التكافؤ في الزواج!!!

[الطامحة للافضل]

صراحة انا شايفة ان التكافؤ ده ليه ابعاد كتيرة منها المهم ومنها اللى مش مهم وبتختلف طبعا من شخص لاخر
بالنسبة للتكافؤ التعليمى انا شايفه ان الفرق ميكونش شاسع ولكن يكون بسيط
وشايفه انه ميكونش نفس التخصص او المهنة لانه بيخلق مجال للمنافسة واللى بينتهى بمشاكل
اما بالنسبة للتكافؤ المادى فده حاجة نسبية انا عن نفسى مقدرش ادى راى فيه لانى ممكن يبقى تفكيرى مثالى
بس انا شايفه انه مش فارقة اوى
لان مش معقول ان فيه شاب حيتخرج كامل من مجاميعه ومعاه فلوس بالعقل كده حيجبها منين
انا شايفه ان عادى لو واحدة اتجوزت واحد وتبدا معاه من الصفر او من مستوى متوسط ويبتدوا يبنوا الاسرة ويرفعوها مع بعض
لكن طبعا مينفعش واحد يبقى مستواه المالى منخفض وكمان فرصته فى رفعها ضعيف كده البنت حتحس انها ضيعت نفسها معاه بالذات لما تحس بالفرق
اما اللى بيضايقنى هو المقارنة فى التكافؤ من ناحية العيلة يعنى مثلا مينفعش واحد يفسخ خطوبته مع واحدة لانه اكتشف ان عمها بيشرب مخدرات او كده لان ده صراحة منتهى الظلم ولا تزر وازرة وزر اخرى او ان الولد لما يسال عن البنت يدور على وظيفة ابوها وتاريخه وسجله المدنى بالمرة
لان ده انا شايفه انه ظلم وان الانسان مستقل بذاته فمينفعش نحكم على اخلاق حد اننا نشوف قرايبه وعيلته ممكن اسرته لانها بتاثر تاثير كبير
اما التكافؤ الثقافى بمعنى التكافؤ فى الاسلوب وطريقة الكلام والتعامل فانا شايفه انه معيار لايمكن اهماله لانه بياثر على تربية الاولاد بس طبعا محدش يروح يدور على حد تيبكال ليه بتبقى فيه فروق بسيطة فى العادات والتقاليد وفى النهاية
دى كلها اراء شخصية بحتة وانا اقبل لو فيه حد مش متفق معايا فى حاجة يحاورنى فممكن اقتنع بحجته اكتر وشكرا على طرح الموضوع