مقالات يوسف معاطى الساخرة..... متجدد ان شاء الله

[Mystry]

بسم الله الرحمن الرحيم

هنا هاحط شوية مقالات للكاتب الساخر يوسف معاطى باذن الله


اكيد عارفينه


المهم اشوف الردود علشان اعرف هاكمل و لا .....


و نبدأ بأول مقال :

ألــــــف نيلـــــــة ونيلـــــة



تتجلى الاساطير والحكايات الشعبية فتلقي بظلالها على الواقع فتفرز افكارا جديدة لم تخطر على البال حينما سمعناها لأول مرة ..


عندك مثلا حكاية الاربعين حرامي او بالأحرى ــ الاثنين وأربعين حرامي ــ اذا اضفنا لهم قاسم وعلي بابا ، فكلاهما هبر له هبرة وان كانت الحكاية قد تحيزت لعلي بابا ــ لسبب غير مفهوم ــ رغم انه بعد الضنا بأه لابس حرير في حرير !!


السؤال .. ماذا فعل الاربعين حرامي بما سرقوه ونهبوه من البلاد من غنائم ومجوهرات واموال !! كانوا يستطيعون ان يهربوا بها خارج البلاد وكل حرامي منهم يأخذ حصته ويعيش ملك ، لكنهم اصروا ــ لسبب غير مفهوم ايضا ــ ان يودعوا كنوزهم كلها داخل مغارة تفتح ابوابها فقط لمن يقول افتح يا سم سم ..

وهي فكرة وان دلت على شيء فتدل على براءة الاربعين حرامي بل وسذاجتهم وحسن نياتهم ..


واذا وضعنا في الاعتبار الشكل الخارجي للاربعين حرامي لوجدنا انهم كانوا يرتدون ملابس مميزة وطراطير ويتحركون بشكل جماعي كأنهم فرقة رضا للفنون الشعبية ..


تعالوا بأه نعمل نقلة قياسية على ما نحن فيه لنرى كم ستتغير الصورة .. أولا سنجد ان رقم اربعين لم يعد مناسبا مع الزيادة السكانية الرهيبة فلنقل مثلا انهم صااروا عصابة الاربعين الف حرامي .. طيب .. وأي مغارة هذه التي يمكن ان تؤويهم ؟ .. ياسيدي ماتزعلش .. لنجعلها قرية سياحية .. والغنائم والاموال هل ينفع ان توضع في صناديق وسحارات وشكمجيات كده على عينك يا تاجر !!

طبعا لأ البنوك تقوم بالمهمة والحسابات سرية .. لا سم سم ولا ابو سمسم يستطيع ان يفتحها .. اما بالنسبة للزي فلم تعد الازياء الشعبية مناسبة للمشهد .. ليرتدوا إذن بدلا وكرافتات انيقة على احدث موضة ولتصبح الوجوه ناعمة رقيقة وليصبحوا نجوما في المجتمع لهم هيبة وسلطة وصيت ذائع .. فهذا يمكن ان يكون عضوا في البرلمان وهذا مسئول مهم وذلك طبيب استشاري .. وهذا مدير بنك .. اتفقنا على الشكل ..

ولكن يتبقى شيء .. كيف يتم التنسيق بين افراد العصابة الكبيرة المترامية الاطراف ..


نرجع للاسطورة فنجد ان عصابة الاربعين كانت تتلقى اوامرها من شيخ منصر .. اجش الصوت مخيف الشكل .. ولكن عصابة الاربعين الف كلهم شيوخ منصر او لديهم الطموح لذلك والمؤهلات أيضا .. كلهم شيخ منصر وكلهم شيخ " منظر " .


نعود لنقطة الادارة او الوسيلة التي يتبعها عصابة الاربعين الف حرامي في تلقي الاوامر وتنفيذها .. انها اختراع العصر واكبر وسيلة اتصال لأكبر شبكة في التاريخ .. لا احد يعرف الاخر ولا يكلمه ولا يلتقون ولا يتحاورون . انهم فقط يبدعون .. وقد بدأت المؤامرة بجريمة قتل لشيء اسمه الضمير .. وحدث هذا بشكل تدريجي منظم .. كالسم البطيء .. ولم يعد الحرامي في حاجة الى أوردر من شيخ منصر ..


وصاروا جميعا مثل أي كورال محترف لا يخرج عن المقام ، ينشدون نفس الجملة الموسيقية .. كل هذا والامور ماشية وتسير على ما يرام .. نعم تستطيع العربة الخربة ان تسير اذا وضعتها في اعلى طريق منحدر ..

نعود للاسطورة ونتساءل .. كيف تمكن الراوي من ان يتخلص من عصابة الاربعين حرامي . الحل كان ــ لسبب غير مفهوم ــ بسيطا للغاية ..

