أستفسار ارجو من اخواني الإفادة جزاكم الله خيرآ ....

[vampire1188]

اولاً .. اهلا بيك يا أخ نواف معانا في المنتدي

ثانياً .. سيادتك عندنا هنا في القاهرة فيه 3 حاجات .. جامعات حكومية وجامعات خاصة وجامعات دولية

بالنسبة للجامعات الحكومية أشهرهم واسهلهم جامعة القاهرة

الجامعات الخاصة اشهرهم جامعة 6 اكتوبر (بمدينة 6اكتوبر) ومودرن اكاديمي (بالمعادي)

الجامعات الدولية اشهرهم طبعا وبلا منافس الجامعة الأمريكية

بالنسبة لجامعة القاهرة حضرتك بتيجي تقدم عن طريق الملحق التعليمي بالسفارة السعودية بالقاهرة

ودا لإن جنسيتك سعودية .. اما لو كنت مصري فهاتعامل معاملة المصري ويتم معادلة شهادتك عن طريق التنسيق وتخش

وعموماً حضرتك بكل بساطة تروح تسأل فى الملحقة وهما هايبلغوك بالتفاصيل ..

لإن انا نفسي ماعنديش التفاصيل الكافية للموضوع دا

معا ملاحظة ان جامعة القاهرة مابتمشيش بنظام عدد الساعات .. هيا بتمشي بنظام ترمين كل سنة دراسية

والجامعة بتنقسم لحاجتين (دراسة بالعربي / دراسة بالانجليش)

وتخصص ادارة الاعمال اللي حضرتك عايز تدرسه دا .. بتتخصص فيه في سنة رابعة ..

يعني فيه 3 سنين بتقعد تدرس فيهم بطريقة عامة .. وبتيجي في اخر سنة تتخصص

والتخصص بيكون بدون قيود يعني لا بيتطلب مجموع ولا بيتطلب دفع فلوس

لو انتا عايز تتخصص بدري بقي .. فيه جامعة حلوان .. التخصص بيبقي فيها من سنة تالته

اما بالنسبة لجامعة 6 اكتوبر أو اي جامعة خاصة فدا بيبقي التقديم عادي جدا زيك زي المصري ..

بس الفرق انك بتعامل معاملة الطالب الأجنبى في دفع المصاريف ..

يعني عندك مثلا فى جامعة 6 اكتوبر فيه مصاريف دراسية للمصرين ودي بالجنيه المصري

ومصاريف دراسية لغير المصريين (اياً كان بقي عرب ولا اجانب) ودي بالدولار

لمعلومات اكتر .. خش ع الرابط دا وشوفه http://thanwya.com./vb/showthread.php?t=94460

بالنسبة للجامعة الأمريكية ..

بتروح تقدم زيك زي اي طالب .. بس برده الفرق فى المصاريف زي جامعة 6 اكتوبر كدا

بس المصاريف غالبا ما بتتراوح مابين 40 الف جنيه مصري لـ 42 الف جنيه مصري للترم الواحد .. على حسب عدد الساعات

معا ملاحظة ان تخصص ادارة الاعمال في الجامعة الامريكية مابيكونش من اول سنة .. بيبقي من تاني سنة

وقسم ادارة الاعمال بيتطلب انك تخلص 138 ساعة خلال 4 سنين (8 ترمات)

مع مراعاة انك عشان تخش القسم دا لازم تمر بـ 3 مواد اساسية ..

finincial accounting - macro economy - micro economy .. بعد ماتعديهم بيتم عمل زي تنسيق داخلي

عشان يختاروا مين اللي يتقبل ويخش القسم ومين اللي مايتقبلش .. طبعا دا بيبقي بأولوية الحجز والمجموع بتاعك

ومش هانسي اقولك طبعا ان الدراسة هناك بالانجليش .. والدراسة مش سهلة .. بس في نفس الوقت ممتعة

خاصة بعد ما الجامعة اتنقلت للقاهرة الجديدة .. وماقولكش على منظرها من جوا .. تحفة معمارية !!

وعموما دي ارقام قسم ادارة الاعمال هناك تقدر تتصل بيهم وتستفسر براحتك

27976785 - 27976737 - 27976722 - 27976202

ودي برده ارقام خدمات الطلبة عشان لو ماردوش عليك 27975998 - 27975757 - 27975194

واي خدمة ونورت المنتدي