لو محتاج مساعده من كليه حاسبات عين شمس

[ananoo]

السلام عليكم

هوة كل ترم بيبقى في 6 مواد في سنة اولى الترم الاول بيبقى فزيا(1) و رياضة(1) و مقدمة حاسبات و انجليزي(1) و لغويات حاسبية و انسانيات
كل المواد بالانجليزي الا الانسانيات
الفزيا بندرس فيها ميكانيكا بتاعت ثانوية عامة و فيها زيادات
و الرياضة هية التفاضل و التكامل بتاع ثانوية و عليه زيادات
مقدمة الحاسبات هية مادة نظرية جدا بتتكلم عن اساسيات الكمبيوتر و كدة
لغويات حاسبية مادة هايفة جدا احتمال تتلغي السنة دي
و الانسانيات كنا بناخد فيها علم نفس

الترم التاني بيبقى فزيا(2) و رياضة(2) و برمجة و الكترونيات و انجليزي (2) و ادارة اعمال (و كل المواد انجليزي)
و مقدرش اقول ان كل المواد بتنتهي بنهاية الترم لانه احيانا بتحتاج ترجع للقديم بس الدكاترة بتوع المواد بيتغيروا كل ترم

و بصراحة اغلب الدكاترة بتشرح كويس (بس اللي يفهم )و احنا نقدر نسالهم في اي وفت و المعدين كمان ممكن تسالهم براحتك خالص
و المذاكرة غالبا بتبقى من المحاضرات و بعدين من السكاشن او في ناس العكس و غالبا هتحتاج كتب المواد اللي هية بتبقى غالبا مراجع سواء عشان تحل او عشان تذاكر

و ربنا معاكم و ان شاء الله تتبسطوا في الكلية لانها بجد جميله
ولو في اي استفسارات ان شاء الله احاول ارد عليها............

[emytone]

أنا بنصح كل زمايلى القادمين الى حاسبات عين شمس انهم ما يرموش كتاب الدليل اللى هاتخدوا وانت بتقدم أوراقك لأ افتحه هتستفاد منه واذا مش عاجبك الكلام فى الصفح الأولى ادخل على طول على صفحة 25 والكلام عن كلية حاسبات واذا عايز التفاصيل ادخل على جداول ومحتويات المقررات صفحة 63 وستجد فى صفحة 66 جدولين يوضحان المواد فى الترمين والدرجات وإجمالى الساعات وهتلاقى لكل مقرر رقم فى الجدول ومن أول صفحة 73 دور على رقم المقرر وأعرف هاتخد فيه ايه بالظبط واسئلونا ها تلاقونا و بجد الكلية حلوة جدا واحنا ان شاء الله هانساعدكوا ما تهوش فى المناهج وتعرفه الوجه الحقيقى لدراستكم وللكلية .