رابطه المجموعة الطبية

[شريف ابوالنصر]

دي مجموعة قواميس اعتقد انها لأي طالب طب اسنان مفيدة فعلا...
وكل واحد منها نوع مختلف

الرابط الاول ده رابط لموقع مخصوص للترجمة من لغة لأخرى
http://www.dental-dictionary.info/ar...ictionary.html

وده برضه رابط لموقع لكنه للترجمة من الانجليزية للانجليزية مع استفاضة في الشرح
كذلك مع الصور.
http://www.answers.com/library/Denta...nary-letter-1M

اما ده فهو رابط قاموس مصور للتحميل
http://mwaffak.diinoweb.com/files/dental%20dictionary%201.rar

[شريف ابوالنصر]

بسم الله الرحمن الرحيم

السلام عليكم أطباء وطبيبات الإسلام
كل سنة وانتم طيبين

النهارده هناخد مقدمة بسيطة عن مادة الفسيولوجى

وهى مادة بسيطة ولذيذة وأكثر مادة هتحبوها – إن شاء الله –

لإنها محتاجة فهم وهتشغل مخك

حد هيسألنى أنا مش فاهم إيه الفسيولوجى ده ؟

آه عرفت إن الترجمة يعنى علم وظائف الأعضاء

ماشى

بس يعنى إيه علم وظائف الأعضاء ؟؟!!!!!

بص يا سيدى

بمعنى اننا هندرس ازاى العضو بيؤدى وظيفته ... وعشان نعرف ازاى العضو بيعمل وظيفته يبقى هندرس تركيبه الاول ( وهو ده التشريح ) وهندرس كمان تركيب الانسجة اللى ف العضو ده ( وهو ده الهستولوجى ) وممكن كمان نحتاج نتعرف على بعض التفاعلات الكيميائية ( وهى دى الكيميا الحيوية )

يعنى الفسيولوجى بيشرحلك كل عضو Organ

أو نظام system

أو هرمون أو إنزيم أو إى حاجة فى الجسم بتشتغل إزاى

وظيفته ايه؟

ليه بيعمل كده ؟

ازاى بيعمل كده ؟

ايه الحاجات اللى بتأثر فى شغله ؟

وازاى كل حاجة مخلوقة بحيث تناسب وظيفتها ؟

ولو حصل خلل ممكن يحصل فين ؟

وايه المرض اللى ممكن ينتج عن كده ؟

طيب هوا هيفيدنى فى ايه ؟؟

مهم جدا إنك تبقى فاهم الدنيا ماشية ازاى جوا كل حاجة خطوة خطوة

بحيث لما يحصل خلل فى مرحلة معينة هينتج مرض

طيب انتا هتخمن إن الخلل يإما فى المرحلة دى او دى أو دى

وهتعمل تحاليل توصلك للمرحلة اللى فعلا حصل فيها الخلل

وده مهم جدا فى الباطنة بعد كده بإذن الله

طيب هوا احنا بناخد فيها ايه المادة دى ؟؟

المادة دى بناخدها على سنتين أولى وثانية

سنة أولى

بناخد

ANS(Autonomic Nervous System) الجهاز العصبى اللإرادى

Bloodالدم

Cardiovascular System نظام القلب والأوعية الدموية

Respiration التنفس

Nerve & Muscle الأعصاب والعضلات

وفى ناس بتاخد G.I.T فى أولى برده

فى سنة تانية

بناخد

Endocrine الغدد الصماء

Digestive System الجهاز الهضمى

Metabolism الأيض (الهدم والبناء )

Kidney الكلية

CNS (Central Nervous System ) الجهاز العصبى المركزى

special senses الحواس الخمسة

طيب هوا يعنى ايه كل فرع وبناخد فيه ايه ؟؟

ANS

بناخد فيه مقدمة عامة عن تكوينه

وهو عبارة عن جهازين

الجهاز السمبثاوى (اللى بيشتغل أثناء الطوارىء )Sympathetic

و الجهاز الباراسمبثاوى (اللى بيشتغل أثناء الراحة )Parasympathetic

وبعدين بندرس النواقل العصبية

Chemical Transmitters

Blood

وده بندرس فيه تركيب الدم ومحتوياته وازاى بتحصل عملية التجلط وبنتعرف على المناعة وازاى جسمنا بيقدر يواجه أى
جسيم غريب يدخله

