يعنى ايه ليفجر امامه يا جماعه فى شهوه احنا مسمعناش عنها كتير كتير منا مسمعش عنها قبل كده مش شهوة النساء ولا المال اسمها ( شهوة الفجور) يعنى ايه شهوة الفجور دى ركبت مع سواق ميكروباص قبل كده مشغل كاسيت يسمع عشر شوارع ؟ ده لو كان شهوة الكاسيت كان شغل على قده شوفت واحد صحبك قبل كده ماشى مع 150 بنت لو كانت شهوة نساء كان مشى مع واحده سمعت عن واحد قبل كده مراته جميله سابها وراح ماس الزنا مع واحده خادمه معندهاش اى حظ من الجمال لو كانت شهوة نساء كانت مراته اولى اذا دا دى شهوة فجور شهوة معصيه عايز يحس ان مفيش حاجه مقيداه "لِيَفْجُرَ أَمَامَهُ" مفيش حاجه واقفه قدامى تلاقى الشاب بيشرب السيجاره بيشفط الهوا بتاعها وبينفخه اوى لبره عايز يحس ان هو بيتنفخ تلاقى البنت عايزه تبقى بت ستايل ومتحرره واكتر بنت متحرره فى الجامعه ليه؟ ليفجر امامه مفيش اى حاجه واقفه قدامى ربنا بيقولك " أًمْ حَسِبَ الَّذِينَ اجْتَرَحُوا السَّيِّئَاتِ " نهشوها زى الكلب اللى بيلاقى جيفه وينهشها طب ليه نبقى كده يا جماعه ؟ليه نبقى كده ؟ ليه ؟
" أَيَحْسَبُ الْإِنسَانُ أَلَّن نَجْمَعَ عِظَامَهُ{3} بَلَى قَادِرِينَ عَلَى أَن نُّسَوِّيَ بَنَانَهُ{4} بَلْ يُرِيدُ الْإِنسَانُ لِيَفْجُرَ أَمَامَهُ " اول صاعقه نزله على عايز بس مش قادر .
1- " فَإِذَا بَرِقَ الْبَصَرُ{7} وَخَسَفَ الْقَمَرُ{8} وَجُمِعَ الشَّمْسُ وَالْقَمَرُ "
برق البصر الانفجارات الكونيه اللى بتحصل
خسوف القمر بيحصل لما الارض تبقى محطوطه ما بين الشمس والقمر فلما ربنا يقول بعدها جمع الشمس والقمر كأنهم يجمعوا يتطبقوا عليها يااااااااه الزلزال ده بيحصل ما هو ده زلزال الساعه الرهيب الزلزال الهائل اللى ربنا ذكره مش هتضحك عليه يوم القيامه
" إِلَى رَبِّكَ يَوْمَئِذٍ الْمُسْتَقَرُّ " راجع راجع خد بالك انك راجع راجع " يُنَبَّأُ الْإِنسَانُ يَوْمَئِذٍ بِمَا قَدَّمَ وَأَخَّرَ " كلمه كلمه زى الطالب اللى بيتصححله الامتحان بيتصححله كلمه كلمه ذنب ذنب فى يوم يوم وفساعه ساعه بما قدم واخر بعد ما الشاب عاش حياته فى الشتى فى الجامعه وبص لدى ووقف مع دى وكلم دى بيقولك لئن عشت حتى يأتى الصيف ليرين شباب رأس البر والساحل الشمالى ما اصنع مات قبل ما الصيف يجى ربنا ينبأه باللى عمله و اللى كان ناوى يعمله مين اللى كان ناوى فى العيد يرجع يعصى ربنا تانى مين اللى ناوى بعد رمضان يرجع يعصى ربنا تانى لو مت هتنبأ باللى عملته قبل كده وباللى كنت ناوى تعمله " يُنَبَّأُ الْإِنسَانُ يَوْمَئِذٍ بِمَا قَدَّمَ وَأَخَّرَ{13} بَلِ الْإِنسَانُ عَلَى نَفْسِهِ بَصِيرَةٌ " انت عارف وانا عارف انت عارف عينك عملت ايه عارف ودنك سمعت ايه عارف لسانك اتكلم مع مين واقلها ايه عارف ايدك اتصلت بمين فى شاب كان بيقولى انا مفيش حته فى جسمى معصتش ربنا انا معنتش طايق نفسى انت عارف فاكر فاكر كل مره وقفت فيها فى الجامعه عنيك جايبه اللى جايه واللى رايحه من فوقها لتحتها فاكر فاكر كل مره قعدت فيها من 8 بليل ل6 الصبح تكلمها فى التليفون فاكر فاكر كل مره ركبت فيها عربيه مع اصحابك وعصيت فيها ربنا قد ايه فاكره فاكره شعرك عصيتى بيه ربنا قد ايه فاكره لبسك عصيتى بيه ربنا قد ايه فاكره عنيكى كحلتيها وعصيتى بيها ربنا قد ايه فاكره ولو منتوش فاكرين فيه الشهود شهود الاثبات يا جماعه ليه ليه بصيت لها ؟ اصلها كانت حلوه اوى يارب والله هتقول كده لربنا يوم القيامه وده ليه سمعت الشريط ده ؟ اصل كان صوته حلو اوى يارب والله هتقول كده لربنا يوم القيامه ؟ وكان مالك بشكيره وبسكال واغانى شكيره وبسكال كان مالك بيهم كان شكلهم حلو ولا ايه الشاب اللى اتفرج على اغنيه لشكيره وبص من البلكونه لقى جارته فى وشه شهوته ثارت والعياذ بالله صمم انه يروح لها خبط وعمل انه محصل نور دخل عليها الباب اتهجم عليها قاومته ***ها بقى قاتل بسبب الشهوه بسبب شكيره هتنفعه لما يولع عليه قبر نار شكيره بأيه بقه ساعتها يا جماعه هتنفعه بأيه ؟ "َ بَلِ الْإِنسَانُ عَلَى نَفْسِهِ بَصِيرَةٌ{14} وَلَوْ أَلْقَى مَعَاذِيرَهُ " هتقول ايه ؟ هتقول ايه ؟ انت عارف انك كنت تقدر عارف انك كنت تقدر انك تثبت عارف ان اجمل يومين عشتهم فى حياتهم اليومين اللى دخلت فيهم بيت ربنا عارف ان حياتك وانت بعيد عن ربنا كان كلها اكتأب وضيق انت عارف هتقول لربنا ايه ؟ " وَلَوْ أَلْقَى مَعَاذِيرَهُ " طب يارب طب ارجع ازاى يارب طب انا عارف ان انا هرجع بس بنسى والله يارب دايما بنسى عايز تفضل فاكر " لَا تُحَرِّكْ بِهِ لِسَانَكَ لِتَعْجَلَ بِهِ " القرآن القرآن والدروس اللى بتتكلم على القرآن والدروس والشرايط اللى بتكلمك عن القرآن عايز تفضل فاكر ربنا عايز تفضل فايق من الغيبوبه عايز تاخد حقن يقظه قلبيه تفوقك من الغيبوبه كل ما تيجى عليك خليك دايما بتسمع قر آن و بتقرأ القرآن ومع الشرايط ومع الدروس خليك دايما مع الاماكن اللى بتفكرك بربنا سبحانه وتعالى الصاعقه التالته الصدمه الكهربائيه التالته .
2-" كَلَّا بَلْ تُحِبُّونَ الْعَاجِلَةَ " العاجله الدنيا ما هو ادى شاب و ادى شاب الاتنين اههما ده راح سهر طول الليل فى القهوه وده سهر طول الليل يصلى لربنا والاتنين ناموا ده صحى نشيط اللى سهر طول الليل يصلى وفرحاااان وده صحى مكتأب وقرفااااان واللى صحى نشيط وفرحان عبى شنطة حسنات وده عبى شنطة سيئات وفى الاخر لا ده فاكر تعبه ولا ده فاكر لذته حد منكوا فاكر العطش اللى عطشه انهارده بالنهار؟ انا مش فاكر يبقى محدش مننا فاكر يا جماعه كل حاجه بتروح وبيبقى الثواب او العقاب و " كَلَّا بَلْ تُحِبُّونَ الْعَاجِلَةَ{20} وَتَذَرُونَ الْآخِرَةَ " سيبك منها " وُجُوهٌ يَوْمَئِذٍ نَّاضِرَةٌ{22} إِلَى رَبِّهَا نَاظِرَةٌ " الله يارب هنبقى منهم استنى متفرحش شوف النوع التانى
" وَوُجُوهٌ يَوْمَئِذٍ بَاسِرَةٌ" مخسوف بيها وشه مخسوف من كتر الرعب اللى هو فيه " تَظُنُّ أَن يُفْعَلَ بِهَا فَاقِرَةٌ " فاقره عارفين يعنى ايه يا جماعه عارفين لما تيجى خبطه فى العمود الفقرى تشل الانسان ؟ اهو كده معتقد انه هيتشل هيتقيد هيتسلسل هيتغلغل هيحصل فيه اى حاجه هيتشل مش هيقدر يعمل حاجه طب ليه جب الظن ده منين ماهو شاف قدام عينه شاف قدام عينه اللى عملوا نفس المعاصى اللى هو عملها قبل كده شاف واحد بيتجرجر على وشه لجهنم شاف واحد مقبوض عليه بالملايكه ورايح يعرض على الله على وشه رعب لو اتوزع على وجه الكره الارضيه كلها يفيض وشاف لسان من جهنم طلع خطف واحد ودخله تانى وشاف واحد على الصراط قاعد يتعلق وهو بيقع فى النار ويحاول يتعلق وفى الاخر وقع واتكوى فى النار وشاف واحد العرق بتاعه لجمه معدش عارف ينطق من الذنوب وشاف واحد بيلف على واحد واحد فى ارض المحشر قاعد يتوسل اليه يديله حسنه واحده ومفيش حد راضى يديله حسنه " تَظُنُّ أَن يُفْعَلَ بِهَا فَاقِرَةٌ " الصدمه الكهربائيه التالته .
