مش لسه هفكر فى عنوان .. عايزاكم ضرورى

[عاشقـــ الانمى ـــة]

المشاركة الأصلية كتبت بواسطة اسيل رزق

السلام عليكم ورحمة الله وبركاته

بصوا يا جماعة من غير مقدمات

إمبارح فضلت أفكر بليل كده مع نفسى .. تخيلت إنى مُت و شفت الناس اللى حواليا وردود أفعالهم لما سمعوا خبرى

لاقيت اللى زعل شوية وخلاص .. و لاقيت اللى بكى بحُرقة .. ولاقيت اللى عيط شوية و خلاص .. ولاقيت اللى مأثرش فيه الخبر خالص .. يمكن يكون فرح كمان

كلنا هنموت .. مافكرناش إحنا سبنا مين زعلان مننا ولو يوم واحد .. مافكرناش لو قربنا من الناس و حبيناهم و حتى لو كانوا مش كويسين ممكن نغيرهم .. مافكرناش لما يكون ليك حد بيحبك أوى وتزعله منك لأى سبب إزاى بنجرحه ..إزاى بيجيلنا نوم و إحنا زعلانين مع فلان وفلان

و فكرت فى نفسى كده .. بما إن لسانى زى ما إنتو عارفين فا أى حد غير أصحابى بياخد عنى فكرة مش ظريفة خالص و جايز يكون فى ناس بتكرهنى أو على الأقل مش بتطيق سيرتى

طيب ليه كل ده؟؟

أصل فلان قالى كلمة ضايقتنى فا رحت رادد عليه .. سبب تافهه

أصله قال عليا كلام من ورايا مش كويس .. طيب تفتكروا إن الحل هو الخصام أو توصل للكراهية

أصلى مش مرتاحله شخص مش طبيعى .. بس يمكن لو قربته منك و حاولت تصاحبه أكيد هتشيل الفكرة دى من عقلك

أصل و أصل وأصل

حاجات كتيرة أوى .. عن نفسى فضلت أقول أصل دى كتير أوى .. و لقيتنى بقول إن كل دى تفاهات ومالهاش أى أساس

حب الناس كنز لا يفنى .. تخيل إن فى شخص صاحبك بيحبك أوى أوى بدون مقابل .. ياااااااه كفاية إنك لما تموت هتلاقى حد يدعيلك هتلاقى حد يفتكرك بالخير .. حتى لو فارقته هيفضل فاكرك بكل خير عكس ما تخلى حد يزعل منك .. جايز لما تموت هيزعل عليك بس عمره ما هينسى إنك فى يوم زعلته منك

قد إيه الكلمة الطيبة بتغير نظرة اللى قدامك ليك بنسبة كبيرة أوى فعلاً: الكلمة الطيبة صدقة ، الإبتسامة فى وجه أخيك صدقة

موضوعى ممكن نقول عليه التسامح بس مش مع الآخرين بس

لأ ده التسامح مع نفسك قبل الآخرين .. كل واحد يقعد مع نفسه نص ساعة على الأقل كل يوم يفكر هو عمل إيه ويا ترى زعل مين؟؟ طيب لو زعل حد يجرى بسرعة علشان يصالحه

بجد نفسى أبقى كده رغم إنى طيبة جداً بس لسانى ده مش بيسكت ..

بس تيجوا كلنا نصالح بعض حتى لو مش زعلانين من بعض

خلى فى بينا مودة ورحمة وحُسن نية

خصوصاً فى المنتدى .. على طول بنعمل خناقات ومشاكل بداعى وبدون

طيب ليه؟؟ بجد بجد مش مستاهلة .. طيب لا قدر الله لو حد من المنتدى إتوفى ..و انت كنت زعلانه منه ومش بتكلمه .. مش هتحس بندم وإنكسار جواك علشان مات وانتو متخاصمين .. هل ده ينفع ؟؟ هل ده صح؟؟

و أنا من موقعى هذا .. بعتذر لكل اللى فى يوم زعلتهم منى .. وهحاول بقدر المستطاع إنى مازعلش حد منى مهما كان السبب

لسه الموضوع هنتناقش فيه أكتر

بس بجد .. مفيش حاجة تستاهل إننا نخسر حد كنا من السهل إننا نكسبه بسهولة

و لنا عودة

وعليكم السلام ورحمة الله وبركاته
كلامك بجد جميل
بس ساعات كده بلاقى كلام متناقض فى الشعب المصرى
مرة يقولك
"عامل الناس بمثل ما يعاملونك به"
ومرة تانية يقولك
" العفو عند المقدرة"
بس أغلب الشعب بيطبق النظرية الاولى
كل واحد بيعامل التانى زى ما بيعامله
عشان كده فالأغلب بتتولد بينهم كراهية فى أسرع وقت
عشان كدهالمفروض ان كل انسان يبدأ يصلح فى نفسه الاول
يشوف ايجابيات معاملاته
ويتخلص من السلبيات
ويحاول يصلح علاقاته مع الناس كلها
مش عرفة واحد يجيله نوم ازاى وه متخانق مع غيره
المفروض ان كل واحد يحاول يعامل الاخرين بالحسنى
المجتمع دا يتغير تماما

[طـفـلـة الامـس]

موضوع تحفة بصراحة
ياسلام لو طبقناه فالمنتدى ده هنبقى احسن بمرااااااحل
مش عارفة بجد انا فعلا بفكر كتير اوى فى موضوع الموت ده ونفس الافكار بتراودنى دايما
مين هيزعل علشانى واد ايه؟
بس والله انا فعلا علطول بفكر فى الناس اللى هنا بعد كام سنة مش هاعرف عنهم حاجة وده بيخلينى اعيط جامد جدا
لانى فى ناس هنا انا عن جد بحبهم جدا وربنا يعلم
لو كل واحد حط نفسه مكان الناس حالنا هايتصلح كتير
شكرا يامها على موضوعك الجميل فعلا
انا عايزة اتكلم كتير بس هجمع الكلام وارد تانى باذن الله
فى رعاية الله