Cardio

وهوا فرع مهم جدا وهيفيدنا جدا فى الباطنة بعد كده زى رسم القلب ECG

وبندرس فيه حاجات زى معدل ضربات القلب وضغط الدم وقطر الأوعية الدموية والحاجات اللى بتأثر على كل حاجة فيهم

Respiration

بناخد فيه

كل ما يتعلق بالجهاز التنفسى

من

* تركيب الجهاز التنفسى

* وازاى بتحصل عملية تبادل الغازات

* وايه دور الدم فى عملية التنفس؟

*/ وازاى التنفس بيتنظم فى الجسم ؟

* وتأثير نقص الأكسجين على الجسم

Nerve & Muscle

بندرس فيه

* الأعصاب وخصائصها والتغيرات اللى بتحصل أثناء نقل الإشارة العصبية

* والوصلة العصبية العضلية

* والعضلات

·تركيبها

·أنواعها

· ازاى بتنقبض

· التغيرات اللى بتحصل فيها أثناء الحركة

درجات المادة

500درجة مقسمة على سنتين 250 لكل سنة
125 درجة امتحان نظرى اخر العام توزيع الدرجات :
درجة امتحان العملى25
50درجة الشفوى ( لجنتين)

باقى الدرجات بتبقى 50 درجة ف ايد رئيس القسم بيعمل بيهم امتحانات اعمال السنة (ال20 % ) ودرجات الغياب فى السكاشن وما الى ذلك

وده فى معظم الكليات

طيب هوا ايه العملى ده ؟؟

امتحان بسيط على شوية تجارب هناخدها فى BLOOD , NERVE& MUSCLE

والكارديو وغالبا بيكون امتحانها تحريرى وشفوى بدلا من إنك تعملها بإيدك

يعنى تدخل فى الامتحان تكتب التجربة وبعدين دكتور يسألك فيها شفوى

[شريف ابوالنصر]

بسم الله الرحمن الرحيم


بعد التحية والسلام على خير الانام سيدنا محمد عليه افضل الصلاة وازكى السلام ...

هنبدا مع حضراتكم مقدمات في مادة HISTOLOGY لطلبة سنة اولى الجدد



اولا يعني ايه HISTOLOGY

الهستولوجي هو العلم الذي يدرس تركيب الخلايا والأنسجة

وعلى فكره احنا خدنا اغلب الهستولوجي ده في الاحياء في الدراسة الثانوية

هي كل الحكاية اختلاف اللغة

طيب نظام الماده ده ايه

الماده ده من 150 درجة

تقسيمهم ازاي بقه


75 درجة نظري في ورقة الامتحان

15 شفوي

30 عملي

30 أعمال سنة

وهو توزيع قابل للاختلاف بين الكليات

عشان اكون صريح معاكم

الماده ده اول السنة اول ما هتبداها هتكرها وهتبقى مش طايق تفتحها

ده عادي جدا لان الماده بتعتمد على الحفظ بدرجة كبيره

بس بعد ما تدرس الاربع المواد هتلاقي ان الهستولوجي هو اسهل ماده

اولا هي اسهل ماده تتلم يعني لما تتاخر في مذاكرة محاضره او اتنين هتعرف تلمهم بسهولة

لو فاتتك محاضره مش هتعمل مشكله اوي وممكن تعرف تذاكرها لوحدك

نيجي بقه للمنهج
ايه محتواه

اولا CYTOLOGY ده بيدرس مكونات الخليه وكل حاجه فيها بالتفصيل الممل زي النواة والميتوكندريا وغشاء الخليه ... إلخ هتدرس طولها وعرضها وقطرها ومكانها في الخليه ووظيفتها وكده يعني


