ظاهرة رمى الكتب بعد الانتهاء من الدراسة

أسيل رزق · #2 22-08-2009, 11:26 AM

و الله موضوع جميل و يستحق المناقشة
أنا كل أصحابى بيتخنقوا منى لما يلاقونى بحتفظ بكتب المدرسة
مع إن الغريبة فيهم إن أول ما نخلص إمتحانات بيشحنوا الكتب على عربية الروبابكية
طب ليه؟؟
مش هقول مثلاً إحتفظوا بيهم يمكن ينفعكوا فى حاجة لإن معظم الطلبة مش بتحب القراية و خصوصاً لو كتاب المدرسة
طب مانحتفظ بيهم يمكن فى حد من جيرانا أو قرايبنا محتاجين الكتب أو حتى لو مش محتاجنهم ولا فى حد نعرفه محتاجهم فى جمعيات خيرية عاملة نشاط إسمه Recycling بتسلمهم كتبك و هما بيعيدوا تصنيعهم من تانى و فلوسه بتروح للأيتام أو أى نشاط تانى داخل الجمعية أو لو فى أيتام فى الجمعية الخيرية محتاجين الكتب دى بياخدوهم

تخيلوا فى بيتنا حاجة مش محتاجنها ولا بنهتم بيها و ممكن نكسب منها ثواب لكن إحنا بكل بساطة نرميها و مانستفدش حاجة أبداً !!

و يا ريت كمان خلال السنة الدراسية نحافظ على الكتب مش نفضل نشخبط و نرسم و نقطع و نعمل طيارات ورق
يعنى نخلى مظهر الكتب كويس علشان لو راحت لحد تانى خصوصاً لو يتيم يحس بالإرتياح و إن الكتاب ده بتاعه و يحس بإحترام الناس ليه

و تقريباً الوزارة كانت عاملة نظام جميل أوى اللى هو نحافظ على الكتب بشكل كويس و آخر السنة نسلمهم للوزارة علشان مايبقاش فى إستهلاك كل سنة للورق و مصاريف كتير تتصرف على الفاضى و دى بجد فكرة جميلة جداً مش عارفة بيتطبق دلوقتى ولا لأ

جزاكِ الله كل خير يا مروة على الموضوع الجميل و يا رب يجى بفايدة

و كل سنة وأنتم طيبين