°؛¤ّ,¸¸,ّ¤؛°`°؛¤ّ,¸ارتقِ على المنبر....فأنت الداعية°؛¤ّ,¸¸,ّ¤؛°`°؛¤ّ,¸

[الجويرية]

المشاركة الأصلية كتبت بواسطة dr.zomba

في البداية بشكر اخويا وحبيبي شريف الخضري علي الفرصة دي ربنا يكرمه ويوفقه في حياته

وبجد بحيي مها علي الخاطرة الجميلة وربنا يجعلها في ميزان حسناتها ويكرمها ويوفقها

انا فعلا بشكرك يا شريف انك اديتني الفرصة دي لاني كنت عايز اقول اللي حصلي لكل الناس

احساس انك توصل لربنا وانك تحس ان ربنا استجابلك محدش يقدر يحس حلاوة الاحساس دا غير اللي ذاقه

انا لحد اخر السنة اللي فاتت مكنتش بصلي بانتظام وكنت بحاول كتير واقطع

وكان في يوم جمعة وانا متعود اتفرج علي الاستاذ مصطفي حسني وبعدها بحوالي ساعة ساعتين بتفرج علي برنامج علي قناة الرحمة للدكتور حازم شومان

الاستاذ مصطفي حسني كان بيتكلم عن مداخل الشيطان للمسلم

وبالذات المسلم اللي بيحاول يجاهد نفسه بيفشل اه بس بيحاول تاني

يعني الشيطان ممكن يدخلك من المدخل الديني يعني انت مصليتش طول اليوم وسمعت اذان المغرب وقولت انا نفسي اقوم يجي الشيطان يقولك يعني انت مصليتش طول اليوم وجاي دلوقتي تقول عايز تصلي خلاص ا بدأ من بكره بقي

وتاني يوم تكون الحماسة اللي عندك راحت

ايه الحل ؟؟؟ الحل ان حضرتك لما تكون ناوي تصلي ويجيلك الشيطان يقولك كدا ( وتأكد ان اللي يلهيك عن الصلاة شيطان ) قوله ملكش دعوة انت مش ربنا عشان تحاسبني

اعمل اللي عليك لان اكيد اكيد ربنا مش هيعاقبك عشان انت صليت المغرب وسبت باقي اليوم بالعكس دا انت ليك اجرين لانك بتجاهد نفسك وغير كدا ان ساعة الحماسة مش بتيجي كتير يعني لما تيجي لااااازم تستغلها

.........وهكذا

بصراحة الكلام دا هزني بس كنت لسة محتاج دفعة تانية

ولما اتفرجت علي الدكتور حازم شومان كان بيتكلم عن يوم الحساب

اول مرة في حياتي اتخيل يوم الحساب وانا واقف قصاد المولي عز وجل وبيسألني يقولي : انت مكنتش بتصلي ليه ؟

مكنتش بتشكرني ليه ؟

كنت بتعبد البشر والتفزيون ومبتعبدنيش وانا اللي اديتك كل النعم اللي انت كنت فيها ولو كنت فضلت تصلي طول عمرك عشان تحاول تردي جزء صغير جدا من النعم اللي ادتهالك مكنتش هتقدر توفيها

انا الملك ربك ورب العرش العظيم

وزي ما انت نسيتني في الدنيا انا هنساك النهاردة وهوريك عذابك

وكل دا وانا لحم وشي بيتساقط من كتر الخجل

وينادي الملائكة

ويجوا يقيدوني بالسلاسل ويجروني علي وشي لحد الجنة

.................وهكذا

انا ساعتها اخدت قرار اني هصلي من بكره لان ساعتها كانت الساعة 12 بليل

بس قولت اكيد قراري هيبقي زي كل مرة وهضعف

ومحدش من البشر هيقدر يساعدني في حاجة زي كدا

افتكرت حاجة ولما افتكرتها زعلت من نفسي اوي

الحاجة دي اني ملجأتش لربنا

ساعتها دخلت اتوضيت ونويت بقلبي واول مرة تحصل

وصليت حسيت اني بصلي بقلبي

وسجدت لربنا كأني اول مرة في حياتي اسجد

وبكيت بكاااااااااااااأ وفضلت ادعي ربنا انه يساعدني اني اقربله كل دا بقلبي

فضلت ساجد حوالي نص ساعة

والله ما حسيت بالوقت وفلحظة وانا ساجد حسيت اقسم بالله ان ربنا تقبل دعائي

كأنه عز وجل بيقولي وانا قبلت اساعدك

وافتكرت الحديث القدسي اللي بيقول :(إذا تقرب العبد إلي شبراً تقربت إليه ذراعاً، وإذا تقرب إلي ذراعاً تقربت منه باعاً، وإذا أتاني يمشي أتيته هرولة .)

وحسيت كأن كل اللي حصل دا انا اللي مقصود بيه ان ربنا قاصدني عشان اتفرج علي البرامج دي وتكون سبب اني ارجعله تاني

واقسم بالله يا جماعة بعد اليوم دا مفيش ركعة واحدة فاتتني الحمد لله وكنا ساعتها داخلين علي الاجازة يعني كنت فاضي بقيت بحاول اتقرب لربنا بالنوافل وبحاجات كتير

حسيت زي ما اكون كنت عطشااااااااااان جدا جدا ولقيت قصادي نهر مياه بجد بقيت بحس اني مستني الاذان يأذن عشان اصلي بقيت بستني الصلاة وبجد فهمت ازاي الرسول صلي الله عليه وسلم كان بيقول: (ارحنا بها يا بلال.)

وكان رمضان اللي فات دا احسن رمضان قضيته طول حياتي لاني قضيته مع ربنا بقدر كبير

بجد يا جماعة الحياة مع ربنا ملهاش مثيل انك نايم مش خايف تموت احسن ربنا يحاسبك

انك تنام وضميرك مرتاح لانك مش مقصر مع ربنا

وبإذن الله طموحي موقفش عند كدا

لا انا ان شاء الله طموحي اعمل كتير للاسلام

بس ربنا ييسر

اسف بجد اني طولت عليكو ويارب يارب يارب اكون قدرت افيد اي حد

وربنا يكرمك مرة تانية يا شريف علي اتاحة الفرصة دي ليا

انا قريت هنا خواطر كتيييير
بس بجد ممكن اقول دى اجمل خاطرة قريتها
لانها نابعة من داخل القلب
وفعلا صادقة
مش كلام متزوق لا كلام بسيط ومؤثر جدا
جزاكم الله كل خير
ثبتكم الله ع ماانتم فيه