ثانيا BASIC TISSUES

يعني ايه يعني بندرس كل انسجه الجسم الرئيسية وهم اربع انسجه

EPITHELIAL TISSUE
اللى هو النسيج الطلائي

CONNETIVE TISSUE

اللى هو النسيج الضام

وده بيندرج تحته 3 شباتر كمان اللى هم

cartilage الغضروف
bone العظام
blood الدم

muscular tissue اللى هو النسيج العضلي

nervous tissue اللى هو النسيج العصبي

ثالثا vascular

هو ايه ده
ده شابتر هندرس فيه الاوعية الدموية يعني الشرايين والاورده وكده


رابعا lympoid

طبعا اللى بيقرا دلوقت بيسمع مصطلحات غريبه وهيتخض منها في الأول

عموما لما تدخل السنة هتعرف انها سهله جدا والله

الشابتر ده بيدرس الجهاز الليمفاوي اللى بيدي الجسم المناعه زي الطحال والغدد اللمفاوية واللوز وكده



خلااااااااااص

كده المحتوى خلص


طب نتكلم بقه عن الهستولوجي عامه

العملي بتاع الهستولوجي مهم جدا

طب بيتكون من ايه العملي ده

العملي فيه جزئين

رسومات وشرايح

ايه الشرايح ده

الشرايح هي عبارة عن بعض الحاجات اللى هتاخدها زي خلايا الدم مثلا زي الطحال والحاجات ده هتشوفها تحت الميكرسكوب

وفي الامتحان بتعدي على حوالي 20 ميكرسكوب مدتك على كل واحد دقيقه والمفروض تتعرف على الشريحه والصبغه اللى مصبوغ بيه الحاجه اللى تحت الشريحه

الصبغات ده حكايتها سهله وهنتكلم عنها قدام شوية


طيب والرسومات

الرسومات هي رسمة لكل حاجه بتاخدها وهي امرها سهل

بس فيه نوعين من الرسومات

E.M اللى هي بالمكرسكوب الالكتروني وده بتترسم بالقلم الرصاص

L.M اللى هي بالمكرسكوب الضوئي وده بنلونها

اما بالاحمر والازرق وده عشان بنصبغها بصبغه اسمها H & E ده اختصاء وهتعرفها بعدين

واما بالبني بقه او الوان تانيه حسب الصبغات

وده هتعرفها لما تبدا دراسه ومش مجال لذكرها دلوقتي


طيب كده خلصنا تقريبا استعراض للمنهج

اتبقى اقول ملاحظات مهمة عند مذاكره الهستولوجي (( الوصايا العشر ))

1 / تقرا الجزء اللى هتذاكره الاول بتركيز وتركز على العنواين الرئيسية والاساسيات وتعرفها كده بتكون خدت 80 % من االدرجة وبعد كده تبدا تتفحص وتقرا بالراحه بقه

2 / الطول والعرض والقطر اللى هي DIMENSIONS مش مهمة اوي بس فيه حاجات هيركزوا عليها اوي المفروض تبقى عارفها دايما

3 / كل ما تخلص شابتر حاول تربط اجزاءه ببعض وتعملها زي خريطه في دماغك كده ده هيساعدك

4 / لما تذاكر الخلايا حاول تعرف كل خليه السيتوبلازم بتاعها حمضي ولا قاعدي

5 / حل الاختيارات اللى هي M.C.Q مهم جدا وهيفيدك كتير وهيثبتلك المعلومة

6 / المراجعه باستمرار مطلوبه في الهستولوجي لانه بيعتمد على الحفظ وسهل يتنسي

7 / ترسم بإيدك كل حاجه بتذاكرها وده هيسهل عليك جدا

8 / وانت بتذاكر هات ورقة فاضيه واكتب فيها الكلمات الرئيسية

9 / اعمل مقارنات كتير للخلايا في جداول ده هيسهل عليك ويخليك تحفظ بسهولة

10 / حب اللى انت بتذاكره واوعى تغصب على نفسك