بعد غياب وبعد وحشتينى اليكم قصيدة الفراق

[أحمـدنجـم]

أخي محمد الآن والآن فقط أستطيع الرد على قصيدتك العملاقة (الفراق) دخلت وشاهدتها أكثر من مرة ولكني صممت ألا أرد عليها وأنت غائب ، وعندما عدت إلينا .. عاد إلينا نبض صادق وعطاء لا ينسى لقسم إبداعات الأعضاء فتقبل مروري وسلامي لك أخي الحبيب ..

م الحزن تنزل دمعتين
على الخدود
مليانه أشواق
وكلمتين على الشفايف
حيرانين
خايفين
عايمين
وسط أمواج السكوت
واموت

طالما القصيدة عامية اسمحولي افك شوية واكلم بالعامية عشان كلامي يناسب جو القصيدة انا عاوز كل واحد بيحب الشعر أو نفسه يكتب شعر يتعلم من الصورة دي طب واشمعنى الصورة دي بالذات؟ أنا هقولكم .. بصوا كده تركيبها تنزل دمعتين + كلمتين عايمين ع الشفايف + في بحر السكات .. ايه الجمال دا يا عم .. ايه التناسب والتناسق دا بجد والله ما ببالغ صورة عبقرية .. دموع العين عملت بحر سكات على الشفايف عام فيها الكلام .. بس ايه رأيك لو كان (غرق) دا مجرد رأي بس

وتنطفى جوايا شامعه
وتختفى طلِّة عيـــونِك
وتنتهى أحلام خيالى
والتقى وسط زحام الشوق
أشواقى بتهرب فى انكســــــــار
تبوح بأسرار عشقى للعيـــــــــون
وكل الكــون
(حـــــــزين )
على الفـــراق
مشتاق لنورك
يامُ العيون شايله الحنان

عبقرية تانية بتظهر في الصورة دي (يا أم العيون شايلة الحنان) وانا هنا بتأمل الحبيبة أم وبنتها العيون والعيون أم وابنها الحنان اذن الحنان حفيد الحبيبة واعز الولد ولد الولد .. اذن الحبيبة بتحب الحنان جداً..

لما نِزلت دَمعتى
كتبت رساله
قالت ياهوه
الحُب ليه نقتلُه
جوَّ القلوب
الحُب إيه آخرته لو كان غلط
ألفين سَخَط

صدقت يا محمد .. الحب ايه أخرته لو كان غلط ألفين سخط .. صدقت يا أخي .. نسجل هذه الحكمة ..

مكسور انا ع الارض محنى
وعنيكى دايره فى الفضا دايره بتلمحنى
ودموعى حايره
خايف تشوفى الذل تنكسرى
حاسه بطعم النصر ... انتصرى
وسيبنى واقف
سيبينى حاسس
ان الفراق وضع مؤقت
وان اللقى جوايا عايش

مكسور أنا ع الأرض محني .. .. بتلمحني .. الله الله على الجناس الجميل والموسيقى الرائعة ..
ولكن يا أخي عليك بمواجهة الواقع وإلى متى ستعيش تنتظر اللقاء .. مع أنك تؤمن أن انتظاره هباء .. في .. هباء ..
تلك القصيدة يا أخي هي هديتك التي تقدمها لنا بعد عودتك سلمت يدك وجزاك الله خيراً ..