خــواطــر سـنـه أولـى جــامـعـه

[Bent 3bdo]

• مكتبة الكلية

طبعا دى بأه مبيدخلهاش غير العلماء والنوابغ والمعقدين .. وبما انى مش معقد.. علىّ الطلاق بالتلاته مانى داخلها .. أنا مالى ياعم ... هيا ناقصة .

• هعمل إيه لو سقطت ؟

أولا فى الجامعه بيسموها دبلرت مش سقطت .. فلو دبلرت بقا بعد الإجتهاد دا كله والتضحيات دى كلها .. يبقى الواحد يرمى نفسه فى أى بلاعه وهوا ماشى .. وبعدين دبلرت إيه .. إنشاء الله مش هيحصل .. أسيب دفعتى ازاى .. دا كان أبويا يربطنى فى رجل السرير .. لا ياعم مش ممكن .. إنشاء الله هطلع الأول ع الدفعه ويمكن يعملولى تمثال ينصبوه على باب المجمع عشان أكون قدوة صالحة لأى طالب يعمل زيي .. ربنا يستر وبطلو بأة كلام عن السقوط عشان مصاريني بدأت تكركب . أسترها ياللى بتستر .

• الأسر

هحاول أشترك فى كل الأسر اللى فى الكلية عشان أنا بحب الحنان وأكيد الأسر دى فيها أب وأم واخوات .. يعنى الحمد لله هلاقى حد يشيل عن بابا المصاريف شوية .

• لو حبيت أعمل إيه ؟

نعم .. نعم .. نعم .. قول تانى كده ؟ ( حبيييت ) ؟ حبك برص .. وعشره خرص واتنين عمى وواحد أطرش فى نفس واحد .. قول إنشالله .. حب إيه اللى انتا جاى تقول عليه ؟ إنتا عارف أبلا معنا الحب إيه ؟ معناه سرحان وعدم مذاكرة وسقوط وتوهان وبلاوى سودا تانيه وبعدين ياروح ماما إنت جاى تتعلم واللا جاى تحب؟ أما تبقى تلاقى تأكل نفسك إبقا روح حب هتاخد واحده تشحت عليها واللا تتسولو دويتو ياحبيبى خد بكالوريوسك وخلص جيشك وسافر برّه كون نفسك وبعدين دور على الجواز والحب والذى منه ومتلعبش ببنات الناس عندك حق فعلا بدرى أوى على الحوارات دى .. أخلص دراستى الأول ..

• هشتغل إيه لما أخلص ؟

ههههههه .. أكيد هتشتغل صيدلى محترم زى ملايين الخريجين اللى اتخرجو قبلك وبعدين دى مش بتاعتك .. دى بتاعة ربنا انت عليك دلوقتى تذاكر وبس والرزق سيبه على ربنا واتطمن ومتخافش رزقك مضمون بإذن الله ولكل مجتهد نصيب

ملحوظة هامة: سرد هذا الواقع لا يعتبر إقرارا بأنه مطابق لشريعة الإسلام وعلى ما ينبغي أن يكون عليه الطالب المسلم والطالبة المسلمة من النماذج التي طالما حلمنا أن نراها في الحرم الجامعي خصوصا فيما يتعلق بمسألة الحجاب والاختلاط وغض البصر.

اقبلوا تحياتي

دكتور / محمد فهمي جامعة طنطا – كلية الصيدلة - قسم العقاقير http://drmohfahmy.jeeran.com mo7ammadfahmy*************

إنتهى