3- " كَلَّا إِذَا بَلَغَتْ التَّرَاقِيَ " مشهد الاحتضار ياااااااااه كان الواحد زمان اول ما التزم المشهد ده بالذات هو اللى كان بيزلزل الواحد كان الواحديقعد يفكر كده يا ترى لما هاجى اموت هقدر اقول ( لا اله الا الله ) ولا لأ ولما اجى اموت هندم عن عمرى اللى فات ده ولا هبقى راضى عن عمرى اللى فات واللى عملته فيه ولما اجى اموت اللى هينزلولى ملايكه بيض الوجوه بيض الثياب ولا سود الوجوه سود الثياب ولما اجى اموت ملك الموت هينزع روحى زى ما ينزع السّفوت من الصوف المبلول ولا روحى هتخرج تسيل كالقطره ولما اجى اموت مين اللى هيصلى عليه ؟ واحده ميتمكيجه المكياج بتاعها هيسيح من الحر ونص اصحابى مش هيصلوا عليه لانهم مبيصلوش اصلا ولا ناس ملتزمه وعارفه ربنا والدعوه بتاعتها مستجابه لما تدعيلى بالرحمه ولما اجى اموت ولما اجى اموت بعد 3 ساعات بس من موتى هيبقى الحفره اللى اترميت فيها قبر هيبقى الحفره اللى اترميت فيها حفره من حفر النار تابوت جمر ولا هتبقى روضه من رياض الجنه يا ترى يا جماعه لو فكرنا بالطريقه دى هنفضل زى ما احنا كده " كَلَّا إِذَا بَلَغَتْ التَّرَاقِيَ " ربنا بيجبلك مشهد الموت فى الاخر ليه ؟ ان امر هذا اخره لحرى بأن يزهد فيه دا اخر الدنيا دا اخر القهوه دا اخر الجامعه دا اخر الاختلاط دا اخر المعاصى دا اخر الشهوات هى دى اخرتها هى دى اخرتها وما بقى كان اعظم مشهد الصراط والبعث والقنطره والعرض على الله والطرد من على حوض النبى كل المشاهد دى لسه موجوده يوم القيامه " كَلَّا إِذَا بَلَغَتْ التَّرَاقِيَ{26} وَقِيلَ مَنْ رَاقٍ " مين اللى هيطلع بروحك للسما مين ؟ ملايكة الرحمه ولا ملايكة العذاب
" وَظَنَّ أَنَّهُ الْفِرَاقُ " خلاص هافارق كل حاجههافارق الفلوس اللى عشت حياتى عشانها هافارق الشهوات هافارق اصحابى هافارق اللى اديت ضهرى لربنا عشانها و انتى هاتفارقى اللى انتى بعدتى عن ربنا عشانه هافارق اصحابى معقوله سيييب سيب من الوقتى اللى بيسولك المعصيه انك تعصى ربنا سيب من الوقتى اللى ملالك الهارد ديسك بتاعك كليبات سيب من الوقتى اللى بيديك اخر شريط نزل عشان تسمعه سيب من الوقتى اللى بيبعدك عن ربنا و يبعدك عن طريق ربنا علشان ساعة الموت اللمه دى كلها كل واحد هيروح لربنا لوحده ونتقابل تانى ونتجمع تانى يوم القيامه بس ساعتها ( الأخلاء بعضهم لبعض يومئذ عدو ) عدو يعنى ايه ؟ يعنى الشله بتاعة الجامعه اللى كنت معاها فى الجامعه الصبح وبليل فى القهوه وبكره فى الرحله وفى الصيف فى المصيف وفى لجنة الامتحانات قاعدين تغشوا من بعض تبقوا اعداء طب ولوا توبنا وعرفنا ربنا تبقوا حبايب وتشفعوا لبعض وتاخدوا ايديكوا فى ايدين بعض وانتوا داخلين الجنه يااااااه يارب " وَظَنَّ أَنَّهُ الْفِرَاقُ{28} وَالْتَفَّتِ السَّاقُ بِالسَّاقِ{29} إِلَى رَبِّكَ يَوْمَئِذٍ الْمَسَاقُ{30} فَلَا صَدَّقَ وَلَا صَلَّى " جايلك يارب وانا الرصيد بتاعى فاضى جايلك يارب وانا مشطب حسانات جايلك يارب وانا ذنوبى جباااال والحسنات بتاعتى حتة كومه صغيره جنبها
