###لا ترضي لنفسك بأقل من ذلك !!! رائعة ###

أ / طارق عتمان · #1 25-09-2009, 12:23 AM

بسم الله الرحمن الرحيم
السلام عليكم ورحمة الله وبركاته
أقدم لكم هذه القصة العجيبة

وأرجو ممن يستطيع إعادة تنسيقها علي الباور بوينت أو غيره من برامج العروض الجذابة أن يفعل ذلك فله الأجر إن شاء الله

والآن مع القصة
مرجان خليل شاب اسكندراني ...... عارفه ؟ ..... أكيد لأ ......
مرجان يا سيدي واحد زميلي حصل له موقف وهو مسافر غير حياته كلها ......
طبعًا حتسألني موقف إيه دا اللي غير حياته كلها؟ ...... أنا اندهشت برضه زيك كده لكن علي إيه الدهشة !!! ... ما تيجي أحكي لك الحكاية زي ما سمعتها منه .
في يوم قابلته وسألته ... إيه يا عم مرجان مالك ؟ شايفك من فترة حالك متغير ...... فيه إيه ؟
فرد عليا قائلا : فعلا كلامك صحيح .
قلت : يا تري إيه السبب ؟
مرجان : السبب يا سيدي سفرية للقاهرة . !!!
أنا : يا سلام سفرية للقاهرة تعمل فيك كل ده !!! ليه كنت رايح تحج ولا إيه ؟
مرجان بكلمك بجد السفرية دي حصل فيها موقف غير تفكيري في حياتي كلها. وكان السبب في تغيير حياتي للأفضل .
أنا : احكي يا سيدي موقف إيه ده اللي عمل فيك كل دا !! وبدأ الحديث .
مرجان : يوم الاثنين اللي فات كنت سهران و مشغول بتجهيز طلبات السفر وصحيت بدري من النوم فكنت جعان نوم فلما ركبت القطار ربنا كرمني ولاقيت كرسي فاضي بجوار راجل كبير في السن وشابين ...... المهم ...... جلست علي الكرسي ولدي رغبه في النوم وفعلا غمضت عيني استعدادا للنوم ... لكن الراجل الكبير بدأ يتحدث مع الشاب الذي يجلس أمامه .. وبدأ الحديث بسؤال جعلني أنتبه رغم أني مغمض العينين ... بيني وبينك السؤال شدني ...... وخلاني أشك في الراجل أنه مجنون أو دماغه فيها حاجة .
أنا : سؤال !! سؤال إيه ؟؟؟
مرجان : سأله : لو سمحت ممكن تقول لي العلاقة بين البطاطا والجنة والحديد ؟ ؟ ؟ وقيمتك عند الناس وربنا ؟؟؟ ... فبدت علامة الاستغراب والدهشة علي وجه الشاب . ... وبيني وبينك فكرت أسيب المكان . ... لكن صعب عليا أسيب الكرسي وأسافر المسافة الطويلة دي وأنا واقف ... فقررت البقاء في مكاني واعمل نفسي نايم . ... لكن الراجل سأل الشاب الثاني فلم يستطع الإجابة وطلب منه بأدب شديد ... وقال له ... طيب ممكن حضرتك تجاوب لنا لأننا بصراحة مش عارفين الإجابة . ... فابتسم الرجل قائلا ... علي فكرة وأنا عارف إن سؤال غريب لكن الإجابة حتوضح لكم أمور خافية عليكم وهتستفيدوا منها إن شاء الله . وقال الشاب الأول : اتفضل حضرتك فأنا آذان صاغية .
فقال الرجل : أنا اسكندراني زيكم ولي 25 سنة بسافر في شغلي في دمنهور يعني ساعة رايح وساعة جاي ... يعني ساعتين ... وفي مرة وأنا مسافر قرأت خبر عن قطعة الحديد نشر في مجلة أمريكية لو بيعت خرده تباع بما يعادل 2 كيلو بطاطا ، ولو بيعت خام تباع بـ 5 دولارات ، ولو اتعمل منها حدوات فرس تباع بـ 15 دولار ولو اتعمل منها ابر خياطة تباع بـ 3285 دولار ولو اتعمل منها زنبركات ساعات يدوية تباع بربع ملون دولار فهزني الخبر .