أحضر اربعين زلعة ووضع فيها الاربعين حرامي ووضع فوق كل زلعة حجرا .. وهكذا انتهت الحكاية واستراح الناس من شرهم .. نعود للقياس اذا تصورنا اننا سنفعل ذلك .. فنحن بحاجة الى اربعين الف زلعة .. وحتى تكون الزلع من النوع الذي يتحمل ولا ينكسر فيجب ان تكون جيدة الصنع .. وما المشكلة .. نستورد اربعين الف زلعة من الصين .. بسيطة ..

ولكن هذا يحتاج الى إذن استيراد والى اعتماد من البنك !! وماله !! نعمل مناقصة .. او يتقدم احد البنوك بتسهيلات لواحد من حبايبه لكي ينجز المشروع ..ولكن على من سيرسي العطاء .. نريد شخصا موثوقا به وليكن مثلا على بابا


صحيح انه مد ايده هوه كمان وغرف من المغارة ولكنه لم يكن طماعا مثل قاسم .. هوه علي بابا مفيش غيره ..وجاء علي بابا وأخذ القرض ومضى العقد وسافر ليعقد صفقة الزلع ..
بعضهم قال انه شوهد في الصين فعلا .. وناس شافوه في تايوان وآخرون في امريكا ..


وها قد مرت الف ليلة وليلة ولا تزال عصابة الاربعين الف حرامي مطلقة السراح ولا يزال علي بابا مختفيا حتى كتابة هذه السطور .. وأدرك شهر سبتمبر الصباح .. فسكتنا عن الكلام المباح

[hend ere]

بجد مواضيعك كلها جميله ومميزه
فى انتظار باقى المقالات بس ياريت واحده واحده علشان نقدر نشوها كلها
فى رعاية الله

[Mr.Hani]

جميل جدا

ياريت باقى مقالات يوسف معاطى

لكى تصبح موسوعته المقالية الساخرة هنا

[Mystry]

و ادى كمان مقال

بس يا ريت اللى يقرا يقول رأيه :

ابن حلال مصفى

حينما يكون المكان.. مقهى.. أو جلسة ودية.. لابد أن يتكلم الجالسون.. وإذا لم تكن موجودا فلا أروع ولا أحلى من الكلام عن هذا الغائب الذى هو أنت، إن الكلام عن الغائبين شىء ممتع حقا.. والكلام الذى ستقرأونه حضراتكم الآن.. هو ما قاله صديق لصديق آخر عنى.. وحتى لا يصبح مقالى شخصيا أو نرجسيا.. فتأكدوا أن هذا ما يقال عن حضراتكم فى غيابكم.. وهذا أيضا ما تقولونه حضراتكم فى غياب الأصدقاء الآخرين.. قال.. الحقيقة هو إنسان كويس.. دى لا يمكن حد يشكك فيها.. يمكن يكون أنانى شوية.. مش كده!! أوعى تفتكر إنى ضده ولا فى حاجة بينى وبينه.. وحياة ولادى أبدا.. ده راجل خيره لغيره.. وأفضاله على الناس كلها.. أنا بس اللى بيضايقنى منه.. إنه يبان لك طيب وفى الوقت نفسه ده.. ده.. مصيبة.. يعرف من أين تؤكل الكتف مظبوط.. بس هو مش وحش.. ليه؟.. بس على كتاباته.. بصراحة كتاباته ما تخرش الميه.. لما بيكتب بصراحة بيكتب كويس.. إنما يا أخى.. كل اللى بيكتبه ما لوش أى قيمة.. تحس إنه نصب عليك.. شوف بقى له بيكتب قد إيه.. ما كتبش حاجة عليها القيمة لحد دلوقتى.. الغريبة بأه.. إنه بيعتقد فى نفسه إنه بيعرف يكتب.. انت قريت له.. مش كده.. مش حسيت إن كل اللى بيكتبه تفاهات!! أنا مش عاوزك تفهمنى غلط.. أنا بحبه أوى لعلمك وهو بنى آدم كويس.. كفاية شهامته.. مش كده.. راجل عشرة على عشرة.. بشرط واحد.. إنك ما تقربش ناحية جيبه.. هزر معاه واضحك ونكت للصبح.. إنما تيجى فى الفلوس تشوف بنى آدم تانى.. هو بنى آدم مش وحش على فكرة.. إنما لو استلف منك فلوس.. قول عليها يا رحمن يا رحيم.. ما بيرجعش حاجة.. ولو عزمك على ساندوتش فول.. يخلى مصر كلها تعرف إنه عزمك.. إنما والله العظبم أنا بحبه.. وأنا بقول ده علشان بحبه.. أنا لو ليا أخ ما أحبوش زى ما بحبه.. إنما هو بس يبطل السواد اللى جواه ده.. مش أخدت بالك برضه من الحكاية دى.. حقودى بشكل.. أعوذ بالله.. إنما هو عنده ميزة.. محدش يقدر ينكرها.. إنه اللى فى قلبه على لسانه.. دى حقيقة.. صحيح هو منافق من الدرجة الأولى إنما والله العظيم أنا بحبه.. لأن البنى آدم الكويس الناس كلها بتحبه.. كفاية إنه عمره ما اتكلم على حد من ورا ضهره.. كفاية دى.. هوه طبعا ساعات ينم على الدنيا كلها.. إنما يكفى إنه بيفكر فى مصلحة الغير قبل مصلحته.. مفيش حد النهارده بيعمل كده.. إنما برضه عشان نقول اللى لينا واللى علينا هو من ناحية إنه انتهازى.. انتهازى.. ما يعرفش أبوه.. والله أنا ما باشتمه حاشا لله.. ده حبيبى وانت عارف.. كفاية بشاشة وشه وابتسامته بالدنيا كلها.. هو صحيح قدمه مش حلو قوى.. إنما... كانت تلك هى اللحظة التى دخلت فيها عليهما.. فهتف بى صديقى الذى يحبنى.. وقال.. ابن حلال مصفى.. بقالنا ساعة مالناش كلام غير عنك.. يا ريتنا افتكرنا مليون جنيه.. مالك قالب وشك وضارب بوز ليه.. قلت لهما.. البقية فى حياتكوا.. محمود فتحى تعيشوا انتوا.. قالا.. فى صوت واحد.. لا حول ولا قوة إلا بالله.. قلت لهما.. كان جدع طيب قوى.. أنا كنت بحبه.. أومئا برأسيهما وقد دخلا فى مود الحزن بسرعة فائقة.. ثم أردفت.. هو صحيح كان يموت على القرش.. إنما كان راجل محترم.. قالا.. أيوه.. أيوه.. الله يرحمه.. ثم قال أحدهما.. الله يرحمه كان صاحبى الروح بالروح.. أكتر من الأخ.. هو صحيح كان كداب شويه.. إنما هو دلوقتى بين إيدين المولى عز وجل.. كفاية إنه كان راجل.. راجل بمعنى الكلمة.. ثم همس لنا.. بس انتوا عارفين مراته خلعته ليه!!!

