حـــــــــــقوقك عـــــــــنــــــد القبض عليك

[brave_mido]

بسم الله الرحمن الرحيم

انهرده انا جاي اجمعكم عشان عندي كلام كتير لازم اقوله و مش عارف ابتدي منين و اقول ايه ولا ايه

الموضوع باين من عنوانه كلنا بنحب بلدنا و اكيد كلنا بنحب كوننا مصريين بس الاكيد اكتر بقة ان محدش فينا عاجبه حالنا واننا محتاجين للتغيير

محتاجين التغيير اللي يخلينا فعلا اصحاب بلدنا و نحكمها بارادتنا و نمشيها لمصلحتنا مش لمصلحة فئة معينه عماله تشيل فلوسنا في البنوك لحسابها و ده فعلا حقنا و كلامهم مش كلامي طبقا للمادة 3 من الدستور المصري اللي بتقول

مادة(3): السيادة للشعب وحده، وهو مصدر السلطات، ويمارس الشعب هذه السيادة ويحميها ويصون الوحدة الوطنية على الوجه المبين فى الدستور.

محتاجين التغيير اللي يمنع الكوسة و الوسايط من بلدنا

مادة(8): تكفل الدولة تكافؤ الفرص لجميع المواطنين.

مادة(40): المواطنون لدى القانون سواء، وهم متساون فى الحقوق والواجبات العامة، لا تمييز بينهم فى ذلك بسبب الجنس أو الأصل أو اللغة أو الدين أو العقيدة.

محتاجين التغيير اللي يضمن مجانية التعليم في مدارسنا و جامعاتنا _ و طبعا انتوا فاهمين قصدي _

مادة(20): التعليم فى مؤسسات الدولة التعليمية مجانى فى مراحله المختلفة.

محتاجين التغيير اللي يضملنا حقوقنا من مكاسب قناة السويس والبترول و الغاز اللي رايحين اسرائيل كل يوم و خلافه

مادة(25): لكل مواطن نصيب من الناتج القومى يحدده القانون بمراعاة عمله أو ملكيته غير المستغلة.

التغيير اللي يخلينا نقدر نتعامل مع اي ظابط شرطة فاكرنا وليمة و لا ملناش لازمة بيتعامل معانا علي اننا كوم لحم ملهوش ثمن

و النقطة دي بالذات انا عايز اقف عندها شوية لا عايز اقف عندها كتير

مادة(41): الحرية الشخصية حق طبيعى وهى مصونة لا تمس، وفيما عدا حالة التلبس لا يجوز القبض على أحد أو تفتيشه أو حبسه أو تقييد حريته بأى قيد أو منعه من التنقل إلا بأمر تستلزمه ضرورة التحقيق وصيانة أمن المجتمع، ويصدر هذا الأمر من القاضى المختص أو النيابة العامة، وذلك وفقا لأحكام القانون.

ويحدد القانون مدة الحبس الاحتياطى.

و طبعا كل يوم بنشوف و بنسمع عكس كده خالص و المصيبة ان اهالينا مفهمانا ان هما صح و احنا غلط و اننا المفروض نمشي جنب الحيط و حتي الكلام بلاش منه احسن الحيطان ليها و دان

بس تخيل بقة لو في يوم حصل معاك موقف زي كده و روحت سارد للظابط ده المادة دي بزمتك مش هيخاف منك و يقول عليك واعي و يخاف يخدك مع الزباين

مادة(42): كل مواطن يقبض عليه أو يحبس أو تقيد حريته بأى قيد تجب معاملته بما يحفظ عليه كرامة الإنسان، ولا يجوز إيذائه بدنيا أو معنويا، كما لا يجوز حجزه أو حبسه فى غير الأماكن الخاضعة للقوانين الصادرة بتنظيم السجون.

وكل قول يثبت أنه صدر من مواطن تحت وطئة شىء مما تقدم أو التهديد بشئ منه يهدر ولا يعود عليه.

طبعا كلكوا سمعتوا عن فضايح الاقسام و خصوصا قسم المنتزة اللي بقي اشهر قسم في البلد و علي فكرة القسم ده المسافة بينه و بيني اقل من ربع ساعة

و لمزيد من الفضايح اول بأول شوفوا الموقع ده _ هتلاقوا بلاوي متلتلة بتحصل كل يوم _
http://tortureinegypt.net

مادة(44): للمساكن حرمة فلا يجوز دخولها ولا تفتيشها إلا بأمر قضائى مسبب وفقا لأحكام القانون.

انت انهرده لو مشيت في مظاهرة ولا قولت ان في اي حاجة مش عاجباك بتبقي قاعد في بيتكوا و مستني اي حد يكسر الباب و تغمض عينك تلاقي نفسك في اوضة الفران

مادة(45): لحياة المواطنين الخاصة حرمة يحميها القانون.
وللمراسلات البريدية والبرقية والمحادثات التليفونية وغيرها من وسائل الإتصال حرمة وسريتها مكفولة، ولا تجوز مصادرتها أو الإطلاع عليها أو رقابتها إلا بأمر قضائى مسبب ولمدة محددة ووفقا لأحكام القانون.