" فَلَا صَدَّقَ وَلَا صَلَّى " يا جماعه يا شباب " أَيَحْسَبُ الْإِنسَانُ أَن يُتْرَكَ سُدًى " ايحسب الشباب ان يتركوا سدى ؟ايحسب البنات ان يتركن سدى ؟ ايحسب الآباء والامهات ان يتركوا سدى ؟ انتوا فاكرينها ايه فاكرينا نازلين من الجنة علشان رحله مختلطه زى رحلات يوم الجمعه الصبح نيجى نتقابل مع بعض ونضحك مع بعض ونرجع الجنه تانى ؟ فاكرينها فسحه ؟ فاكرينها نزهه ؟ دا احنا نازلين هنا عشان مقصد عشان هدف ربنا منزلنا هنا عليه " أَلَمْ يَكُ نُطْفَةً " " أَلَمْ يَكُ نُطْفَةً مِّن مَّنِيٍّ يُمْنَى{37} ثُمَّ كَانَ عَلَقَةً ...." انا وانت وانتى كنا علقه اتنين ملى كان كل واحد مننا اتنين ملى وجايين دلوقتى بنتنطط وبنتكبر على الارض دا انتوا كنتوا اتنين ملى يا جماعه هنّكبر على ايه ؟ وهنفرح بأيه " ثُمَّ كَانَ عَلَقَةً فَخَلَقَ فَسَوَّى{38} فَجَعَلَ مِنْهُ الزَّوْجَيْنِ الذَّكَرَ وَالْأُنثَى{39} أَلَيْسَ ذَلِكَ بِقَادِرٍ ....." مهوش قادر ؟ مهوشقادر انه يعاقبك لو اغضبته مهوش قادر انه يعقبك لو عذبته ؟ بلى قادر هنفوق امتى يا جماعه هنفوق امتى هنفوق من الغيبوبه اللى احنا فيها امتى هنستعد لاول ليله فى القبر امتى ؟ هنستعد لاهوال يوم القيامه امتى يا جماعه ؟ هنشيل اشواك المعاصى من قلوبنا امتى يا جماعه ؟ هنفرح ربنا بالتوبه الصادقه اليه امتى يا جماعه ؟ هنبقى محناش من النفس اللوامه ونبقى النفس المطمئنه بالطاعه امتى يا جماعه ؟ امتى ؟ امتى يا شباب ؟ والله يا جماعه الواحد بيستغرب اللى مستنيه كل الاهوال دى ازاى يعيش حياته مطمن كده ازاى ؟ ازاى ميعملش حساب الكلام ده كله ؟ انا عايز مننا ايه الليله ؟ انا عايز منكوا ايه الليله ؟ انا عايز يا جماعه سورة القيامه السوره بتاعة ( عايز بس مش قادر ) سورة القيامه بتاعة كل واحد عايز ومش قادر سورة القيامه السورة بتاعته يروح الليله ينام او ماينمش يجى كده بعد شويه يقوم يصلى ركعتين بسورة القيامه ويبكى لله ويتضرع لله والواحد يفتكر زمان كان الشاب من شباب الجامعه مننا ايام ما كنا فى الجامعه كان الواحد والله يا جماعه يقوله توب كلمتين بس تلاقى نفسك توبت على طول الوقتى القلوب تقيله ليه القلوب غليظه ليه الواحد بيقعد يتكلم عن النار ويلاقى القلوب لسه غليظه ليه ؟ او يكلم عن الجنه او يكلم عن حب الله معدش حاجه بتأثر فينا ليه ؟ خلاص شكيره نستنا ربنا ؟ خلاص عجرم نستنا ربنا؟ ربنا خلاص الكليبات والدش نسونا ربنا ؟ خلاص استغنينا عن سكتك يارب لاقينا الدش لاقينا الجنه بتاعتنا هى دى الجنه اللى عايزنها ؟ خلاص اصحابنا وشلل الجامعه والقهوه والنادى نسونا ربنا يا جماعه ؟ خلاص ولا ايه يا جماعه ؟ ولا لسه فينا امل ؟ ولا لسه عايزين بس مش قادرين ؟ خلاص عرض قلبك زى القلب اللى بيموت فى العنايه المركزه الدكتور يدخل يعمله شحنه كهربيه يفوقه علشان يقوم تانى سورة القيامه بتفوق قلبك بأربع شحنات كهربائيه ربانيه من عند الله عشان قلبك يحي تانى الليله ان شاء الله كل واحد مننا يصلى ركعتين بسورة القيامه ويبكى لله ويتضرع ليه ويقوله يارب انا عايز بس مش قادر ومفيش امل غير فيك يارب
اقول قولى هذا واستغفر الله لى ولكم