فقال أحدهم هو فعلا خبر غريب ولكن هزك ليه يعني ؟
فقال الرجل لأن الفرق شاسع بين 2 كيلو بطاطا و ربع مليون دولار .
فقال أحدهم : فعلا الفرق شاسع جدا .
فقال الرجل : عارفين السبب في كدة إيه ؟
فقال أحدهم : طبعا طريقة استغلال القطعة وتصنيعها .
مرجان : طبعا أنا النوم راح من عيني تماما وفتحت عيني تماما وتأكدت أن الرجل مش مجنون ولا حاجة ... المهم الراجل بدا يوجه كلامه لنا كلنا.
فقال الرجل : يا شباب كل واحد منكم ربنا أعطاه قطعة حديد .... اسمها ( العمر ) وعلي قدر اهتمامك واستغلالك له هتكون قيمتك عند ربنا والناس وطريقة استغلالك لوقتك هي اللي هتحدد مصيرك يوم القيامة .
فقال مرجان : ازاي يعني ؟
فقال الرجل : يا بني لو أن إنسان عاش 60 سنة متوسط نومه 8 ساعات يوميا يعني ثلث عمره نائم يعني 20 سنة مخصومين من عمره ... والإنسان العاقل هو اللي لابد يفكر في حياته كيف تسير حتي لا يفاجأ يوم القيامة بصحيفة أعماله فاضية من الحسنات دا إذا ما كانتش كلها سيئات ! يعني أنا بسافر ساعتين يوميا . أنتو عارفين ساعتين من الـ 16 ساعة الباقيين من اليوم يعني ثمن ( 1 / 8 ) عمري باقضيه في المواصلات يعني صاحبك اللي حيعيش 60 سنة ... نام 20 سنة من عمره والساعتين اللي بيقضيهم في المواصلات بيعملوا 5 سنين ....... تخيلوا 5 سنسن بيضيعوا في المواصلات وهو مش حاسس
فقال مرجان : طيب حضرتك دلوقت وضحت العلاقة بين الحديد والبطاطا لكن إيه دخل الجنة في الموضوع ؟؟؟
وإيه علاقة قيمتي عند الناس وقيمتي عند ربنا بالجنة والبطاطا والحديد ؟ ؟
فقال الرجل : يا بني أي عمل في الدنيا يحتاج وقت ... ببساطة اللي بيضيع وقته بيضيع نفسه يعني عندك السفر اليومي للعمل ساعتين يوميا ... تخيلوا ممكن الواحد يعمل فيهم ايه ؟؟؟؟؟
فقال أحدهم يعني الواحد بيسلي نفسه بكوتشينة أو ينام أو يقرأ جرنال أو يتفرج علي الناس ... ومعلش يا عم الحج يعني بعض الشباب يعاكس بنات ... وناس تانية بتتسلي بالموبايلات ... وبعض زمايلنا معاه إم بي ثري أو موبايل عليه شوية أغاني يقعد يسمعها ... يعني أهي تسليه عشان السفر مايكونش ممل .
فقال الرجل : يا تري الحاجات دي هتفرح صاحبها لما يلاقيها مكتوبة في صحيفة أعماله ؟ يوم القيامة ....
فرددنا جميعا : بالطبع لا لكن هنعمل ايه يعني ؟؟؟ ثمّ إنّ كل الناس والشباب بيعملوا كده .
فقال الرجل : الناس اللي بتعمل كده عاملة زي اللي باع قطعة الحديد بـ 2 كيلو بطاطا وهو ممكن يبيعها بـ ربع مليون دولار ... والإنسان العاقل يستطيع أن يكون السفر بالنسبة له فرصة يومية لزيادة قربه من الله وزيادة احترام الناس له .
فقال مرجان : ازاي يعني ؟؟؟
فطلب الرجل مني أن أشغل ساعة الايقاف بتاعة الموبايل وطلب من زميلي أن يقول " سبحان الله " 100 مرة وبعد أن أنتهي زميلي سألني كم أخذ من الوقت ؟ ؟ ......