دلوقتي معادش حد عارف مين شايف مين ولا مين بيسمع مين

مادة(47): حرية الرأى مكفولة، ولكل إنسان التعبير عن رأيه ونشره بالقول أو الكتابة أو التصوير أو غير ذلك من وسائل التعبير فى حدود القانون، والنقد الذاتى والنقد البناء ضمان لسلامة البناء الوطنى.

حرية الرأي مكفولة وعلي الله تفتح بقك :sm4:

مادة(54): للمواطنين حق الاجتماع الخاص فى هدوء غير حاملين سلاحا ودون حاجة إلى إخطار سابق، ولا يجوز لرجال الأمن حضور إجتماعاتهم الخاصة، والإجتماعات العامة والمواكب والتجمعات مباحة فى حدود القانون.

يا راجل دانا ببقي قاعد في الدرس و خايف ليعتبرونا تجمع سياسي

مادة(57): كل إعتداء على الحرية الشخصية أو حرمة الحياة الخاصة للمواطنين وغيرها من الحقوق والحريات العامة التى يكفلها الدستور والقانون جريمة لا تسقط الدعوى الجنائية ولا المدنية الناشئة عنها بالتقادم، وتكفل الدولة تعويضا عادلا لمن وقع عليه الاعتداء.

خلي بالكوا من 3 كلمات اعتداء - جريمة - تعويضا يعني مينفعش تمشي اسفين علي الازعاج

مادة(62): للمواطن حق الانتخاب وإبداء الرأي في الاستفتاء وفقا لأحكام القانون، ومساهمته في الحياة العامة واجب وطني، وينظم القانون حق الترشيح لمجلسي الشعب والشوري، وفقا لأي نظام انتخابي يحدده، ويجوز أن يأخذ القانون بنظام يجمع بين النظام الفردي ونظام القوائم الحزبية بأية نسبة بينهما يحددها، كما يجوز أن يتضمن حدا أدنى لمشاركة المرأة في المجلسين.

هنا بقي فيه سؤالين ليه مجلس الشعب بقي بتاع الوطني والاخوان ؟
طب ليه الناس مش بتروح ترشح الناس اللي شايفاها كويسة ؟
ولا خلاص مبقاش في ناس كويسة

مادة(63): لكل فرد حق مخاطبة السلطات العامة كتابة وبتوقيعه، ولا تكون مخاطبة السلطات العامة باسم الجماعات ولا للهيئات النظامية والأشخاص الاعتبارية.

طب والنبي محدش معاه رقم حسني مبارك ولا اي وزير من اللي ملهومش لازمة دول ؟؟؟
وللعلم في مكتب في ميديرية االامن بيكون مخصص لمحاسبة ضباط الشرطة واللواء اللي ماسك المكتب ده في اسكندرية عندنا هنا بيشتكي من انه قاعد فاضي معندوش شغل محدش بيجي يشتكي _ عشان اصلا محدش يعرفه _

مادة(66): ولا جريمة ولا عقوبة إلا بناء على قانون، ولا توقع عقوبة إلا بحكم قضائى ولا عقاب إلا على الأفعال اللاحقة لتاريخ نفاذ القانون.

مهو فعلا اللي بيحصل في الاقسام ده مش عقوبة ده تعذيب و بشاعة

مادة(67): المتهم برئ حتى تثبت إدانته فى محاكمة قانونية تكفل له فيها ضمانات الدفاع عن نفسه.

وكل متهم فى جناية يجب أن يكون له محام يدافع عنه.

لا هنا بقي بيتبعوا : البرئ اللي ماشي في حاله متهم حتي تثبت برائته _ ده لو مكانش زبون فيه الطمع _

مادة(71): يبلغ كل من يقبض عليه أو يعتقل بأسباب القبض عليه أو إعتقاله فورا، ويكون له حق الإتصال بمن يرى إبلاغه بما وقع أو الإستعانة به على الوجه الذى ينظمه القانون، ويجب إعلانه على وجه السرعة بالتهم الموجهة إليه، وله ولغيره التظلم أمام القضاء من الإجراء الذى قيد حريته الشخصية، وينظم القانون حق التظلم بما يكفل الفضل فيه خلال مدة محددة وإلا وجب الإفراج حتما.

طب بالله عليكوا الناس اللي بيتلموا في البوكس كل يوم بالليل دول تهمتهم ايه ؟؟؟؟؟؟؟

مادة(184): الشرطة هيئة مدنية نظامية، رئيسها الأعلى رئيس الجمهورية.

وتؤدى الشرطة واجبها فى خدمة الشعب، وتكفل للمواطنين الطمأنينة والأمن، وتسهر على حفظ النظام والآمن العام والآداب وتتولى تنفيذ ما تفرضه عليها القوانين واللوائح من واجبات، وذلك كله على الوجه المبين بالقانون.

