دعوة للتفاؤل والرقي

[أحمـدنجـم]

أنا هقولك حلمي
بس حلمك عليا
لأن حلمي بشوفه
لو مفتح
او مغمض عنيا
هقولك حلمي
وحلمي فيه مدينة
زي السفينة
لما توصل برها
مدينة جوها
ببردها وحرها
يفضل ربيع
في عيون الجميع
حلمي يا صاحبي
اهدي حبي
يطرح سنابل
حبة شتا وصوت البلابل
ويا الربيع اللي هالل
والنخيل
على الشط واقف
زي البنات ام الجدايل
حلمي جاري يحبني
زي انا ما بحب جاري
نفسي صحبي يضمني
يبقى الوفا ما بنا جاري
نفسي شالي
يتسع
يطرح دفا ع الكل
يطرح نسايم فل
حلمي يفضل ربنا
هنا ,, هنا ..
بتبص فين؟
انا بشاور على قلبنا
يكبر حلمنا
واشوف حروب الدنيا ماتت
والسلام جناحين وغص زتون
والحمام ابيض ومالي الكون
واللون
بياضه يلمنا
يضمنا
امه واحد
شعارها واحد
عباد لربنا
عباد لربنا
....
هو دا حلمي
بسيط؟
آه بسيط
من الخليج للمحيط
يبقى قلبنا على بعضنا ..
.........