إلحقوني ............. أنا بقيت طالبة جامعية !!!

[أسيل رزق]

سبحان الله كان فى نيتى أنزل الموضوع ده علشان اللى داخلين جديد على الحياة الجامعية

المشاركة الأصلية كتبت بواسطة تسابيح النجوم

السلام عليكم ورحمة الله وبركاته

و عليكم السلام ورحمة الله و بركاته

كل سنة وانتم طيبين ويارب تكونوا بخير دايما....
و انتى طيبة و بخير يا رب
بصراحة أنا مرعوبة وبرده فرحانة ،عشان بقيت طالبة جامعية
ههههه فكرتينى بأيام زمان
وانا بجد مش عارفة أي حاجة وفي أي حاجة في الكلية
اللي أنا هدخلها ......
وحبيت أسألكم بقي هي معلومات عامة في كل الكليات
الكلية بوجه عام:::
(1) هو المذاكرة في الكلية تبقي زي الثانوي ولا ايه؟؟
عامةً فى أول سنة كل واحد بيكون فاكر إنه خلص ثانوى يعنى خلص تعب و مذاكرة و سهر الليالى و ده مش صحيح لإن الكلية أكيد أصعب من ثانوى و بتحتاج مذاكرة أكتر
(2) ايه الفرق بين المعيد والدكتور؟؟
المعيد ده اللى بيكون محضر ماجستير يعنى جاب تقدير عام جيد جداً أو إمتياز و حضر ماجستير و فى بعد درجة المعيد أستاذ مساعد و ده اللى بيعمل كذا دراسة علمية تقريباً إنما الدكتور دا اللى بيكون حضر ماجستير و دكتوراه و فى الأعلى منهم اللى هو البروفسير يعنى الأستاذ اللى هو بياخد درجة أو مرتبة أعلى من الدكتور زى ما بتسمعى بيقولوا الاستاذ الدكتور فلان .. أ.د/...
(3)وايه الفرق بين السكشن والمحاضرة؟؟
السكشن أهم من المحاضرة لإنه بيكون فيه غياب و حضور و درجات و بتتقسموا مجموعات و غالباً بتفهمى فيه أكتر من المحاضرات العادية للمادة
(4)وهل فعلا الدكتور هو المتحكم فينا يعني منعرفش نستخدم اللماضة معاه!!
لماضة إيه ياختى .. هو عم حسين الفراش بتاع مدرستكم هههه مين اللى جاب دى هنا؟!!
بصى فى دكاترة كتير عايشين فى عالم الخيال و حاسيين إن مفيش حد أحسن منهم و غالباً بيتنططوا على الطلبة خصوصاً الأطفال بتوع الكلية ( سنة أولى ) و يفضلوا يقولوا انتوا فشلة و مش نافعين و هتسقطوا و كلام خايب كده علشان تخافوا منهم و تبقوا مطيعين لكن فى طلبة عندهم مزاج يصاحبوا الدكاترة بس مش اللى عقلهم طاير
(5) هو انتم بتقعدوا في اول دسك ههههههههه
هههههه أموت أنا فى الكلام الكتاكيتى .. و الله الثانوية دى عثل
فكرتينى بنفسى ايام ما كنت تفلة
مبدأياً إسمه بنج مش دسك
أنا كنت بقول كده زيك لازم اقعد فى الأول علشان أفهم و أبقى شاطرة و بعد كده لقيت نفسى برجع لورا و لقيت نفسى فى النص و بعدين ورا خالص وبعد كده بقيت بزوغ من المحاضرات ههههه
لا ماتسمعيش كلامى مش شرط إنك تقعدى فى الأول صدقينى حتى لو قعدتى مع الدكتور على الاستيدج مش هتفهمى حاجة
(6) هو ايه اتحاد الطلبة دا ؟؟؟ وبيختاروا اللي فيه ع اساس ايه؟؟؟
أعوذ بالله من غضب الله .. إتحاد الطلبة يا ستى ممكن تشتركى فيه عادى .. الناس دول بقى بيزوغوا من المحاضرات زيى بالظبط بس هما بيعملوا حاجات مفيدة رسم و مجلات و شعر و الحاجات اللى مش بتأكل عيش دى و بيكونوا ممثلين عن الكلية فى أى نشاط سواء فى الكلية أو على مستوى الجامعة كلها