واضح ان الهيئة دي فاشلة حتي في تطبيق قوانينها

بزمتكوا يا جماعة كام واحد كان عارف الكلام ده و كام واحد مسمعش عنه قبل كده ؟؟؟

كام واحد نفسه اليومين دول مصر تاخد موقف من اللي بيحصل في غزة ؟؟؟؟ بس قبل مايجاوب ويقول ايوة انا يقولي ازاي هنساعد شعب فلسطين و احنا مش عارفين لسه نساعد نفسنا ؟

لامتي هنفضل ساكتين ؟ جنب الحيط خايفين ؟

لامتي هنخاف نطالب حتي بابسط حقوقنا اللي موجودة في دستورنا ؟ _ علي فكرة كل المواد الدستورية اللي انا قولتها دي جايبها بالنص من موقع بوابة الحكومة المصرية وهو موقع حكومي بحت يعني مش المعارضة اللي بتقول الكلام ده _ واللي عايز يشوف الباقي يدخل علي الموقع ده
http://www.egypt.gov.eg/arabic/laws/...n/default.aspx



لازم نتحرك لازم نعمل حاجة طب هنعمل ايه ؟؟؟؟؟؟ يا عم احنا غلابة :sm247:

لا احنا مش غلابة بصوا لشعوب اوروبا ليه حكوماتها بتحترمها ؟؟؟؟ اشمعني حكومتنا بتعاملنا كده ؟؟؟؟ هو احنا اقل من الناس دي في ايه ؟؟؟؟؟

الاجابة ان الناس دي عارفة حقوقها كويس

سيبك من اوروبا يا عم تعالي شوف هنا في مصر بيحصل ايه لو ظابط وقف محامي في الشارع و سأله عن بطاقتة مثلا المحامي بيطلع كارنيه النقابة بيروح الظابط يقوله اتفضل حضرتك اسفين علي الازعاج

برده لان المحامي ده عارف حقوقه كويس

طب اي حد فيكوا كده يا جماعة يسأل اي محامي يوم لما طلع الكارنيه و راح يحلف اليمين في النقابة قالوله ايه ؟؟؟؟؟

هيقولك قالولي لو انت مش قد الكارنيه ده متطلعهوش و لو في يوم حصل معاك اي موقف مهين ليك يبقي مهين لينا و لو معرفتش تجيب حقك و حقنا تعالي و احنا نجيبلك حقك و حقنا

طب هات من الاخر عايز تقول ايه ؟؟؟؟

اول امبارح دخلت السيبر لقيت اربعة حبايبي عندهم روح وطنية عالية اوي قاعدين بيتكلموا قعدت معاهم وقعدنا نفكر في حل و وصلنا لانه مفيش قدامنا غير اننا نحاول نوعي الناس و نعرفهم حقوقهم عشان يقدروا يساعدوا نفسمهم و و بالتالي نغير شكل بلدنا للاحسن

طب احنا اللي انت واجع دماغنا من الصبح دورنا ايه ؟؟؟؟

والله دوركوا بيتلخص في كلمة بسيطة اوي احنا كنا قاعدين خمسة و يهمنا اوي اننا نبقي ستة و اتعاهدنا ان كل واحد فينا في كل مكان قاعد فيه يحاول علي قد مايقدر يفهم اللي حواليه
يعني من الاخر كل واحد فينا بعد ما عرف حقوقه يبدأ يطالب بيها و ميخافش من اي حاجة هي في الاصل من حقه و يبدأ يعرف كل اللي حواليه و صدقوني حياتنا هتتغير بجد

لازم نطالب بان الكلام ده يتحط في المناهج التعليمية و لو بأي صورة بدل الحاجات اللي ملهاش لازمة و بيعلموهلنا عافية دي

ولحد مايجي اليوم ده لازم كلنا نعلم اطفالنا حقوقهم و مش اطفالنا بس نعلم الكبار اللي مش عارفين كمان عشان يعلموا اطفالهم و مش بس حقوقنا لأ اللي يقدر يعلم اي حاجة يحاول يعلمها لكل اللي حواليه يبدأ باسرته و اصحابة وجيرانه و زمايله و حتي عالنت يحاول ينشر العلم في كل مكان و محدش يقول ده سر مهنتي ولا اكل عيشي عشان الرزق بتاع ربنا مش بتاع حد تاني

انا بدأت معاكوا هنا في المنتدي و ان شاء الله هانشر الموضوع ده في منتديات تانية و ربنا يسهل و هنعمل موقع علي النت خالص بالحملة دي بس طبعا محدش يقدر يصحي مجتمع لوحده و لا حتي احنا الخمسة نقدر لوحدنا محتاجينكوا معانا و محتاجين كل مصري معانا

و في النهاية عايز اقول لأي حد بيتمني يسيب بلده و يسافر انت غلطان عمر البلد اللي انت رايحها ما هتديلك زي بلدك و حتي لو مش لاقي حاجة من بلدك لازم تحاول تغيرها مش تتخلي عنها في ظروفها الصعبة و ان شاء الله ايدك في ايدي نوصل ببلدنا للعالم الاول