موظفين الحكومة حالة خاصة .. حصرى جداً

أسيل رزق · #1 02-09-2009, 09:33 PM

موقف من عدة مواقف بتحصل
الواسطة
.. تدخل على الموظف فى السجل المدنى

انت : و الله أنا عايز أختم الورقة دى
الموظف : لا معلش لازم تجيب طابع بوسطة من المكان الفولانى و تجيب ورقة معتمدة من المصلحة الفلانية و معاهم حلة محشى من بتاعة الست ام سيد

.. طبعاً انت تتعقد و تلعن اليوم اللى فكرت فيه إنك تمسك الورقة اللى عايز تختمها

.. بعد أسبوع ..
قابلت فى الشارع واحد صاحبك من زمان

انت : أهلاً أهلاً إزيك يا برنس؟؟
حماده : الحمد لله و انت اخبارك إيه يا راجل مش بنشوفك ليه ؟؟
انت : و الله أنا دايخ بقالى شهر علشان أختم ورقة كذا كذا و كل ما روح يطلبوا منى حاجات ياما و أتخنق و أمشى
حماده : يا راجل .. طب مش تقولى دا أنا عمى موظف فى السجل المدنى هناك
انت : إيه ده بجد؟؟
حماده : أه و ربنا .. روح هناك و اسأل على أستاذ عبد الصمد و قوله أنا من طرف حماده ابن أخوك و هو هيعمل معاك أحلى واجب
انت : طب كويس أنا من بكره هروحله

.. تروح تلاقى نفس الراجل فى وشك ( اصطبحنا و اصطبح الملك لله )

انت : لو سمحت عايز أختم الورقة دى
الموظف : اها لا دا انت هتروح قسم العجوزة تجيب سندوتشين طعمة و اتوصا بالجرجير .... و يرص القايمة بتاعته اللى مش بتخلص
انت : طب لو سمحت عايز أستاذ عبد الصمد
الموظف : أنا عبد الصمد .. أى خدمة يا سيدى
انت : حضرتك عبد الصمد !!
الموظف : مالك مُندهش كده .. هو أنا طلعت فى السيما و أنا معرفش !!
انت : لالا يا أستاذنا .. أنا من طرف حماده إبن أخو حضرتك
الموظف : حماده .. يبقى انت أكيد حسنى صاحبه .. أمرنى
انت : الأمر لله وحده .. كنت عايز أختم الورقة دى
الموظف : بس كده من عنيا دا أنا أخلصلك الورق كله .. كرسى لأستاذ يا مخيمر بسرعة و واحد شاى بفتلة و سكر الأسرة أوااااام
انت : لالا مالهوش لزوم .. ربنا يخليك
الموظف : إزاى بقى دا انت من طرف الغالى إبن الغالى

و حسنى ختم الورقة و شرب شاى ليبتون فتلة و حط 3 معالق سكر الأسرة و خلص من الهم الأذلى بتاعه

يجرى إيه لو كل الناس يبقوا من طرف حماده ؟؟!!!