[FARIDA 2010]

بسم الله الرحمن الرحيم
السلام عليكم و رحمة الله و بركاته
استاذ Mystry ... المقال جميل جدا و بشكر حضرتك فعلا علي نقله لينا .
انا رأيي ان اللي قاله صح بالرغم من ان مش كل الناس بتتكلم علي بعض .. و ان اللي مش بيتكلم علي الناس فعلا ربنا رزقه نعمة كبيرة و حفظ لسانه ...
معاذ بن جبل سأل الرسول مرة( يا رسول الله أخبرني بعمل يُدخلني الجنة ويُباعدني من النار) و ده حديث طويل شوية و لكن بعد ما الرسول صلي الله عليه و سلم عددله اعمال كتيرة .. قاله في الاخر:ألا أخبرك بملاك ذلك كلهُ؟ كف عليك هذا!!! و اخذ بلسانه.. فقال له معاذ: يا رسول الله ، وإنا لمؤاخذون بما نتكلم به؟ فقال: ثكلتك أمك، وهل يكب الناس في النار على وجوههم إلا حصائِد ألسنتهم؟).

انا رأيي ان لو عيب ارتأي لينا في شخص المفروض مانذكروش لأنه لو غلط حيبقي غيبة و لو صح حيبقي بهتان!!!
قال صلى الله عليه وسلم((اتدرون مالغيبه؟قالوا:الله ورسوله اعلم:قال ذكرك اخاك بما يكره))قيل:افرايت ان كان في اخي ما أقول؟قال: ان كان فيه ماتقول،فقد اغتبته،وان لم يكن فيه ماتقول فقد بهته)) رواه مسلم
و في المقابل ممكن ندعيله بالهداية .. فيبقي حفظنا اللسان و في نفس الوقت كسبنا دعوة من الملايكة ..
قال رسول الله صلى الله عليه وسلم « إذا دعا الرجل لأخيه بظهر الغيب قالت الملائكة : ولك بمثل »

اللهم احفظ السنتنا ..
و جزاك الله كل الخير علي هذا الموضوع..

و السلام مسك الختام
و السلام عليكم و رحمة الله و بركاته

[hend ere]

لا حول ولا قوة الا بالله
بجد تانى حلقه دى بتعبر عن ناس فى منتهى منتهى البشاعه
ربنا يجيرنا منهم
فى انتظار باقى المقالات