بس بينى و بينك أنا بحب نظام الأسر أكتر هتقوليلى إيه نظام الأسر ده
نظام الأسر ده إن فى دكتور بيكون أسرة من الطلبة بتوعه و يسمى الأسرة بإسم معين زى مثلاً اسرة الحياة حلوة و برده بيكون ليها أنشطة و ساعات الدكتور اللى ماسكها بيجمع الطلبة و يقول ندوة على صغير أو يتكلم معاهم فى مواضيع معينة و طبعاً بيعملوا رحلات و زيارات أيتام و مسنين و هكذا
ــــــــــــــــــ
الكتابة :::
دي بقي يعتبر اهم سؤال بالنسبة لي ....
هو احنا لازم نكتب كل كلمة الدكتور او المعيد يقولها ولا لا....
أصلي لما بكتب بسرعة مش بفهم حاجةمن خطي طبعا ....
ولا ممكن نسجل للدكتور ونخلص ..........
لالا تسجيل إيه دا ممكن يتعملك محضر و لا قدر الله تترفدى خالص
ههههه بصى يا ستى أنا أصلاً بطيئة فا مش بلحق أكتب حاجة و خصوصاً إنى لما بكتب بسرعة بحس إن فرخة بتنقش على ورقة ( تخيلى بقى المنظر )
هو الأسهل إنك تكتبى الأفكار الرئيسية اللى بيقولها الدكتور و وفرى الورق للرسم و الطيارات و المراكب الورق
أو إتفقى مع واحدة صحبتك هى تكتب و انتى تفهمى و اقعدوا مع بعض و انتى تنلقى و تشرحيلها و بدلوا الأدوار .. الحركة دى عملتها مع أصحابى و جابت نتيجة كويسة
و ساعات الدكتور ولا المعيد بيكون إبن حلال و يكتب على الصنبورة و انتوا تنقلوا أو يقولكم ماتكتبوش كلامى موجود فى الكتاب
إنما لو مادة الدكتور مش منزل ليها كتاب يا تتعاونى مع أصحابك يا إما تنقلى ورا الدكتور و ذاكرى من كلامك أو وسطنى نفسك شوية تسمعى و شوية تكتبى و حاولى توفقى بين الأتنين و مع الوقت هتتعودى
كل ده لو فهمتى حاجة من الدكتور أصلاً علشان تكتبيها او حتى تفهميها
الصداقة :::
بصراحة أنا خايفة اكلم حد في الكلية او اعرف ناس
مكنتش اعرفهم قبل كدا ... لان لما كنت راحة اقدم
كانت فيه بنات مغرورة ومتكبرة مش عارفة ع ايه يعني
وغير كدا اني لما كنت في المدرسة حصلي موقف مع واحدة
ومش هنساه عمري اكيد ...وكنت بعملها كويس
وطلعت في الاخر نفسيتها مش كويسة اطلاقا
بتحقد من غير داعي ....وانا محبش
اتعرض لموقف مرتين ........
بصى صاحبى كل الناس اللى تقابلك سواء حلوين أو وحشين مش تصاحبى يعنى تخليهم أصحابك لكن أعرفيهم و خليهم يعرفوكى علشان لما تحتاجى لحاجة من محاضرات أو شرح تقدرى تلجأى لناس كتير و ماتقلقيش من الناحية دى هتلاقى نفسك صاحبتى اللى هترتاحى معاهم و هتلاقى نوعية الغرور كتير أوى و هتلاقى أكتر بتوع المصالح نصيحتى ليكى على قد ما تديهم لازم تاخدى منهم و اللى هيديكى أكتر ما بياخد منك هيكون خير صديق
ياريت ياجماعة حد يساعدني عشان أنا حاسه اني تايهة
لحد لما افتكر لكم أسئلة تانية

في أمان الله

نصيحة لوجه الله
إبعدى عن الشباب خالص فى الكلية يعنى بلاش تكوين صدقات مع شباب
من اى نوع أصلهم بصراحة بقوا مش أشكال حد يعرفها مش بيجى من وراهم إلا المشاكل .. مع إحترامى للبنى آدمين اللى هنا
المهم خليكى بناتيتى فى بناتيتى
و إسمعى كلام الدكاترة و حاولى تذاكرى أول بأول علشان ماتندميش فى الآخر أو تحسى بتراكم كبير عليكى
و ربنا يكرمك و يوفقك و تكون بداية خير عليكى بإذن الله