[asma22]

موضوع جميل جدااااا جدااااااا
جزاكى الله كل خير على كل كلمة كتبتيها
اللهم رد المسلمين الى الاسلام ردا جميلا يارب
ده حال الشباب الوقتى فى الزمن ده عاوزين يرجعوا بس نفوسهم ضعيفة
ربنا يهدى كل عاص ويهدينا جميعا ويثبتنا هو القادر على كل شئ
جعل الله لكى هذا الموضوع فى ميزان حسناتك

[eng_emy]

المشاركة الأصلية كتبت بواسطة asma22

موضوع جميل جدااااا جدااااااا
جزاكى الله كل خير على كل كلمة كتبتيها
اللهم رد المسلمين الى الاسلام ردا جميلا يارب
ده حال الشباب الوقتى فى الزمن ده عاوزين يرجعوا بس نفوسهم ضعيفة
ربنا يهدى كل عاص ويهدينا جميعا ويثبتنا هو القادر على كل شئ
جعل الله لكى هذا الموضوع فى ميزان حسناتك

شكرا يا قمر على ردك
وياااااااااااارب كلنا نقرب من ربنا
ويهدى كل عاصى
اللهم امييييييييييييين

[طبيبة اسنان مسلمه]

ربنا يهدى كل عاصى
ويثبت كل من اهتدى بهدى الله
ويهدى شباب المسلمين ويردهم اليه ردا جميلا
وجزاكم الله خيرا على الموضوع

[هنا الفقي]

مش عارفة
انا رديت هنا من قبل بس ردي ما وصلش

عموما يارب يجزيكي كل خير يا ايمي ويجعلك بكل حرف جبال وجبال وجبال واضعافها من الحسنات في ميزانك يا رب

[eng_emy]

المشاركة الأصلية كتبت بواسطة هنا الفقي

مش عارفة
انا رديت هنا من قبل بس ردي ما وصلش

عموما يارب يجزيكي كل خير يا ايمي ويجعلك بكل حرف جبال وجبال وجبال واضعافها من الحسنات في ميزانك يا رب
ياااااااااااااااااااارب ويجازيكى كل خير

ولا يهمك يا قمر
المهم يارب يكون عجبك الموضوع

ويارب نقرب كلنا من ربنا

[هاوى إبداع]

بجد موضوع مثير جدا وجميل
دمت متميزه

[يالا بينا]

الله يباركلك
بس ياريت يبقى فيه تحرك بعد الكلمتين دول
مش انت تقوليهم.........وانا اقولهم.......وفلان يقولهم.........وبعد كام سنة....
محلك سر
بجد تستاهلي اجمد تحية