بصراحة لم أكن أتوقع ذلك أبدا .... فقد كانت المدة دقيقة و 6 ثوان وفاجأنا الرجل بقوله هل تعلمون ؟؟؟ زميلكم الآن اكتسب 1000 حسنة لأن رسول الله صلي الله عليه وسلم قال لأصحابه يوما : أيعجز أحدكم أن يكسب كل يوم ألف حسنة فسأله سائل من جلسائه : كيف يكسب أحدنا ألف حسنة ؟ قال : يسبح مائة تسبيحة فيكتب له ألف حسنة أو يحط عنه ألف خطيئة صدق رسول الله صلي الله عليه وسلم .
تخيلوا يا شباب صفحة المصحف حوالي 600 حرف وتقرأ فيها لا يزيد عن دقيقتين يعني 600 حسنة لأن الحرف بعشرة حسنات ... تخيلوا خبراء التنمية البشرية قالوا : إنّ الإنسان إذا قرأ في أي مجال نصف ساعة يوميا لمدة 5 سنوات لأصبح خبيرا في هذا المجال ... لأن هذا معناه أنه قرأ أكثر من 900 ساعة في هذا المجال .... يعني واحد زي حالاتي في ساعتين السفر دول ممكن أقرأ جزء قرآن في نصف ساعة يعني 120 ألف حسنة ويقول سبحان الله والحمد لله ولا إله إلا الله والله أكبر 100 مرة في 5 دقائق واحسبوها بساعة الإيقاف بتاعة الموبايل ... وعلي فكرة هذا الذكر له أجر عظيم جدا تخيلوا كل ده في 36 دقيقة ولو قرأت في كل يوم 10 صفحات في كتاب معين متوسط الحجم دا معناه أني سأقرأ كتاب جديد كل 20 أيام يعني 18 كتاب في السنة علي الأقل علي اعتبار أن الكتاب 200 صفحة والصفحة بتاخذ دقيقتين ونصف. ...
تخيلوا كل إللي قلناه دا في 60 دقيقة فقط شوفتم ياشباب إحنا بنضيع كتير ازاي. ....
فقال مرجان بصراحة أنا طول عمري أكره السفر . أنت خليتني أحبه ....
فقال الرجل فيه حاجات تانية ممكن تخلي السفر وسيلة لزيادة القرب من الله وزيادة الحسنات ......
فقال مرجان زي إيه ؟؟؟؟؟؟
فقال الرجل : يعني لو حفظت سطر قرآن وأنت رايح وسطر وأنت جاي هتحفظ صفحة في الأسبوع ... وممكن بالدعاء لكل من تحب من المسلمين وممكن الاستغفار و دعاء السفر وعلي فكرة الحاجات دي أوتوماتيك هتمنع الشباب من النظر إلي البنات وارتكاب ذنوب كبيرة .... الكلام دا عشان ياخد شكل جاد يدفعك للإستمرار حاول تعمل جدول تحدد فيه الكتب اللي هتقرأها كل شهر والأذكار اللي هتقولها... جرب أسبوع وستجد سعادة كبيرة في سفرك.واستمتاع . وخلوا بالكم الشيطان هيصعب لك الموضوع في البداية وحيحاول ينسيك الكلام ده بكل قوته ... لأنك لو نفذت اللي قلناه فهذا يعني أنك هتكسب خمس سنين من عمرك كانوا ضايعين ... والذكي منكم وأعتقد أنكم كلكم أذكياء ينشر الفكرة دي بين أكبر عدد ممكن من أصحابه لأن الدال علي الخير كفاعله كما قال رسول الله صلي الله عليه وسلم .. يعني كل واحد يقتنع بالفكرة دي بسببك معناه أن أعماله الصالحة لمدة خمس سنوات وأكثر في ميزان حسناتك .... آسف مضطر أسيبكم لأن محطتي جات ألقاكم علي خير .........
فقلت لمرجان : ربنا يكرم الراجل ده وأمثاله والله أنا نفسي اتغيرت والحمد لله إني سمعت الكلام ده قبل ما يفوت الأوان ......